Հայաստանում գրիպը դեռ մահաբեր չէ

Գրիպ եմ, լավ չեմ. արտահայտությունը հաստատ վերջին օրերին շատ եք լսել: Ու այն ասում են ոչ միայն Հայաստանում:

Աշխարհում թե քանի մարդ է հիմա գրիպով հիվանդ, դժվար է ասել, քանի որ վիճակագրություն չկա: Փոխարենը հայտնի է, թե հունվարի մեկի դրությամբ քանի մարդ է գրիպից մահացել: Ընդահուր առամամբ՝  մինչև հունվարի մեկը Եվրոպայում ու ԱՄՆ-ում 48 մահվան դեպք է գրանցվել:

Ֆրանսիա-2017 թվականի վերջին երկու ամիսների ընթացքում մահացել է 31 մարդ:

Իռլանդիա- 10-ից ավելի դեպք

Վաշինգտոն -գրիպից մահացել է 20 մարդ

Պետք է նշել, որ մահաբեր գրիպը սպառնում է ԱՄՆ-ի 36 նահանգի: Համաճարակի մասին են խոսում նաև Մեծ Բրիտանիայում, Շվեյցարիայում, Իսպանիայում, Նիդերլանդներում և Թուրքիայում։ Մասնագետները մտավախություն ունեն, որ այս համաճարակը կարող է լինել բարդագույնը վերջին 50 տարիների ընթացքում։

ShantNews-ը փորձել է պարզել, թե ինչ իրավիճակ է Հայաստանում: ՀՀ Առողջապահության նախարարության վտանգավոր և օդակաթիլային վարակների համաճարակաբանության բաժնի պետ Լիանա Թորոսյանի փոխանցած տվյալների համաձայն՝ Հայաստանում այսօր հոսպիտալներում գրիպով հիվանդ 360 մարդ կա:

«Գուցե ԱՄՆ-ում մենք գործ ունենք H3 -ի հետ, այստեղ գործ ունենք H1-ի հետ: Այնտեղ կարող է B-ն տարիքային ինչ-որ խմբերում է արձանագրվում, մեզ մոտ բոլոր տարիքային խմբերում է արձանագրվում: Մեզ մոտ այսօր հիմնականում Էրես վիրուսն է շրջանառվում, որոնց նկատմամբ խոցելի են երեխաները», -ասաց Թորոսյանը:

                                                                                   360 հիվանդի մեծ մասը երերխաներ են

Ըստ ԱՆ փոխանցած տվյալների՝ այսօր հոսպիտալում գտնվող գրիպով հիվանդների զգալի մասը  0-ից 2 տարեկաններ են: Հոսպիտալացվածների վիճակը, Առողջապահության նախարարության պատասխանատուի հավաստմամբ,  թեթև կամ միջին ծանրության է: Վերակենդանացման բաժանմունքներում շատ քչերն են, իսկ արհեստական շնչառական ապարատին որևէ մեկը միացված չէ:

«Խուճապի կարիք ամենևին չկա: Իրավիճակը համահունչ է բոլոր տարիների միևնույն ժամանակահատվածին: Ավելին, մենք անցյալ տարի 1.2 անգամ ավելի շատ դեպքեր են ունեցել», –ShantNews-ին հավաստիացրեց  ԱՆ վտանգավոր և օդակաթիլային վարակների համաճարակաբանության բաժնի պետը՝ ամեն դեպքում չհերքելով, որ  Հայաստանում էլ հանդիպում են գրիպի այն տեսակները, որոնք այս օրերին Եվրոպայում են, այսպես ասած, շրջանառվում: Հարցին, գուցե Եվրոպայում արդեն մուտացվա՞ծ տեսակի հետ գործ ունեն, Լիանա Թորոսյանը պատասխանեց.

«Առողջապահության համաշխարհային կազմակերպության կողմից որևէ մուտանտ տեսակի առումով որևէ պաշտոնական տեղեկատվություն առկա չէ և չի տրամադրվել, վերջինիս կողմից որևէ տեղեկատվություն չի տրամադրվել որևէ երկրի»:

ԱՆ հերթական անգամ հիշեցրել է, թե ինչ պետք անել գրիպի վարակից հնարավորինս խուսափելու համար՝ չշփվել հիվանդ անձանց հետ, հաճախակի օդափոխել սենյակը, որքան հնարավոր է հաճախ լվանալ ձեռքերը: Օգտագործել հատկապես այնպիսի սննդատեսակներ, որոնք հարուստ են վիտամին  C-ով, ինքաբուժմամբ չզբաղվել՝ նպաստելով հիվանդության խորացմանը: