Խնդիր կա ինձանից՝ որպես ՍԴ նախագահից ազատվելու. Հրայր Թովմասյան

ՍԴ նախագահ Հրայր Թովմասյանն այսօր իր տան խուզարկությունից հետո լրագրողների հետ զրույցում շնորհակալություն հայտնեց այս գործընթացների նկատմամբ հանրային վերահսկողության համար: Նա տեղեկացրեց՝ երկու-երեք անգամ հրավիրվել է հարցաքննության, այսօր իր տանն են քննչական գործողություններ կատարել:

«Իմ խնդրանքը եղել է, որ ամբողջը տեսաձայնագրվի, այն, ինչ կատարվում է, այսօրով չի ավարտվելու, նոր քրգործերի հիմք են դառնալու, այն ժամանակ ապացուցողական բազան չի լինելու: Ես իմ միջնորդությունը կրկնելու եմ միշտ, որ ամբողջը տեսաձայնագրվի: Ինձ համար անհասկանալի է քննչական մարմնի ձեռնպահ մնալը: Երկրորդը. ես իրավական կողմին չեմ անդրադառնա, իմ պաշտպանական խումբը դրանց կանդրադառնա, բայց, ցավոք, այն, ինչ տեղի է ունենում իմ, ՍԴ շուրջ, գալիս է հիմնավորելու, որ խնդիրներն իրոք խորքային են: Օրվա իշխանությունն ունի խնդիր՝ արագ ձերբազատվելու ինձանից՝ որպես ՍԴ նախագահ, այդ ամբողջն արվում է կոպիտ, ակնհայտ, այլևս իմ ասելով չէ, որ մեր և միջազգային հանրությունը տեղյակ է»,- ասաց նա:

ՍԴ նախագահն ասաց, որ իր համար Հրայր Թովմասյանի խնդիրը այս պարագայում երկրորդական, երրորդական է, շատ ավելի կարևոր է երկրի հեղինակությունը, վաղվա օրը: Նրա գնահատմամբ՝ չի կարելի տարիներով հավաքած հեղինակությունն արագ «մսխել»: Թովմասյանը լրագրողներին ասաց, որ նրանք տեսնում են պրոցեսների 10 տոկոսը, հիշեցրեց՝ ԱԱԾ նախկին տնօրեն Արթուր Վանեցյանը որոշ հարցերի մասին բարձրաձայնել է:

«Ես հուսով եմ, վստահ եմ, որ Վանեցյանի սպայի պատիվը թույլ չի տա, որ ինքն ամենի մասին լռի, և այդ ամբողջը կդառնա հանրության սեփականություն: Եթե առ այսօր սրա մասին ես լռում եմ, դա միայն իմ երկրի հեղինակությամբ է պայմանավորված»,- նշեց Թովմասյանը՝ շեշտելով, որ վերջին անգամ համաշխարհային պատմության մեջ բարձրագույն դատական ատյանի ղեկավարի նկատմամբ նման պրոցես է սկսվել 200 տարի առաջ:

«Ուզում եք՝ զրկանք համարեք կամ հետապնդում, սա իմ խաչն է, որ ես պետք է տանեմ: Իմ՝ ցուցմունք տալուց հրաժարվելը պայմանավորված է միայն նրանով, որ այստեղ իրավունք գոյություն չունի, այս ամենը քաղաքական է, որը չի բխում երկրում որևէ մեկի շահերից»,- ասաց ՍԴ նախագահը:

Հարցին՝  արդյո՞ք այս ամենի մասին խոսել է ՀՀ վարչապետ Նիկոլ Փաշինյանի հետ, Թովմասյանը պատասխանեց, որ չի խոսել, նպատակ էլ չունի խոսելու: Լրագրողները հետաքրքրվեցին՝ ճի՞շտ են տեղեկություններն այն մասին, որ իրեն գաղտնալսում են: ՍԴ նախագահը նշեց.

«Իմ ընկերներին ասում եմ՝ երբ խոսում եք, գրում եք, միշտ առաջնորդվեք այն կանխավարկածով, որ ձեզ լսում են: Իմ կյանքի ռեժիմը չի փոխվել»: