Նախագծային ու ավարտի ժամկետների փոփոխություններով վերսկսվել է «Հյուսիս-հարավ» մայրուղու Թալին-Գյումրի հատվածի շինարարությունը

Համավարակի սահմանափակումներն ավելի քան 60 տոկոսով հետաձգել են   «Հյուսիս-հարավ» մայրուղու Թալին-Գյումրիի ճանապարհի կառուցման  աշխատանքները։ Չինաստանից «Սինոհիդրո Քորփորեյշն» ընկերության մասնագետների վերադարձը, որը նախատեսված էր գարնանը, օդային ճանապարհների արգելքի պատճառով ձգվեց մինչև օգոստոս։ 6 ամիսների դադարը, բուն շինաշխատանքներից բացի, նաև ընկերության ու պատվիրատուի միջև շատ հարցերի քննարկումներ է հետաձգել: Ընկերության ներկայացուցչի, խոսքը վերաբերում է նախագծային փաթեթի քննարկումներին, որոնք անցած տարվանից էին կիսատ մնացել: Կողմերը չէին հասցրել վերջնական համաձայնության գալ Թալին-Գյումրի 46 կմ երկարության ճանապարհահատվածի բետոնապատման հարցի շուրջ, որը  նախագծային  փոփոխություն էր պահանջում։

 «Նախագծային փոփոխությունը վերաբերում է հետևյալին՝ մենք նախապես պայմանավորվել էինք, որ ճանապարհը բետոնե շերտով ենք անելու, հիմա փոխում ենք, ասֆալտապատ է լինելու: Նախկինում այդպես էինք որոշել միջազգային նորմերին համապատասխանեցնելու համար, բայց այն ձեր կլիմային չի դիմանա, ավելի շուտ կքայքայվի ու սպասարկումը կբարդանա, ինչու, որովհետև ավելի հեշտ է ասֆալտը վերականգնել, քան բետոնե շերտը»,- SHANTNEWS.am-ի հետ զրույցում ասել է «Սինոհիդրո Քորփորեյշն» ընկերության ծրագրի պատասխանատու Լու Կաո Կուեյխուա։

Թալին-Լանջիկ հատվածում անցած տարի շինարարը հասցրել էր նաև կամուրջ կառուցել, հետո բետոնապատել մոտ մեկուկես կմ ճանապարհ: Ըստ շինընկերության ներկայացուցչի՝ համոզվել են, որ արագընթաց մայրուղու կառուցման միջազգային փորձը Շիրակի մարզում կիրառելն  նպատակահարմար չէ: Բետոնե շերտի ուսումնասիրության արդյունքում տրվել է եզրակացություն, որի հիման վրա բետոնը ասֆալտով փոխարինելու որոշում է կայացվել։

Նախագծային փոփոխություններից բացի, փոխվում են շինաշխատանքների ավարտի ժամկետները: Ի դեպ, ընկերությունը դեռ անցած տարվա հունիսին պետք է շահագործման հանձնած լիներ Թալին-Գյումրի 46 կմ ճանապարհահատվածը: Հիմա նոր ժամկետների մասին են  խոսում:

 «Հիմա կարող ենք ասել՝ աշխատանքներն անում ենք 2 պրոյեկտով․ Թալին-Լանջիկը ավարտում ենք հուլիսի 14-ին, իսկ Լանջիկ-Գյումրին՝ 2022-ի դեկտեմբերի 31-ին»,- նշեց «Սինոհիդրո Քորփորեյշն» ընկերության ծրագրի պատասխանատուն։

Նոր ժամկետներով ու նոր նախագծով շինաշխատանքներում ընկերությունը չի բացառում, որ էլի փոփոխություններ կլինեն։ Առայժմ աշխատանքները ընթանում են ճանապարհի միայն մեկ հատվածում, երբ սկսեն ասֆալտապատումը և հնարավոր լինի մայրուղու այդ հատվածում երթևեկություն ապահովել, աշխատանքները կտեղափոխեն մյուս գոտի։ Չինական ընկերությունը նաև ասֆալտի գործարան է հավաքել Մարալիկում, տարբեր մշակումներով ու տեխնոլոգիաներով ասֆալտն արտադրվելու է տեղում, որտեղից տեղափոխումը շինհրապարակ հեշտանալու է։ Հավաքովի  ասֆալտի գործարանը 1 ժամում մինչև 300 տոննա ասֆալտ է արտադրում: Սա էլ Թալին-Գյումրիի ճանապարհի ասֆալտապատման աշխատանքների ընթացքը կարագացնի։