Ովքե՞ր են ապագա իշխանությունն ու ընդդիմությունը` ըստ վարչապետի

Այսօր ԱԺ-ում վարչապետ Նիկոլ Փաշինյանն անդրադարձավ նաև «Բարգավաճ Հայաստան» խմբակցության բոյկոտի ու ԱԺ նիստերին չմասնակցելու մասին հարցին.

«Այսօր ասում եք` քաղաքական ուժը բոյկոտել է, իշխանությունը չի մտածում, քաղաքական ուժը ինքնաոչնչացվել է, որովհետև էս ամբիոնից հերքվում է մի բան, որ ՀՀ բոլոր քաղաքացիները գիտեն` առանց բացառության: Այսինքն՝ նորությո՞ւն է, որ ՀՀ-ում կան քաղաքական ուժեր, որ ընտրակաշառք են բաժանել, և ԲՀԿ-ն ընտրակաշառքով է ընտրվել, և երբ այս ամբիոնից ասում ես մի բան, որը բոլորը գիտեն, որ էդպես չի, դրանք ինքնաոչնչացվում են, և իրենք այստեղ չեն, որովհետև ոչ թե բոյկոտում են, այլ որովհետև չկան այլևս, ժողովրդի աչքերի մեջ նայող ու սուտ խոսող քաղաքական ուժը Հայաստանում քաղաքական գործունեություն չի ծավալելու, և չի կարելի ձեռ առնել ժողովրդին»,- հայտարարեց վարչապետը:

Նա խոսեց քաղաքական դաշտի վիճակի մասին, ներկայացրեց, թե ըստ իր պատկերացման՝ ինչ է տեղի ունենալու քաղաքական դաշտում:

«Այո, այսօր քաղաքական դաշտի բարեփոխում է տեղի ունենում, և նրանք, ովքեր կուլիսներից մարիոնետների նման կառավարվել են, այս քաղաքական դաշտում տեղ չեն ունենալու, ովքեր մարիոնետների են կառավարել, տեղ չեն ունենալու, և հաջորդ խորհրդարանում տեղ են ունենալու միայն այնպիսի քաղաքական ուժեր, որոնք աներկբայորեն պաշտպանում են 2018-ի ոչ բռնի թավշյա հեղափոխության արժեքները։ Այսօր էդ ուժերից էլ կան, որ մեզ քննադատում են, ամենամեծ քննադատելու տեղն իրենք ունեն, և ամենաշատն իրենց քննադատությունից ենք նեղվում, չենք նեղանում, նեղվում ենք, որովհետև լավ են անում, ապագան իրենցն է»,- հայտարարեց նա:

Անդրադարձավ հաճախ քննարկվող հարցերին, թե ովքեր են ապագա ընդդիմությունն ու իշխանությունը:

«Ապագա իշխանությունն էլ, ընդդիմությունն էլ այս դահլիճի այն ուժերն են, ովքեր ժողովրդին վերադարձրել են իշխանության, դրանից դուրս որևէ մեկն այս խորհրդարանում տեղ չի ունենալու, ես սա ասում եմ որպես ՀՀ քաղաքացի։ Ես ինձ իրավունք եմ վերապահում, որ մյուսներից ավելի լավ եմ ճանաչում մեր ժողովրդին, եթե այդպես չլիներ, չէինք կարողանա այս կազմով գտնվել այստեղ: Այն բոլորը, ովքեր մտածում են, որ ժողովրդին կոտրել են, խաբել են, իրենք սխալվեցին ու հրապարակային խոստովանեցին, հիմա էլ կորոնավիրուսը երկնային մանանայի նման թափվել է նրանց գլխին, ասում են` քաղաքական բացիլը վերակենդանանալու շանս է ստացել, իրենց թվում է։ Հիմա եկել սովից են խոսում, սոցիալական բունտից են խոսում, այ ժողովուրդ ջան, ախր դուք վախեցեք սոցիալական բունտից, որ եղավ սոցիալական բունտը, առաջին հերթին ձեր բենթլիներն ու դղյակներն են ավերվելու»,- ասաց Փաշինյանը:

Վարչապետը խոսեց հանրահավաքներն արգելելու վերաբերյալ հարցի մասին, քննադատություններին, որ հնչում են այս կապակցությամբ․

«Մի նրբություն չեն արձանագրել. էդ մեր հանրահավաքներն էլ են արգելված, էն ա տեսանք ձեր արած հանրահավաքը, կես միլիոն դոլար ծախսում եք, 200 հոգի մարդ եք կարում հավաքեք, կեսին էլ սպառնալով։ Գալիս առանց դիմակների կանգնում, ասում եք՝ չկա կորոնավիրուս, հիմա թևածում է, պիտի ասեն՝ իշխանությունը գցել ա ընդդիմության ջանը, որ չկարողանան հեղափոխություն անեն, հիմա էլ ամաչում են ասեն, որ կորոնավիրուսով հիվանդացել են: Բա հանրահավաք կանենք, բա որ մենք անե՞նք, դու եկել մեզ հանրահավաքով եք վախեցնո՞ւմ։ Եկեք փողով վախեցրեք, թալանելու կարողությամբ, կրթական ցենզով, վախենալու բան է, իրոք, եկել եք մեզ հանրահավաքով վախեցնում եք»: