Մասիսի քաղաքապետը մեղադրվում է խուլիգանության մեջ

Մասիսի քաղաքապետ Դավիթ Համբարձումյանին երկրորդ մեղադրանքն է առաջադրվել: Այս մասին SHANTNEWS.am-ին փոխանցեց քաղաքապետի պաշտպաններից Էրիկ Ալեքսանյանը:

Դավիթ Համբարձումյանը  մեղադրվում է  խուլիգանություն համար, որը զուգորդվել է անձի առողջությանը միջին ծանրության վնաս պատճառելով: Համբարձումյանին մեղադրանք առաջադրվել է ապրիլի 22-ին Հայանիստ-Հովտաշատ գյուղերի խաչմերուկում տեղի ունեցած միջադեպի գործով:

«Միանշանակ, Դավիթ Համբարձումյանը որևէ առնչություն չունի մեղսագրվող արարքի հետ՝ թե՛ նոր առաջադրված մեղադրանքի, թե նախկինում այդ մեղադրանքը, որն արդեն իսկ առաջադրված է եղել»,- ասել է փաստաբանը:

ՀՀ քննչական կոմիտեից հայտնում են. 2018 թվականի ապրիլի 22-ին «Մասիս» բժշկական կենտրոնից ահազանգ էր ստացվել , որ աջ սրունքի փափուկ հյուսվածքներ թափանցող հրազենային վերք ախտորոշմամբ իրենց մոտ է տեղափոխվել Էջմիածին քաղաքի բնակիչը՝ ծնված 21.03.1958թ.։

Ձեռնարկված միջոցառումների արդյունքում պարզվել էր, որ 60-ամյա բնակիչը հրազենային վնասվածքն ստացել է Արարատի մարզի Հայանիստ-Հովտաշատ գյուղերի խաչմերուկի մոտ տեղի ունեցած միջադեպի ժամանակ, որտեղ մի շարք բնակիչներ մասնակցել են բողոքի ակցիային։

Դեպքի առթիվ ՀՀ ՔԿ Արարատի մարզային քննչական վարչությունում ապրիլի 25-ին հարուցվել է քրեական գործ՝ ՀՀ քրեական օրենսգրքի 258-րդ հոդվածի 4-րդ մասով, որով հետագա նախաքննությունը շարունակվել է ՀՀ ՔԿ ԶՔԳՎ ՀԿԳ քննության վարչությունում։ Մշակվել է քննչական պլան, և ձեռնարկվել անհրաժեշտ մեծածավալ քննչական գործողություններ՝ վիճաբանությանը մասնակից անձանց շրջանակը պարզելու, նրանցից յուրաքանչյուրի գործողություններն անհատականացնելու ուղղությամբ, հարցաքննվել տարբեր անձինք։

Նախնական քննության տվյալներով՝ Արարատի մարզի մի շարք բնակիչներ ապրիլի 22-ին երթով շարժվել են դեպի Երևան՝ մասնակցելու ժամը 19։00-ին Հանրապետության հրապարակում նախատեսված հանրահավաքին։ Երթն արգելելու համար ժամը 16:00-17:00-ի սահմաններում մի խումբ անձինք՝ առանց հաշվառման համարանիշերի ավտոմեքենաներով, Արարատի մարզի Հայանիստ-Հովտաշատ գյուղերի խաչմերուկում փակել են դեպի Երևան տանող ճանապարհը, բռնություն գործադրել երթի մասնակիցների նկատմամբ, կիրառել հրազեն։ 4 անձ ճանաչվել է տուժող։

Հիշեցնենք, որ Էրեբունի վարչական շրջանում տեղի ունեցած անկարգությունների դեպքի առթիվ էլ ՀՀ քննչական կոմիտեի Երևան քաղաքի քննչական վարչության վարույթում քննվող քրեական գործով  մեղադրանք է առաջադրվել 5 անձի, այդ թվում՝ Մասիսի քաղաքապետ Դավիթ Համբարձումյանին և փոխքաղաքապետ Կարեն Օհանյանին: Մասիսի քաղաքապետ Դավիթ Համբարձումյանի  նկատմամբ  միջնորդություն է ներկայացվել դատարան՝ որպես խափանման միջոց կալանավորումը ընտրելու վերաբերյալ: Ավելի ուշ, դատարանը մերժել է միջնորդությունն ու որպես խափանման միջոց է ընտրվել՝ չհեռանալու մասին ստորագրությունը:

Ավելի վաղ SHANTNEWS.am-ն հայտնել էր, որ քրեական գործի նախաքննության օրինականության նկատմամբ հսկողություն իրականացնող դատախազը դադարեցրել է Մասիսի քաղաքապետ Դավիթ Համբարձումյանի և նրա տեղակալ Կարեն Օհանյանի լիազորությունները: