Սկզբունքորեն դեմ եմ այդ փողոցային, ֆեյսբուքային արդարադատությանը. Ռուբեն Վարդազարյան

Այսօր «Հեռանկար»-ի ձևաչափում ԲԴԽ նախագահ Ռուբեն Վարդազարյանի հետ զրույցում Արամ Աբրահամյանը հետաքրքրվեց երկու դատավորների՝ Ռոբերտ Քոչարյանի գործով վճիռներ արձակած Ալեքսանդր Ազարյանի ու Դավիթ Գրիգորյանի նկատմամբ կարգապահական վարույթ ու քրեական հետապնդում իրականացնելու հարցով: Արդյո՞ք զուգադիպություն են հենց նրանց նկատմամբ իրականացվող այս գործընթացները, հետաքրքրվեց հաղորդավարը.

«Զուգադիպություն է, թե չէ, չեմ կարող պատասխանել, բայց ձեր բարձրացրած հարցերը քննության առարկա են դարձել. Դավիթ Գրիգորյանի մասով ԲԴԽ-ն թույլ է տվել քրեական հետապնդում իրականացնել, ինչ վերաբերում է դատավոր Ազարյանին, բացառապես իրավական դաշտում է քննվել, չենք փորձում քաղաքականացնել, նույնիսկ եթե փորձեր են արվում, կանխում ենք»,- պատասխանեց Վարդազարյանը:

Նա խոսեց նաև Վերաքննիչ դատարանի դատավոր Արսեն Նիկողոսյանի և դատավոր Ռոբերտ Պապոյանի նկատմամբ իրականացվող գործընթացների մասին:

«Արսեն Նիկողոսյան և Ռոբերտ Պապոյան, այն ինչ կատարվում է նրանց ընտանիքների շուրջ, պնդում եմ հայտարարությունը, որ արել եմ նախօրեին, խստորեն դատապարտում եմ ցանկացած միջնորդություն դատավորի անձնական կյանքին, այն սպառնալիքները, որ հնչեցվում են, դա ճանապարհ չէ, որով կարելի է ապահովել իրավական պետության կամ դատական իշխանության բնականոն ճանապարհը: Վերանանք երկու անձից, նուրբ թեմա է, որոշումները օրինական ուժի մեջ չեն մտել, հայտարարեց դատախազությունը, որ բողոքարկվելու է:

Իմ ասածը չի վերաբերում երկու գործին, հանրության ուշադրությունն եմ ուզում հրավիրել հանգամանքի վրա, որ մեծ քննադատության տեղիք են տալիս այն դատավորների որոշումները, որոնք հանրության ականջին հաճելի չեն, մեծ զանգվածներ չեն ցանկանում լսել նման որոշումները: ԲԴԽ-ն մեկ գործառույթ ունի՝ ապահովել դատավորների անկախությունը, սկզբունքորեն դեմ եմ այդ փողոցային, ֆեյսբուքային արդարադատությանը, դեմ եմ, որ արդարադատությունը պետք է տեղի ունենա այն հարթակներում, որտեղ ճղոցը, աղմուկը կամ հանրային դժգոհությունը ավելի շատ է»,- ասաց ԲԴԽ նախագահը:

Նա հավելեց, որ դատավորները պարտավոր են ղեկավարվել օրենքի գերակայության սկզբունքով:

«Սկզբունքորեն դեմ եմ, երբ դատավորին քննադատում են դատական ակտի համար՝ առանց այն կարդալու, տեսեք՝ ինչ է ստացվում՝ Արսեն Նիկողոսյանը հրապարակեց առանց դատական ակտը կարդալու, ամբողջ մամուլը ողողվեց սպառնալիքներով: Ես կողմնակից եմ առարկայական ու կառուցողական քննադատությանը»,- հավելեց Վարդազարյանը: