Արթիկում հեղեղների մուտքը քաղաք կանխելու համար 2 հեղեղատարները կմաքրվեն ու պատնեշներ կկառուցվեն

Արթիկի Մողրովենց ու Բմբուլենց ձորեր կոչվող հեղեղատարներն անցնում են հենց քաղաքի միջով, որոնք տարիների ընթացքում վերածվել են չգործող տուֆի հանքերի արտադրական թափոնների կուտակման տարածքների։ Քարակույտեր հիմա էլ կան։ 4 տարի առաջ ուժեղ հեղեղի հոսքի բերվածքները դեռ լիարժեք մաքրված չեն։ Թափոնները հետևանք են ժամանակին հանքերի անփույթ շահագործման, ասում է քաղաքապետի խորհրդականը և ավելացնում՝ այս ուղղությամբ տարիներով վերահսկողություն չի եղել. հետևանքները մեծ ավերածություններն էին, որ տեղի ունեցան 2016 թվականին։

«Առաջին փուլով աշխատանքները կատարվեցին և դրա համար օգտագործվեց 149 մլն դրամ, երկրորդ փուլն այդպես էլ չեղավ, չկառուցվեցին դամբաները, հենապատերի խնդիրը չլուծվեց, ֆինանսավորում չեղավ ու այդպես էլ բնականաբար աշխատանքները չկատարվեցին»,- SHANTNEWS.am-ի հետ զրույցում ասել է Արթիկի քաղաքապետի խորհրդական Գևորգ Փթուկյանը։

90-ականներից հետո հանքերը չեն աշխատել, սակայն թափոնների կուտակումը շարունակվել է։ Համայնքային իշխանությունները հսկայածավալ աշխատանքներ չեն արել, ձորերի մաքրումը եղել է մասնակի։ Վիճակն ավելի են բարդացրել հարևանությամբ ապրող բնակիչները, որոնք կառուցապատումներ են արել, նեղացրել հուները, իսկ շատերի համար ձորակներն աղբը դատարկելու հարմար տարածքներ են դարձել։

Մարդկային գործոնի վատ հետևանքները տեղումներից հետո մշտական են: 2 ձորերի մաքրման աշխատանքները 2016 թվականի հեղեղումներից հետո էլ լիարժեք չկատարվեցին։ Հատկացված գումարի մի մասը, որը նախատեսված էր առաջին փուլի աշխատանքների համար, շինարարը ստացել է: Դրա շրջանակներում հեղեղատարները մաքրվել են մասնակի, ու գործը պատնեշների կառուցմանը չի հասել։

Պատնեշները կառուցված չեն, հուներն էլ՝ կիսատ մաքրված։ Հարևան տները դարձյալ ապահովագրված չեն հեղեղումներից։ Դավթյանների տունը Բմբուլենց ձորի հենց բերանին է կառուցված: 2016 թվականի ուժեղ հեղեղից տան պարիսպները փլվել էին, իսկ տունը հայտնվել ջրի մեջ։ Այժմ էլ վնասումներ լինում են ուժեղ անձրևների ժամանակ։ Ձորի մոտ 300 մետրանոց հատվածում միայն  շինարարները կառուցել են միակողմանի բետոնյա պատնեշ, որն ընդամենը փողոցն է պաշտպանում ջրածածկումներից, փոխարենը վտանգում է հարևան տները։

Եվս մեկ տարի վիճակը չի փոխվի երկու ձորերում էլ։ 2016 թվականից անավարտ մնացած աշխատանքները այլ ծրագրով են շարունակվելու։ Հեղեղատարների մաքրման ու պատնեշների կառուցման համար քաղաքապետարանի ներկայացրած  ծրագիրը բնապահպանական է և դրամաշնորհային, նախագծային փաթեթը հաստատվել է։ Այն 1 մլն 432 հազար ամերիկյան դոլար արժողության ծրագիր է, որը փուլային տարբերակով է լինելու։

«Եկող տարի մենք կսկսենք շինաշխատանքները, և մինչև դեկտեմբեր ամիսը կունենանք կառուցված հողապատնեշներ, հեղեղատարներ, մաքրված ու ռեկուլտիվացիայի ենթարկված 40 հա տարածք»,- ասել է Գևորգ Փթուկյանը։

Քարհանքերից բերված թափոններից ձորերի մաքրման այս ծրագիրը էական ու կարևոր նշանակության է նաև բնապահպանական առումով։ Հողերը վերամշակելուց հետո տեղում անտառներ են հիմնվելու, որոնք հեղեղումների դեմ լավագույն պաշտպանությունն են։ Ձորերի բարձրադիր հատվածներում նախատեսվում է կառուցել նաև իրազեկման կայան, կտեղադրվեն հատուկ սարքեր, որոնք կհավաքեն մթնոլորտային երևույթների մասին տվյալներ ու կփոխանցվեն հիդրոմետ ծառայությանը։