Գյումրիի համայնքային ենթակայության թանգարաններն ու գրադարանները դեռ չեն վերսկսել աշխատանքը

Պարետի որոշմամբ թույլատրվել է գրադարանների և թանգարանների աշխատանքի վերսկսումը հակահամաճարակային կանոնների պահպանմամբ: Որոշումը բոլորին է վերաբերում, բայց վերաբացման ժամկետները տարբեր են՝ կախված թանգարանների ու գրադարանների ենթակայությունից: Գյումրիում մարզպետարանի և ԿԳՍՄ նախարարության ենթակայության կառույցները արդեն երկրորդ օրն է՝ ընդունում են այցելուներին, իսկ համայնքային ենթակայության թանգարաններում դեռ զբաղված են հակահամաճարակային կանոնների ապահովմամբ:

Շիրակի մարզային գրադարանի գրաբուսը կամ շարժական գրադարանը, որ մարզի տարբեր բնակավայրերին գրքերի հասանելիություն էր ապահովում, հնգամսյա պարապուրդից հետո այլ կիրառություն է ստացել: Այստեղ հիմա գրադարան վերադարձվող գրքերն են պահեստավորում: 5 ամիս դրանք ընթերցողների ձեռքում են եղել, իսկ գիրքը վարակի տարածման աղբյուր նաև կարող է դառնալ: Գրադարանների աշխատանքի վերսկսման կարևոր պայմաններից մեկն էլ դա է՝ տարածք ապահովել վերադարձվող գրքերի համար:

«Առանձնացրել ենք հանձնվող գրքերը սպասարկվող գրքերից, որովհետև  որոշման մեջ կա աշխատանքային պայմանների մի կետ, որտեղ որ հանձնվող գրքերը պետք է մեկ օր առանց սպասարկելու պահեստային վիճակում մնան: Ընտրել ենք մեր գրաբուսը: Այստեղ գիրքը կարանտինային ժամանակը կանցկացնի, հետո կգնա գրադարակներ: Ապահովության համար մի երկու օր էլ ավելի կթողնենք, եթե այդ գրքի պահանջարկ չլինի»,-Shantnews-ի հետ զրույցում ասաց Շիրակի մարզային գրադարանի տնօրեն Գևորգ Ամիրյանը:

Իսկ գրադարանի ներսում արդեն պարտադիր ջերմաչափումով ու հատուկ գծանշումներով, միմյանցից հեռավորություն պահպանելով են աշխատանքը կազմակերպել: Գծանշումները այցելուին բակից մինչև մուտք ուղեկցում են Գյումրիի ժողովրդական ճարտարապետության ու քաղաքային կենցաղի թանգարան: Բակում գծանշումները սպասողների համար են, ներսում՝ իրարից համապատասխան հեռավորություն պահելու: Թանգարանում միաժամանակ առավելագույնը կարող է 10 մարդ գտնվել:

«Երեկ ունեցել ենք 28 այցելու: Եվ ընտանիքներով, և անհատ քաղաքացիներ են գալիս: Մեծ  խմբերի համար հատուկ կանոններ կան, որ  չպետք է գերազանցի 10 հոգի: 10 հոգի թանգարանում լինելու ժամանակ պետք է անպայման սպասեն ներքին բակում կամ դրսի բակում: Կարծում եմ, որ մեծ հոսք կունենանք  օգոստոսի վերջին շաբաթը և սեպտեմբեր, հոկտեմբեր ամիսներին: Չեմ կարծում՝ այցելուները իմանան, որ թանգարանը բաց է և չգան: Անցյալ տարի մեծ թվով այցելուներ ենք ունեցել: Այդ թիվը նաև հայաստանաբնակները համալրեցին: Միայն տուրիստներով չէ, որ  22 հազար 111 այցելու ենք ունեցել»,- Shanatnews-ին ասաց Գյումրիի ժողովրդական ճարտարապետության և քաղաքային կենցաղի թանգարանի տնօրենի պաշտոնակատար Սոնա Հարությունյանը:

Վերաբացման առաջին երկու օրերին թանգարանում դեռ կուտակումներ չեն առաջացել: Քաղաքի հյուրերը շաբաթ -կիրակի օրերին են շատ: Վերաբացումից հետո թանգարան այցելում են հիմնականում ընտանիքներով, կոլեկտիվ այցելություններից առայժմ խուսափում են:

Շիրազի, Իսահակյանի ու Մհեր Մկրտչյանի թանգարանները համայնքապատկան են, ոչ մեկը դեռ աշխատանքը չի սկսել: Վերաբացմանը պատրաստ չեն, դեռ պետք է թանգարաններն ախտահանեն, ջերմաչափեր ու դիմակներ գնեն:

Համայնքապատկան թանգարանների ֆինանսավորման եղանակը թույլ չի տալիս պահուստային ֆոնդ ունենալ: Հիմա ջերմաչափ ու ալկոգել գնելու համար քաղաքապետարանը պետք է հատկացումներ կատարի: Յուրաքանչյուր թանգարանին հասանելիք գումարի չափը հստակեցվել է:

«Չաշխատելու նպատակը միայն այն է, որ պետք է ձեռք բերենք ջերմաչափեր, ախտահանիչներ, որ կարողանանք այցելուներին ընդունել: 30 հազար դրամ է հատկացվել յուրաքանչյուր թանգարանին, ինչքան գիտեմ: Երևի երեքշաբթի օրվանից թանգարանը պատրաստ կլինի այցելուներին ընդունելու համար»,- Shantnews-ին ասաց Գյումրիի Ավ. Իսահակյանի տուն-թանգարանի տնօրեն Կարինե Վիրաբյանը:

Գյումրիի համայնքապատկան թանգարանները աշխատանքը կվերսկսեն երեքշաբթի: Մինչև սեպտեմբերի վերջ դեռ ներքին տուրիզմի ակտիվությունը, կանխատեսում են, որ չի նվազի: Անցած երկու ամիսներին, երբ թանգարանները դեռ հարկադիր պարապուրդում էին, տարբեր զբոսաշրջային ընկերություններ անհատների ու խմբերով այցելությունների ցանկություն էին հայտնել: Հիմա պատրաստ են նրանց ընդունել։