«Հայրենիքի փրկության խորհրդի» վարչապետի թեկնածուն ներկայացրել է իր ծրագրած քայլերի հաջորդականությունը

Ազատության հրապարակում հանրահավաք են անցկացրել վարչապետ Նիկոլ Փաշինյանի հրաժարականը պահանջող ընդդիմադիր ուժերը: Նրանց միացել են նաև մտավորականներ:Հանրահավաքը սկսել է Դադիվանքի վանահայր Տեր Հովհաննես քահանա Հովհաննիսյանը, նա առաջարկել է աղոթքով սկսել հանրահավաքը:

«Փրկության շարժում» կոչվող նախաձեռնության հանրահավաքի կազմակերպիչները կարծում են, որ պետք է ձևավորվի նոր իշխանություն, որը հնարավորություն կունենա վարել նոր բանակցություններ: Ընդդիմադիր ուժերն առաջարկում են ստեղծել անցումային կառավարություն, որի վարչապետը կլինի Վազգեն Մանուկյանը: Հանրահավաքի անցկացման ընթացքում ԱԱԾ-ում գտնվելու պատճառով հանրահավաքին չի միացել ԲՀԿ առաջնորդ Գագիկ Ծառուկյանը, սակայն նրա ուղերձն ընթերցվել է․

-Այս փուլում Արցախը հետ բերել հնարավոր չէ, սակայն նոր իշխանությունը հնարավորություն կունենա բանակցությունների արդյունքում նվազագույնի հասցնել ստորագրված փաստաթղթի հնարավոր հետևանքները,- ասված է ուղերձում:

ՀՅԴ ԳՄ ներկայացուցիչ Իշխան Սաղաթելյանն էլ նշել է, որ փորձեր են արվելու տարբեր մեթոդներով խուսափել իշխանափոխությունից, օրինակ՝ նշանակել արտահերթ ընտրություններ: Նա հանրահավաքի մասնակիցներին կոչ է արել չընդունել որևէ տարբերակ: Սաղաթելյանը նշել է, որ իրենց պայքարն իրականություն կդառնա անհնազանդության ակցիաների, զանգվածային ճնշումների միջոցով:

Հանրահավաքը վարողը պարբերաբար հնչեցրել է տարբեր մարզերի, տարբեր համայնքների համայնքապետերի ու ավագանու անուններ, որոնք իրենց տվյալներով պահանջում են գործող իշխանությունների ու վարչապետի հրաժարականը: Այնուհետև նախաձեռնության վարչապետի թեկնածու Վազգեն Մանուկյանը ներկայացրել է ստեղծված իրավիճակում իր ծրագրած քայլերի հաջորդականությունը:

Վազգեն Մանուկյանի ելույթից հետո հայտարարվել է հանրահավաքին հաջորդող երթի երթուղին: Հանրավաքի մասնակիցները Բաղրամյան պողոտայով Պռոշյան փողոցով անցնելով հասնել են կառավարական առանձնատուն և վերջնաժամկետ ներկայացրել իշխանափոխության համար: Նրանք հայտարարել են որ Նիկոլ Փաշինյանը պետք է հեռանա մինչև երեքշաբթի կեսօր, հակառակ դեպքում համապետական անհնազանդության ակցիաներ կկազմակերպեն: Ընդդիմությունը Փաշինյանին նաև անվտանգության երաշխիքներ է խոստացել հրաժարականի դեպքում: