Սկսել նորից. Պուտինի նախագահական պաշտոնավարման հաշվարկը նորից են սկսում

Ամեն ինչ սկսվել էր Պետական դումայի արձակման ու խորհրդարանական արտահերթ ընտրությունների անցկացման հարցի քննարկմամբ, որի մասին մի քանի ամիս արդեն շշուկներ էին պտտվում: Բայց այդ հարցով քննարկումը չստացվեց, ու սահմանադրական փոփոխությունների հարցերը քննարկելիս հանկարծ ամբիոնին է մոտենում պատգամավորներից մեկը՝ մեզ հայտնի առաջին կին տիեզերագնաց, հիմա արդեն քաղաքական գործիչ Վալենտինա Տերեշկովան և նման հայտարարություն անում.

«Փոփոխությունների տարբերակները, որոնք քննարկվում են բաց հրապարակներում ու պարզապես խոհանոցներում, Վլադիմիր Վլադիմիրովիչ Պուտինի մասին են: Եվ այստեղ խորամանկելու և հնարամտելու բան չկա: Մարդկանց անհանգստացնում, նույնիսկ մտահոգում է, թե ինչ է լինելու 2024 թվականից հետո:

Պետք է կա´մ Սահմանադրությունից ամբողջությամբ վերացնել նախագահելու ժամկետների սահմանափակումները, կա´մ, եթե դա պահանջում է իրավիճակը. և կցանկանան մարդիկ օրենքում հնարավորություն ընձեռել գործող նախագահին` թույլ տալ նորից ընտրվել այդ պաշտոնում՝ արդեն նոր Սահմանադրության համաձայն»,- ասել է Վալենտինա Տերեշկովան:

Մինչ այդ Պուտինը բազմազավակ մայրերի հետ հանդիպման ժամանակ հայտարարել էր, որ չի պատրաստվում հատուկ կոնստրուկցիաներ մտածել, ավելին, «Ռոսիա-1»-ին տված հարցազրույցում նա նաև դեմ էր արտահայտվել նախագահական ժամկետների սահմանափակումները վերացնելուն:

Բայց Դումայում Տերեշկովան իր ելույթում պատգամավորներին իր առաջարկը հիմնավորել է՝ նշելով, թե Պուտինի վերընտրությունը երկրի համար կլինի կայունացնող գործոն:

Պետդումայի նախագահ Վյաչեսլավ Վոլոդինը, ի պատասխան, հայտարարել է, որ նման փոփոխության ընդունման համար անհրաժեշտ է խորհրդակցել նախագահի հետ և ընդմիջում է հայտարարել, ապա որոշ ժամանակ անց լրագրողները նախ` նկատել են նախագահի աշխատակազմի ղեկավար Անդրեյ Յարինին, ապա հայտնի է դարձել, որ Ռուսաստանի նախագահ Վլադիմիր Պուտինը անձամբ կգա Պետդումա:

Մինչ Պուտինի գալը պատգամավորներին բաժանվել էր Տերեշկովայի առաջարկը, որտեղ նա արդեն կոնկրետացրել էր այն՝ կանգ առնելով նախագահական նախորդ ժամկետները զրոյացնելու տարբերակի վրա: Այդ տարբերակը նախագահ Պուտինի սրտով է:

«Այդ տարբերակը հնարավոր կլիներ, սակայն մի պայմանով, եթե Սահմանադրական դատարանը պաշտոնական եզրակացություն տա, որ նման փոփոխությունը չի հակասում օրենքի հիմնական դրույթներին: Անհրաժեշտ կլինի, որ նման տարբերակին հավանություն տան նաև քաղաքացիները համառուսական քվեարկության ժամանակ»,– ասել է ՌԴ նախագահ Վլադիմիր Պուտինը:

Արդյունքում` նախագահական պաշտոնավարման ժամկետի զրոյացման առաջարկությունն ընդունվեց, որին կողմ արտահայտվեց 380 պատգամավոր: Դեմ արտահայտվեցին կոմունիստ պատգամավորները՝ 43 հոգի: Եվ եղավ 1-ը, որը ձեռնպահ մնաց: Դրան արձագանքել է Ռուսաստանի ընդդիմադիր գործիչ Ալեքսեյ Նավալնին իր թվիթերյան էջում:

«Ինչ հետաքրքիր է ստացվում: Գործող Սահմանադրությունը երաշխավորում է, որ ես հստակ կարող եմ մասնակցել նախագահական ընտրություններին, իսկ Պուտինը՝ հստակ ոչ: Պրակտիկայում ես ՄԻԵԴ-ի երկու դատ եմ շահել, բայց, փաստորեն, անկախ ամեն ինչից, չեմ կարող մասնակցել: Իսկ Պուտինը, որը ղեկավարել է երկիրը 20 տարի, անկախ ամեն ինչից, գնում է դեպի պաշտոնավարման առաջին շրջան»,- գրել է Ալեքսեյ Նավալնին:

Պետդումայի որոշումը՝ այն էլ նախագահական հավանությամբ, արդեն իսկ առանցքային նշանակություն ունի, սակայն մինչև այն կիրառության մեջ դնելը, ըստ իրավական ընթացակարգի, նախ` պետք է Սահմանադրական դատարանը իր որոշումը կայացնի՝ նշելով, թե նախագահական ժամկետի զրոյացման առաջարկը որքանով է համապատասխանում Սահմանադրությանը:

Եթե դա հաստատվի, ապա ապրիլի 22-ին հանրաքվե կանցկացվի և կորոշվի դրա ճակատագիրը: