ԼՀԿ կդիմի ՍԴ, բայց ոչ ԲՀԿ-ի հետ միասին

Կմիանա՞ արդյոք ԼՀԿ-ն ԲՀԿ-ին՝ ՍԴ դիմելու հարցում. խորհրդարանում լրագրողներն այսօր դարձյալ հարցրել են «Լուսավոր Հայաստանի»՝ ասուլիսին մասնակցող անդամներին։

«Իշխանության բազմաթիվ կողմնակիցներ, էս հարցով զբաղվողներ պնդում են, որ իրենց քայլերը պայմանավորված են քաղաքական շահագրգռությամբ, և դա կապված է Սահմանադրական դատարանում քննվող մեկ գործի հետ, խոսքը գնում է ՀՀ երկրորդ նախագահի գործի մասին: Մենք մինչ այս պահը չենք արձագանքել որևէ նման պնդման, թողել ենք, որ իրավական գործընթացներն իրավական ճանապարհով ընթանան: Հենց այն օրը, երբ խորհրդարանը քննարկում էր սահմանադրական փոփոխությունների նախագիծը, ՍԴ-ն աշխատակարգային նիստ է արել և որոշում է ընդունել, որ երկրորդ նախագահին առնչվող գործն իրենք կքննեն հուլիսի 7-ին։ Կասեցված գործը հանել է և նշանակել է օր, հենց այն օրը, որը որ էստեղ քննարկում էին սահմանադրական փոփոխությունների նախագիծը: Դրանից հետո երկրորդ նախագահի փաստաբաններից հարցազրույցում ասել են, որ սա արվում է, որպեսզի միջամտություն, ազդեցություն լինի ՍԴ-ում քննվող գործի հետ կապված», – ասել է «Լուսավոր Հայաստան» խմբակցության ղեկավար Էդմոն Մարուքյանը:

«Լուսավոր Հայաստան»-ի ղեկավարը խոսել է նաև այն մասին, թե ի վերջո ինչ որոշման են հանգել, ինչպես ինքն է ասել՝ քննարկումների արդյունքում․

«Որպեսզի որևէ ձևով չմիջամտենք այս գործընթացին, այսինքն՝ որևէ ձևով չընկալվի, որ մենք նույնպես փորձում ենք միջամտել այս գործընթացին, որովհետև մենք դա թողել ենք մնա իրավական սահմաններում, իսկ գործը քննվում է գրավոր ընթացակարգով, իսկ գրավոր ընթացակարգով քննվող գործը շատ արագ որոշում պետք է ունենա, վեճի հետ կապված հարցերով Սահմանադրությունը տալիս է 3 ամիս ժամկետ՝ նաև ՍԴ մասին օրենքով: Օրենքի հետ կապված ընդհանրապես ժամկետ չկա, և պատգամավորները ցանկացած պահի կարող են դիմել: Մենք դիմումի վրա աշխատանքներն արդեն սկսել ենք, մեր դիմումի վրա կաշխատենք մինչև էդ պահը, կուժեղացրենք այն, բոլոր չորս կետերը կներառենք դրա մեջ, հենց էդ գործով նիստը տեղի կունենա և կավարտվի, ՍԴ կմուտքագրվի հակասահմանադրական ճանաչելու հետ կապված դիմումը: Այսինքն՝ մոտավորապես օրերի խնդիր է այստեղ», – ասել է Մարուքյանը՝ հավելելով, որ գործընթացը միանշանակ և աներկբա պահպանելու են միայն իրավական տիրույթում:  Հնարավորություն չեն տալու, որ հակամարտ կողմերից որևէ մեկն  ի շահ իրեն ծառայեցնի գործընթացը:

Լրագրողների այն հստակեցմանը, թե ճի՞շտ են հասկանում, որ չեն միանում ԲՀԿ-ի՝ ՍԴ դիմելու առաջարկին, Մարուքյանն այսպիսի պատասխան է տվել.

«Այո՛, դուք ճիշտ եք նկատել, մենք ՍԴ կդիմենք երկրոդ նախագահի գործի քննությունից հետո, իրավական առումով որևէ տարբերություն չկա»:

«Լուսավոր Հայաստան» խմբակցության ղեկավարն անդրադարձել է այն խոսակցություններին, ըստ որոնց՝ վեճ է եղել ՀՀ երկրորդ նախագահի գործի հետ կապված: Մարուքյանն ասել է, որ վեճ չի եղել, իրենց մոտեցումն է, որ գործողությունը մնա իրենց մասով զուլալ և որևէ կողմի շահի չծառայի: Իրենցից կհիասթափվեն կոնկրետ անձի պաշտպանությամբ զբաղվողները, կբավարարվեն նրանք, ում խնդիրը սահմանադրականության պահպանությունն է:

Մանրամասները՝ տեսանյութում։