Գյումրի-Արմավիր հանրապետական նշանակության ճանապարհի հիմնանորոգումը երկամսյա դադարից հետո վերսկսվել է

Գյումրի-Արմավիր հանրապետական նշանակության 30 կմ ճանապարհից 8 կմ-ն է հիմնանորոգվում։ Շինարարության սկզբնական փուլում, արտաքին շերտը քանդելու ընթացքում, ի հայտ եկան այն թերությունները, որոնք տարիներով պատճառ են եղել ճանապարհի քայքայման, իսկ հիմնային նորոգումներ երբևէ  չեն արվել։ Պարզվում է ճանապարհը գրունտային ամուր հիմք չի ունեցել, խճային լիցքով հարթեցումը այս դեպքում անարդյունք կլիներ՝ գրունտային նստվածքներն ավելի խորքային էին։

Աշխատանքային դադարի պատճառները շինարարը ներկայացրել էր պատվիրատուին ու նախագծողին: Պատվիրատուն՝ տարածքային կառավարման և ենթակառուցվածքների նախարարությունը, ճանապարհի լրացուցիչ ուսումնասիրություն կատարելու, նախագիծը վերանայելու հանձնարարություն էր տվել նախագծողին: Ըստ նախարարության պատասխանատուի, նախագծողը պնդել է, որ իր  ներկայացրած նախագիծը անթերի է, միայն թե շինարարի հայտնաբերած գրունտային խնդիրները կարգավորելու համար  քարային լիցքերի ծավալներն է պետք կրկնապատկել։ Ընդամենը սա է եղել նախագծային փոփոխությունը։

«Շինարարը պնդում է, որ տվյալ կոնստրուկցիան, որը նախատեսված է, թույլ է նման ճանապարհի համար, իսկ նախագծողը պնդում է հակառակը, հիմա նախարարությանը այլ տարբերակ չի մնում, մենք պիտի նախագծողի տարբերակը ընտրեինք, որ շինարարը կարողանար աշխատանքները շարունակել»,- SHANTNEWS.am-ի հետ զրույցում ասել է ՀՀ տարածքային կառավարման և ենթակառուցվածքների նախարարի խորհրդական՝ Գոռ Ավետիսյանը:

Նախագծում կատարված թեթև փոփոխություններով հիմա շինարարը շարունակում է նորոգումները։ Նստվածքային հիմքերը լցնում է քարերով, խճով, ինչը նոր ու ամուր հիմքի կառուցելու գործին օգնում է։ Իսկ թե ինչ խորությամբ են փորվելու 8 կմ ճանապարհի նստվածքային հիմքերը, կախված է տվյալ հատվածների վնասվածության աստիճանից՝ մինչև 2 մետր խորության խրամուղիների անհրաժեշտություն կա։

Ճանապարհի գրունտային հատվածներում հիմնային լիցքերի աշխատանքներն արդեն ավարտվում են, որից հետո խճապատում են անելու, նոր միայն հերթը կհասնի ասֆալտին, որը երկշերտ է լինելու։ Շինարարի համար հիմնային  աշխատանքներն են ժամանակատար, դրանք որակով ու ճիշտ կատարելու պարագայում  հետագա սպասարկումը կրկնակի աշխատանքներ չի ստեղծի հանրապետական նշանակության ճանապարհի վրա։

Այս ճանապարհի նորոգման որակի ու երկարակեցության երաշխիքային պահանջներն ավելի խիստ են, քանի որ այն համարվում է այլընտրանքային ճանապարհ Երևան-Գյումրի միջպետականին, բեռնատարների հիմնական երթևեկությունն այս ճանապարհով է: Աշխատանքներին զուգահեռ բեռնատարների երթևեկությունը շարունակվում է։ Շինարարը երթևեկությունը շրջանցիկ կազմակերպելու առաջարկ է ներկայացրել ճանապարհային ոստիկանությանը։

Երթևեկությունը տվյալ հատվածում դադարեցնելու դեպքում շինարարը վստահեցնում է՝ ասֆալտապատման տեմպերը  կարագանան, ընդամենը 15 օրում ասֆալտապատումը հնարավոր կլինի ավարտել։