Ի՞նչ սահմանափակումներ են մեղմացվում և ուժի մեջ մնում Վրաստանում դեկտեմբերի 24-ից

Դեկտեմբերի 24-ից հունվարի 2-ը Վրաստանում սահմանափակումներն ամբողջությամբ չեն մեղմվի: Այս մասին հայտարարել է Վրաստանի շրջանային զարգացման և ենթակառուցվածքների նախարարի պաշտոնակատար Մայա Ցքիտիշվիլին, հայտնում է 1tv.ge-ն։

Համակարգող խորհուրդը որոշել է, որ դեկտեմբերի 24-ից հունվարի 2-ը սահմանափակումներն ամբողջությամբ չեն մեղմացվի.

Քաղաքային տրանսպորտի սահմանափակումներն ուժի մեջ են Թբիլիսիում, Ռուսթավիում, Քութաիսում, Բաթումում, Գորիում, Զուգդիդիում, Փոթիում և Թելավիում:

Երկրի ողջ տարածքով միջքաղաքային տրանսպորտի սահմանափակումները շարունակում են ուժի մեջ մնալ: Մասնավոր տրանսպորտային միջոցներով տեղաշարժը կրկին կլինի թույլատրելի։

Տոնավաճառները չեն բացվի: Ագրարային շուկաները կշարունակեն գործել՝ կանոնների լիակատար պաշտպանության պայմանով։

Դեկտեմբերի 24-ից հունվարի 2-ը վերոհիշյալ քաղաքներում կորոնավիրուսի անվտանգության բոլոր կանոնների պահպանման դեպքում առևտրի օբյեկտները կվերսկսեն աշխատանքը.

Բիզնեսի հետ նախնական խորհրդատվության արդյունքում հաշվի են առնված լրացուցիչ կանոնակարգեր. Խանութի աշխատանքային ժամերն են 07:00 – 19:00-ն։

Սպառողների մուտքի առևտրի տարածք կթույլատրվի հոսքի խիստ կառավարմամբ։

Խանութի յուրաքանչյուր 20 մ տարածքի վրա թույլատրվում է ոչ ավելի, քան մեկ հաճախորդի ներկայություն։

Հաճախորդների հերթերը պետք է կառավարվեն խանութների ինչպես ներսում, այնպես էլ դրսում: Զեղչի գովազդները հայտարարվելու են հիմնականում առավոտյան և (կամ) առցանց վաճառքի դեպքում։

Հագուստի խանութներում հանդերձարանները չեն աշխատի։

Այնուամենայնիվ, սպառողների շահերը պաշտպանելու համար խանութները պետք է թույլ տան ապրանքը վերադարձնել կամ փոխանակել մեկ ամսվա ընթացքում, և դա պետք է տեղի ունենա միայն փետրվարի մեկից հետո։

Արգելվում է առևտրի կենտրոններում սննդի կետերի գործունեությունը։

Բոլոր տարածքներում և խանութից դուրս հերթերի ժամանակ պետք է պահպանվեն սոցիալական հեռավորության և շնչադիմակ կրելու պահանջները։

Առևտրի օբյեկտների կառավարումն ամբողջովին պատասխանատվություն է կրում վերոնշյալի համար։

Ցանկացած խախտման դեպքում օբյեկտների նկատմամբ կիրառվելու են օրենքով սահմանված բոլոր միջոցները՝ ինչպես տուգանքներ, այնպես էլ գործունեության կասեցում։

Արգելվում է մշակութային և այլ ժամանցային միջոցառումների կազմակերպումը։
Հյուրանոցների ռեստորանները բաց կլինեն միայն մինչև 21:00-ն։ Ռեստորաններն ու սննդի կետերը ամբողջ երկրում շարունակում են գործել միայն առաքման ծառայության միջոցով։

Ողջ երկրում ժամը 21:00-ից մինչև 05:00-ն, ինչպես հետիոտնի, այնպես էլ մեքենայի տեղաշարժի արգելքը մնում է ուժի մեջ: Բացառություններ կլինեն դեկտեմբերի 31-ին և հունվարի 6-ին: Չնայած այս բացառություններին, համակարգող խորհուրդը բնակչությանը կոչ է անում տոները նշել ընտանեկան շրջապատում:

«Բոլորս հստակ տեսնում ենք, որ նոյեմբերի 28-ից ի վեր դրված սահմանափակումներն ուղղակիորեն ազդել են վարակի տարածումը դանդաղեցնելու և համաճարակի կայունացման վրա: Չնայած վարակման օրական ցուցանիշի նվազմանը, վարակման մակարդակը դեռ շարունակում է մնալ բարձր»,- հայտարարել է Ցքիտիշվիլին: