Վրաստանյան ոդիսական. ինչո՞ւ են հայերը նախընտրում հանգստանալ Վրաստանում

Ընդամենը օրեր առաջ Վրաստանի էկոնոմիկայի և կայուն զարգացման նախարարության զբոսաշրջության ազգային գործակալության ղեկավար Գիորգի Չոգովաձեն հայտարարեց, որ 2017թ. 10 ամսվա ընթացքում Վրաստան է այցելել 7մլն 400 հազար զբոսաշրջիկ, որ տարվա եկամուտը հատում է 2 մլրդ դոլարի շեմը: Սա զբոսաշրջության ոլորտում նոր ռեկորդ որակվեց: Ընդ որում՝ այցելուների թվով առաջին տեղում Հայաստանն է՝ 1.7 միլիոն մարդ, այսինքն` 14%-ով ավելի շատ մարդ է այցելել Վրաստան, քան նախորդ տարի:

Վրաստանում ի՞նչն է այդքան գրավում հայերին: Չարչրկված հարցի պատասխանը գտնելու լավագույն տարբերակը համեմատությունն է:

Թվային համեմատություն

2017թ. 9 ամսում Հայաստան է այցելել 1.172.402 զբոսաշրջիկ: Նախորդ տարվա համեմատ արձանագրվել է 21 տոկոս աճ: 2017-ին Հայաստանում զբոսաշրջության զարգացման համար տրամադրվել է 200.000 դոլար, իսկ 2018-ին ֆինանսավորումը կրկնապատկվելու է:

2017թ. առաջին 9 ամսում Վրաստան է մուտք գործել 7.400.000 միջազգային այցելու, որից 3.478.000-ը Վրաստանում անցկացրել է մեկ և ավելի օր: Նախորդ տարվա համեմատ արձանագրվել է աճ 27.9%-ով: Ոլորտի զարգացման համար տարեկան հատկացվում է 9-10 մլն դոլար: Նույնքան էլ ներդնում է մասնավոր սեկտորը:

Սպասարկում

Սա, թերևս, այն եզակի ոլորտն է, որի մասին Վրաստանի զբոսաշրջիկները գոհունակությամբ չեն խոսում: «Սպասարկումը Վրաստանում» վերտառությամբ որոնումները համացանցում, Վրաստանում հանգստանալ նախընտրողների հետ զրույցներն ամբողջական պատկեր են ստեղծում. սպասարկման ոլորտում աշխատողները լեզու չգիտեն, աշխատում են դանդաղ, ռեստորաններում հաճախ շփոթում են պատվերները:

Հայաստանում այս ոլորտը քիչ-թե շատ առաջընթաց գրանցում է:    

Հյուրանոցային տնտեսություն

2017թ. տվյալներով Հայաստանում գործում է 188 հյուրանոց կամ 8523 հյուրանոցային համար, որից 71-ը գտնվում է Երևանում, 117-ը՝ մարզերում: Գործում են նաև շուրջ 150 հյուրատներ, առողջարաններ և հանգստյան այլ օբյեկտներ, որոնց մեծ մասը՝ մարզերում:

Վրաստանում գրանցված է 1900 հյուրանոց:

Հիմա ներկայացնենք գնային քաղաքականության և մատուցած ծառայությունների տարբերությունները.

 Վրաստանի մայրաքաղաք Թբիլիսիում 4-աստղանի հյուրանոցային երկտեղանոց ստանդարտ համարի մեկ օրվա արժեքը՝ մեկ անձի համար, ամռանը տատանվում է 15-20.000 դրամի սահմաններում. պայմանները մոտավոր այսպիսինն են:

Երևանում գտնվող 4 աստղանի հյուրանոցի երկտեղանոց ստանդարտ համարում, կրկին մեկ

անձի համար, մեկ օրվա արժեքը տատանվում է 35.000 դրամից մինչև «անվերջություն»:

  Վրաստանում 3-աստղանի հյուրանոցներում գիշերակացը  կարժենա 10-15.000 դրամ

Երևանում, 24.000 դրամից սկսած, կարող եք իջևանել նման պայմաններում:

Անհատական բնակելի տներ կամ էլիտար շենքերում բնակարաններ նախընտրողներն էլ ընդամենը 16.000 դրամով Բաթումում կարող են վարձակալել տուն՝ բոլոր հարմարություններով ու գերազանց մաքրությամբ:

 Հայաստանում օրական 20.000 դրամով զբոսաշրջային գոտի համարվող Ծաղկաձորում լավագույն դեպքում կհանդիպես նման բնակարանի: 

Զբոսաշրջային փաթեթներ

Թե՛ Հայաստանում, թե՛Վրաստանում քիչ չեն նաև զբոսաշրջային փաթեթներ առաջարկող կազմակերպություններն ու անհատները (ովքեր շատ հաճախ աշխատում են առցանց՝ 10% ավելացնելով ինտերնետում ամրագրումներ անելու համար):

Դասական տուր, որ ծանոթացնում է Վրաստանի հրաշալիքներին: Փաթեթն արժե 190.000 դրամ՝ 6 օր, 5 գիշերվա համար: Առաջարկում են տրանսֆեր, 3-աստղանի հյուրանոցում գիշերակաց (վերևում տեղադրված են նկարներ 3-աստղանի հյուրանոցային համարներից), հարմարավետ տրանսպորտ, զբոսավարի ծառայություն, մուտքի տոմսեր:

Փաթեթը չի ներառում գինինիների համտեսը, որն արժե 10 դոլար, վրացական ճաշատեսակների մաստեր-կլաս, որն արժե 25 դոլար և վրացական ռեստորանում ընթրիքը՝ ֆոլկլորային համարներով, 25 դոլար արժողությամբ: Եթե այս ամենն էլ ներառվի փաթեթում, այն կարժենա  մոտավոր 218.000 դրամ:

Նմանատիպ տուր փաթեթը Հայաստանում արժե մոտ 360.000 դրամ: Փաթեթը ներառում է դիմավորում և ճանապարհում օդանավակայանում, բնակություն 3-աստղանի հյուրանոցում՝ նախաճաշով, հարմարավետ տրանսպորտային սպասարկում, 5 ճաշ և 2 ընթրիք հայկական ռեստորաններում կամ գյուղական հյուրատներում, ողջույնի ընթրիք մշակութային ծրագրերով, գինու և կոնյակի համտես, զբոսավարի ծառայություն, մուտքի տոմսեր, խմելու ջուր սպասարկող մեքենայում, Հայաստանի տուրիստական քարտեզ:

Մեկ այլ՝  խոհանոցային 5-օրյա տուր փաթեթ: Արժեքը կազմում է 216.000 դրամ, իսկ Հայաստանում՝ 6 օրյա փաթեթը 2-3 անձի համար կազմում է 389.000 դրամ: Առաջարկվող ծառայությունները գրեթե նույնն են:

Երկու երկրների կողմից էլ առաջարկվում է նաև «Գինու տուր»:

Վրաստանում փաթեթի արժեքը 188.000 դրամ է՝ ներառում է 3-աստղանի հյուրանոցում գիշերակաց, հարմարավետ տրանսպորտ, զբոսավարի ծառայություն, մուտքի տոմսեր: Փաթեթը չի ներառում գինու համտեսը Սիգնախիում (10 դոլար), վրացական ճաշատեսակների մաստեր-կլաս (25 դոլար) և վրացական ռեստորանում ընթրիքը՝ ֆոլկլորային համարներով (25 դոլար):

Նույն, բայց 7-օրյա փաթեթը Հայաստանում արժե 471.582 դրամ: Ներառում է բնակություն 3-աստղանի հյուրանոցում՝ նախաճաշով, հարմարավետ տրանսպորտային սպասարկում, 7 ճաշ և 3 ընթրիք հայկական ռեստորաններում կամ գյուղական հյուրատներում, ողջույնի ընթրիք մշակութային ծրագրերով, գինու և կոնյակի համտես, զբոսավարի ծառայություն, մուտքի տոմսեր, խմելու ջուր սպասարկող մեքենայում, Հայաստանի տուրիստական քարտեզ:

Մարքեթինգ-մրցակցություն

Վրաստանում նաև հատուկ ուշադրություն են դարձնում մարքեթինգին: Մեծ գումարներ են ծախսվում տեղեկատվական արշավների, գովազդների վրա, նաև հաճելի անակնկալներ են խոստանում:

Հիշեցնենք, որ համացանցում տարածվել և մեծ դիտելիություն էր ապահովել այն հոլովակը, որտեղ Վրաստանի վարչապետը դիմավորում էր երկիր այցելած 6 -միլիոներորդ զբոսաշրջիկին։ Քայլի մասին նախապես չէին հայտարարել, բայց ողջ աշխարհն իմացավ այդ մասին:

Ինչ վերաբերում է մրցակցությանը, ապա Վրաստանում, օրինակ՝ Բակուրիանիում, որը ձմեռային սպորտաձևերի հայտնի քաղաք է, հաճախորդին գոհացնելու, հաճախորդ ներգրավելու համար կիրառում են «խորամանկ» ակցիաներ՝ ճոպանուղու 1 կտրոն են առաջարկում դահուկներն իրենցից վերցնելու դեպքում, մինչդեռ Ծաղկաձորում դահուկով 1 ժամ սահելու աստղաբաշխական գներից զատ, նաև ստիպված ես երկար ժամանակ սպասել հերթում, ու դահուկ ստանալու համար խնամի-ծանոթ-բարեկամը լավագույն լուծումն է դառնում:

Չենք անդրադառնում նաև ճանապարհների վիճակին կամ ավիատոմսերի գների տարբերությանը:

Այսպիսով, գալիս ենք հետևության, որ զբոսաշրջիկները, հատկապես հայերը, Վրաստանը սիրում են ոչ միայն ծովի համար:

Որպես փոքրիկ մեջբերում՝ ծովում հանգստանալու համար 1 անձը կարող է ընդամենը 60 հազար դրամով բավարարվել, ներառյալ՝ տրանսպորտը, կացությունը և սնունդը: 60 հազար  դրամով Հայաստանում կարող ես մեկ, իսկ լավագույն դեպքում երկու օր գիշերել Ծաղկաձորի հյուրանոցներից մեկում:

Դե, իսկ ճոխության սիրահարները կարող են իրենց թույլ տալ շատ ավելին: Վրաստանում վայելքներն ու տեսարժան վայրերը բազմաթիվ են: