Ինչպես էր Յանուկովիչը փախել Ուկրաինայից. թիկնապահի պատմությունըր

Կիևի Օբոլոնսկի դատարանում, որտեղ  հեռակա քննվում է Ուկրաինայի նախկին նախագահ Վիկտոր Յանուկովիչի գործը, հնչել են մի քանի մանրամասներ, թե ինչպես է նա  2014 թականի փետրվարին փախել Ռուսաստան: Այդ ամենը պատմել է նրա նախկին թիկնապահ Վիկտոր Ռեզնիչենկոն:  Նա հերքել է Յանուկովիչի և իր պաշտպանների  հայտարարությունն այն մասին, թե  փախուստի ժամանակ նրա ավտոմեքենան գնդակոծել են: 

Թիկնապահի վարկածը 

Ըստ Ռեզնիչենկոյի՝ 2014 թվականի փետրվարի 22-ին  Յանուկովիչը Խարկովում էր, ուր գնացել էր երեկոյան, որպեսզի մասնակցեր  իր կուսակցության համագումարին: Սակայն համագումարը հետաձգվել էր:

«Փետրվարի 22-ի կեսօրին ուղեկցող խմբի հետ  ճանապարհվել է դեպի Խարկովի օդանավակայան: Այնտեղ արդեն պատրաստ սպասում էր 2 ուղղաթիռ՝ մեկը Յանուկովիչի և թիկնազորի, մյուսը՝  ընտանիքի անդամների  և կրկին թիկնապահներից մի քանի հոգու համար»,- Ռեզնիչենկոյի խոսքերը մեջբերում է Интерфакс գործակալությունը: 

Թռիչքից մոտ մեկ ժամ անց  Խարկովի օդանավակայանի ավիակարգավորողները հրաման տվեցին օդաչուներին վերադառնալ  օդանավակայան: Հրամանը,  թիկնապահի պնդմամբ, եղել է  Գերագույն Ռադայի նախագահ  Ալեքսանդր Տուրչինովի կողմից:

Հենց  նույն օրը Ռադան Յյանուկովիչին  հայտարարել էր «նախագահի պարտականություններից  սեփական կամքով հրաժարված» և նշանակել էր  նոր ընտրություններ: Յանուկովիչի փախուստից հետո, մինչև Պյոտր Պորոշենկոյի ընտրությունը, երկիրը ղեկավարել է Տուրչինովը: 

Սակայն Խարկով վերադառնալու համար ուղղաթիռները վառելիք չունեին և վայրէջք են  կատարել Դոնեցկում, պատմել է  Ռեզնիչենկովը: Այդ  ժամանակ Յանուկովիչը  և  նրան ուղեկցողները իջել են ուղղաթիռներից, նստել մեքենաները և  ուղևորվել Դոնեցկի ինչ-որ «մեծ տուն»:

Այդտեղ եղել  են  նաև Յանուկովիչի  որդին՝ Ալեքսանդրը և գործարար Ռինատ Ահմետովը:

Դեպի Ղրիմ

Նույն օրը նախկին նախագահն ուղևորվել է դեպի Ղրիմ, Բերդյանսկի շրջանի մոտ նրանց մոտեցել են 3 Մի 8 ուղղաթիռներ: Դրանց  վրա, Ռեզնիչենկովի հավաստմամբ, եղել են կարմիր աստղեր. «Ես կարծում եմ, որ դրանք ռուսական ուղղաթիռներ էին», – ասել է  թինկապահը: Ուղղաթիռներով Յանուկովիչը մեկնել էր  անհայտ ուղղությամբ: Որոշ ժամանակ անց վայրէջք են կատարել մի օդանավակայանում, որտեղ դիմավորել են ռուս զինվորականներ: 

Փետրվարի 23-ին նույն օդանավակայանից  նախկին նախագահը իր խմբով և զինված անհայտ մարդկանց ուղեկցությամբ թռել է ԱՆ-26 զինվորական օդանավով:  Այն օդանավակայանում, որտեղ իջել է Ան-26-ը, մոտեցել է «Անապա» գրությամբ տեխնիկական աջակցման անձնակազմ: Այնուհետև  կրկին թռիչք դեպի այլ օդանավակայան, որտեղ կրկին ռուսներ են դիմավորել:

«Մենք ժամանեցինք Յալթա, հանգստյան տուն, որն ամենայն հավանականությամբ  պատկանում էր ՌԴ-ին: Նույն օրվա երեկոյան ամբողջ խումբը Յալթայից մեկնել է Սևաստոպոլ»,- պատմել է  թիկնապահը: Այդտեղ Յանուկովիչն առաջարկել է ուղեկցող խմբին  շարունակել իր հետ ճանապարհը կամ մնալ Սևաստոպոլում 

Ովքեր մնացել են տեղում, հանձնել են իրենց  զենքը  և հաջորդ օրը գնացքով վերադարձել Կիև:  Գիշերը ժամը 23-ի սահմաններում նախկին նախագահն արդեն առանց թիկնապահ Ռեզնիչենկովի, շարունակել է ճանապարհը:

Հիշեցնենք՝  Ուկրաինայում քրեական գործ  է  հարուցված նախկին նախագահի դեմ՝ պետական դավաճանության մեղադրանքով: Գործը քննվում է հեռակա, առանց Յանուկովիչի մասնակցության, քանի որ ամբաստանյալը հրաժարվում է  վերադառնալ  հայրենիք: