Մասնավոր կառուցապատումների փաթեթները նախորդ տարվա համեմատ Գյումրիում կիսով չափ պակասել են

Համաճարակային իրավիճակից առաջ Գյումրիում հյուրատներ, վաճառասրահներ կառուցելու առաջարկություններով շատերն էին դիմել: Անհատները, տեղի ու արտերկրում ապրող ներդրողները հետաքրքված էին մասնավորապես պատմական կենտրոնի հին շենքերի վերականգնմամբ, բայց ամեն բան փոխեցին սահմանափակումները. ցանկությունները թեև ուժի մեջ են, բայց հնարավորությունները սպասեցնել են տալիս։

Անցած տարեվերջին բյուջեի ու համայնքային ծրագրերի կատարողականների ամփոփման ժամանակ քաղաքապետարանն ուներ կանխատեսումներ, որ 2020 թվականին, փողոցաշինության լայնածավալ նախագծերից բացի, Գյումրին ունենալու է մասնավոր կառուցապատման տեղաշարժ։

Առաջարկություններին  դեռևս ընթացք չի տրվում ոչ միայն փաստաթղթային անավարտ ձևակերպումների, այլև համավարակի պատճառով առաջ եկած տնտեսական խնդիրների պատճառով։

Նախորդ տարի Գյումրիում մասնավոր շինարարության 25 ծրագիր է հաստատվել համապատասխան շինթույլտվություններով։ Ներկայացված նախագծերի թիվն այս տարի  կիսով չափ նվազել է: Մասնավոր կառուցապատման 10 ծրագրի շինարարության մեկնարկի փաստաթղթեր են օրինականացվել, որոնք էլ  ոչ մեծ  ծավալի են։

«Կումայրի» պատմական միջուկում վերակառուցման մեկ ծրագիր է մեկնարկի սպասում։ Խոսքը Աբովյան փողոցի նախկին դատախազության շենքի մասին է։ Արգելոցի  տարածքում գտնվող պատմական շենքը նախկին   սեփականատիրոջից անցել է մեկ այլ ներդրողի։ Մինչև սեփականատիրոջ  և քաղաքապետարանի ձեռքում կլինեն  շինթույլտվության փաստաթղթերը, տարածքի բարեկարգումն արդեն սկսել են: Շենքը, առանց արտաքին տեսքի ձևափոխությունների, բայց ներքին ենթակառուցվածքների փոփոխություններով, դառնալու  է  սպասարկման կենտրոն։

Վերջին երեք տարիներին Գյումրիի պատմական հին շենքերի հանդեպ հետաքրքրությունները այս ոլորտից են։ Հին ճարտարապետությունից ու կենտրոնից հեռու ակտիվ աշխատանքի ևս մեկ շինհրապարակ է քաղաքի երբեմնի հյուրընկալ վայրերից մեկը՝  նախկին «Շիրակ» հյուրանոցը, որը ևս հավակնում է դառնալ մեծ կենտրոն։

2018թ. մեկնարկած կապիտալ նորոգումների զգալի մասն ավարտին է մոտենում։ Սա մարզի հաստատված այն  ներդրումային ծրագրերից մեկն է, որի համար  կառավարությունը 1 մլրդ դրամ է հատկացրել: Նախկին հյուրանոցի արտաքին տեսքից ու գունային առանձնահատկություններից միայն պահպանվել ու վերականգնվել է  արժեքավոր շինությունը՝ Ֆերդինանդ Առաքելյանի «Հյուրընկալություն» որմնաքանդակը։

Նախորդ տարվանից շարունակվող կառուցապատումների ավարտի ժամկետներից շեղումներ հավանաբար չեն լինի, քանի որ շինարարության ընթացքի դժվար ու աշխատատար մասն ավարտել են։

Քաղաքաշինության բաժնի համար խնդիր են մնում այն նախագծերը, որոնք ունեն շինթույլտվություններ, բայց աշխատանքների մեկնարկի ժամկետներն անորոշ են, իսկ այդպիսի փաթեթեները մեկ տասնյակի են հասնում։