Կորոնավիրուսի հանգամանքների վերաբերյալ «Իմ քայլը» որևէ հարցում չի ուղղել կառավարությանը. ԱԺ քննիչ հանձնաժողովի նիստ

«Լսարանում հանձնաժողովի անդամները ինչո՞վ են տարբերվում լսարանում գտնվող մյուս անձանցից, ասենք, ԶԼՄ ներկայացուցիչներից, նյութի վերաբերյալ մեր իմացությամբ՝ ոչնչով, մենք գալիս ենք հանձնաժողովի նիստին՝ չիմանալով, որ ուղարկվել են լրացուցիչ հարցեր՝ ծանոթ չլինելով դրանց բովանդակությանը, ուղարկվում են, հետո նոր տեղյակ են պահվում, մենք տեղյակ չենք պատասխաններից, և ինչպես մյուսները, նստած լսում ենք ձեզանից»,- այսօր կորոնավիրուսի հանգամանքներն ուսումնասիրող ԱԺ քննիչ հանձնաժողովի նիստի ժամանակ հարց է բարձրացրել նախագահի տեղակալ Հերիքնազ Տիգրանյանը:

Նշենք, որ հանձնաժողովի նախագահ Արկադի Խաչատրյանը մինչ այդ տեղեկացրել էր, որ լրացուցիչ հարցումներ են ուղարկել տարբեր պետական մարմիններին, որոնք վերաբերել են ՓՄՁ վրա ազդեցությանը տնտեսական ճգնաժամով պայմանավորված։ Տեղեկություն են հայցել սուբյեկտների շրջանառությանը, նրանց կողմից վճարված հարկերին, ճյուղային վերլուծություններին, ինչպես նաև լրացուցիչ տեղեկություն են հայցել կրճատված աշխատատեղերի, փակված բիզնեսների, գործունեությունը դադարեցրած, սնանկացած, լուծարված սուբյեկտների վերաբերյալ ամսական կտրվածքով:

Հերիքնազ Տիգրանյանը նաև հավելել է՝ դիտարկում անելով Խաչատրյանի այն հորդորի վերաբերյալ, ըստ որի՝ պետական մարմինները պետք է ամսական կտրվածքով մանրամասն տեղեկություն տան, եթե այդ մասին հիշատակում կա հարցադրման մեջ: Նշել է.

«Ձեր հորդորը պետական մարմիններին ժամանակին պատասխանելը տեղին է, մյուս կողմից էլ՝ 251 հարց փաթեթով ուղարկել բոլոր պետական մարմիններին ու դրանցից առանձնացնեն իրենց վերաբերող փաստերը, ժամանակատար է»,- ասել է Տիգրանյանը:

Արկադի Խաչատրյանը պատասխանել է.

«Ինչ վերաբերում է լրացուցիչ հարցադրումներին, տեղեկանալու որևէ խնդիր չեմ տեսնում, դրա համար խնդրեցի քարտուղարությանը, որ անհապաղ ուղարկեն այսուհետ, ինչ վերաբերում է հարցումների ուղարկմանը, դրա համար անհրաժեշտ չէ հանձնաժողովի որոշում, դրա համար պետք է 1/4-ի նախաձեռնությունը, մինչև այսօր բոլոր հարցումներն ուղարկվել են «Լուսավոր Հայաստան»-ի և «Բարգավաճ Հայաստան»-ի նախաձեռնությամբ, «Իմ քայլի» կողմից որևէ հարցում կամ նախաձեռնություն ինձ ուղղված չի եղել, որ հանձնաժողովի անունից ուղարկվի»:

Հերիքնազ Տիգրանյանն արձագանքել է, որ իրենք հարցում չեն ուղարկելու, բայց հանձնաժողովի անունից ուղարկվող ցանկացած հարցման մասին իրենք պետք է տեղեկացված լինեն: