Ինչո՞ւ է Համազասպ Դանիելյանը ընդդիմությանը ձիու հետ համեմատել. լարված մթնոլորտ ԱԺ-ում

«Լուսավոր Հայաստան» խմբակցության ղեկավար Էդմոն Մարուքյանն ԱԺ-ում անպատասխան չթողեց Արարատ Միրզոյանի պատասխանն իր խոսքին:

«Պարո՛ն Միրզոյան, դուք երեք անգամ Ձեր խոսքում նշեցիք, որ լավ չեք հասկացել, հորդորում եմ մնալ կոռեկտության սահմաններում և չփորձեք վիրավորել, և երեկվա վիրավորանքների համար՝ ընդդիմությանը ձիու հետ համեմատելու համար Դուք պետք է ներողություն խնդրեք, երևի դուք չեք կարողացել գիտակցել ձեր դերը, դուք պետք է ապահովեիք հանձնաժողովի գործունեությունը, դուք երեք օր ժամանակ ունեիք փաստաթղթերը փորձաքննության ենթարկելու համար, ԱԺ-ն իջեցնում եք Երևանի ավագանուց ցածր մակարդակի՞, իրե՞նք են որոշում, թե ինչ հանձնաժողով ստեղծվի»:

Հիշեցնենք, որ քվեարկությունների ժամանակ Էդմոն Մարուքյանը հիշեց երեկ մեծամասնության կողմից իրենց նախաձեռնությունը տապալելու դեպքը ու մեղադրեց ԱԺ նախագահին:

Միրզոյանը պատասխանեց՝ ասելով.

«Ես աշխատում եմ, կաշխատեմ, որ այս հարցին իմ պատասխանը լինի վերջինը, ես չգիտեմ՝ ինչ նյուանսներ կգտնեք այս օրենքում, որի վերնագիրն է «ԱԺ կանոնակարգ» օրենք, նշված է, որ եթե քննիչ հանձնաժողովի նախաձեռնության տակ ստորագրած պատգամավորների թիվը և մի քանի այլ տեխնիկական բաղադրիչ ապահովված է, ԱԺ նախագահը հայտարարում է քննիչ հանձնաժողով ստեղծելու մասին, այլ իրավասություն ԱԺ նախագահը չունի, չի կարող իր հայեցողությամբ որոշել, ԱԺ նախագահն ընդամենը բարձրաձայնում է փաստը, մնացածը, պարո՛ն Մարուքյան, մանիպուլյացիաների ոլորտից է»:

Արձագանքեց նաև Համազասպ Դանիելյանը, որը երեկ ընդդիմության մասին խոսելիս մեջբերել էր ձիու մասին անգլիական ասացվածքը, որ ձիուն կարող ես տանել աղբյուրի մոտ, բայց չես կարող ստիպել, որ ջուր խմի:

«Ես խոսք վերցրեցի, որովհետև իմ խոսքին անդրադարձ եղավ և հերթական անգամ նենգափոխվեց այն քաղաքական ուժի ղեկավարի կողմից, ում ներկայացուցիչն այստեղ մեկ այլ պատգամավորի ասաց՝ դուք շատ փոքր մարդ եք, իմ խոսքը եղել է ալեգորիկ, ձիու հետ համեմատությունը խոսք է, ասում է, որ ընդդիմությունը պահապան շուն է։ Եթե ներողություն եք ուզում խնդրել, կարգավորեք ձեր հռետորաբանությունը»,- ասաց նա:

Միրզոյանը նորից արձագանքեց.

«Կոռեկտության կոչ եք անում, պարոն Մարուքյան, (այս ընթացքում Մարուքյանը ընդհատում էր-խմբ.), մարդ ինքն իրեն մի քիչ պիտի տիրապետի, կոռեկտության մասին եք խոսում, դուք երեկ հայտարարում եք, որ միակողմանի նախազգուշացում եմ տվել, փառք Աստծու, տեսագրված է, հանուն արդարության, երբ որ խոսում էիք, պարոն Ռուբինյանը հանգիստ խոսում էր, երբ ի պատասխան պարոն Ռուբինյանն էր խոսում, դուք էդտեղից իջաք, էստեղ կանգնեցիք և սկսեցիք զուգահեռ գոռալ և խանգարել, ես, որպես նախագահ, այդ արարքի համար հայտարարեցի նախազգուշացում, անարդարացի կլիներ, որ նույն դրվագի համար պարոն Ռուբինյանին էլ նախազգուշացում հայտարարեի»:

Մանրամասները` տեսանյութում: