Շուշիի պետական թատրոնը շարունակում է Գյումրիում ներկայացումներ խաղալ փոքրիկ հանդիսատեսի համար

Շուշիի Մկրտիչ Խանդամիրյանի անվան պետական թատրոնը դեռ Գյումրիում է, շարունակում է ոչ ֆորմալ ձևաչափով տիկնիկային ներկայացումները փոքրիկ հանդիսատեսի համար: Հերթական ներկայացումը կազմակերպել են ԿԱԶԱ հիմնադրամի Գյումրիի սոցիալ-ուսուցողական և զարգացման կենտրոնում։ Խաղացել են համալրված դերասանական կազմով՝ պատերազմից վերադարձել է դերասաններից Արմեն Գաբրիելյանը:

«Շատ ուրախ էի, որ մեր ներկայացումները խաղացել են իմ գործընկերները, իմ տիկնիկները խաղացել են, ուրախություն պարգևել հանդիսատեսին: Շատ հաճելի է, որ պատերազմից հետո վերադառնում ես ու տեսնում վիդեոռեպորտաժներ, հոդվածներ քո թատրոնի մասին, մենք պարտավոր ենք ուժեղ լինել»,- SHANTNEWS.am-ի հետ զրույցում ասել է Շուշիի պետական թատրոնի դերասան Արմեն Գաբրիելյանը:

Դերասանը մեր թղթակցին պատմել է, որ Արցախի տարբեր հատվածներում են մարտական գործողությունների մասնակցել, պատերազմի օրերին փորձել են անգամ ինչ-որ կերպ թատրոնից դուրս բերել ներկայացումների դեկորները, տիկնիկները, որոնք իրենք իրենց ձեռքով են ստեղծել:

«Առաջին օրվանից մենք մտածում էինք, թե ինչպես փրկենք մեր թատրոնի թանկ բարեկամներին: Դրանք գուցե անշունչ առարկաներ են, բայց մեզ համար շնչավոր էակներ են, ցավոք, ոչինչ չկարողացանք փրկել»,- ասում է Արմենը:

Շուշիի թատերական գործիչները սպասում են Արցախ վերադարձին, բերդաքաղաք Շուշիում չէ, բայց Ստեփանակերտում մշակույթը ապրեցնելու հեռանկարներն են արդեն ուրվագծում:

«Ես հավատում եմ, որ մեր թատրոնի ճակատագիրը ճիշտ կորոշվի, ճիշտ կերպ լուծում կգտնվի, գուցե մենք շարունակենք աշխատել Ստեփանակերտում, սրանք հարցեր են, որոնց շուրջ  կրթության, մշակույթի նախարարությունն արդեն փոխհամաձայնություններ ունի»,- SHANTNEWS.am-ին ասել է Շուշիի՝ Մկրտիչ Խանդամիրյանի անվան պետական թատրոնի տնօրեն Աշխեն Հարությունյանը:

Շուշիի պետական թատրոնը պատերազմի օրերին անգամ արցախցի փոքրիկ հանդիսատեսին չմոռացավ։ Թատրոնը Գյումրիում էլ է իր արցախցի հանդիսատեսի հետ:

Տիկնիկային բեմի փոխարեն փոքր դահլիճ, իսկ ներկայացման գովազդային պաստառի փոխարեն սովորական գրատախտակ են օգտագործել տիկնիկային ներկայացումն իրականություն դարձնելու համար:

Մի քիչ անգույն է, բայց թատրոնի հավատարիմ բարեկամ ժպտադեմ Դիանան, գունավոր շտրիխներ է ավելացրել, որ փոքրիկների սիրելի  հեքիաթի ցուցադրական պաստառը հենց մուտքից երեխաների աչքին գունավոր ու պայծառ երևա: Հայտնի «Երեք խոզուկները» դերասանները խաղացին երկու՝ Արցախի և Գյումրվա բարբառներով։