Ջաջուռ և Շիրակ գյուղերի անօթևան ընտանիքները ԲԳՎ-ներից հրաժարվելու դիմում են ներկայացրել

Ջաջուռի 21 անօթևան ընտանիքներից համարյա բոլորը տարիների ընթացքում կարողացել են տնակները քարապատել, բարեկարգել, բնակության համար քիչ թե շատ պայմաններ ստեղծել։ Այդպիսի տնակում է 9 անձից բաղկացած Ամիրխանյանների ընտանիքն ապրում։ Քարապատ տնակն ու ներքին հարդարումը, սակայն, չի փոխում անօթևանի կարգավիճակը։ 6 ամիս առաջ նրանք համաձայնել են բնակարանի գնման վկայագիր վերցնել, հիմա 6 ամիս անց դժգոհ են իրենց որոշումից՝ վկայագրի արժեքով 9 անձի համար տուն չեն կարողացել գտնել:

Ամիրխանյանների հարևան Երանոսյաններն էլ ԲԳՎ են ստացել, թեև, վկայագրից բացի, ընտրության մյուս տարբերակ էլ ունեին՝ բնակարանի կառուցում։ Բայց գյուղի 21 անօթևան ընտանիքից միայն մեկն է համաձայնել բնակարան կառուցելու տարբերակին։ Հիմա վկայագրի իրացման ժամկետը լրանում է, իսկ 7 ընտանիք բնակարան չի գնել։ Դիմում են գրել մարզպետին, որով հրաժարվում են ԲԳՎ-ից։ Պատճառներն էլ են նշել  դիմումում՝ նախ առաջարկվող պայմաններին լավ չեն ծանոթացել, հետո վկայագրի գումարին համարժեք տուն չեն գտել ու տնակը ապամոնտաժել չեն ուզում։

Ջաջուռի վարչական ղեկավարն այսպես բացատրեց իրավիճակը՝ ստացվում է, որ անօթևան ընտանիքներն իրենց հաշվարկներում սխալվել են, թե կարող էին գյուղի ունեցած տնակը չապամոնտաժել, միաժամանակ, տուն գնել։ Վարչական ղեկավարը հակառակ կողմն էլ է ներկայացնում՝ 20 ընտանիքից 13-ը վկայագրով տուն գնել է։

Գրիգորյանները 13 անօթևան ընտանիքներից մեկն են, որոնք վկայագրով 6 ամսում կարողացել են տուն գնել, տնակն էլ  ապամոնտաժել են, տարածքն են մաքրելու։ 3 սենյականոց բնակարան են կորցրել, նույնքան էլ գնել են, բայց ոչ գյուղում ու վկայագրի արժեքին գումար են ավելացրել:

Նույն պատմությունն է նաև հարևան Շիրակ գյուղում, որտեղ 30 անօթևան ընտանիք կա, 27-ը համաձայնել է վկայագիր վերցնել, կեսն արդեն բնակարաններ գտել ու տեղավորվել է. մյուսները ջաջուռցի 7 ընտանիքների նման հայտնվել են անելանելի վիճակում։

13 անձով Նադոյանները 46 քառակուսի մետր տարածքում են ապրում: Բազմանդամ ընտանիքը երկու ձեռքով կողմ է նեղ տնակներից  ազատվելուն և բնակարանում ապրելուն, բայց 5 սենյակի համար հատկացված ԲԳՎ-ի արժեքին համապատասխան տուն չեն գտնում։ 5 սենյականոցը փոխարինել 3-ով ծրագրի պայմանները թույլ չեն տալիս։

Պայմաններն ու չափորոշիչները սխալ հասկանալու պատճառով է, որ  մերժել են բնակարան կառուցելու առաջարկը:

Բողոքող ընտանիքների պահանջը՝ վկայագրի ժամկետները երկարացնելու մասին, Քաղաքաշինության վարչությունը ներկայացրել է Քաղաքաշինության կոմիտե ու արդեն ստացել է պատասխան՝ վկայագրերի ժամկետը երկարացվում է մինչև նոյեմբերի 1-ը: Անօթևան ընտանիքներին ևս մեկ հնարավորություն է տրվում շարունակել բնակարան փնտրել:

Այս ժամկետը լրանալուց հետո կամ այս տարբերակից հրաժարվելու դեպքում ընտանիքները կորցնում են այս ծրագրի շահառուի կարգավիճակը, բայց կմնան հերթացուցակում, սակայն անորոշ ժամանակով: