Գյումրիում քննարկվել են զբոսաշրջության ռեստարտի հնարավորությունները

Զբոսաշրջությունը Հայաստանում համավարակի հետևանքով ամենաշատ տուժած ոլորտն է: Մեկ տարի արտագնա տուրիզմ, որպես այդպիսին չկա, ներքին տուրիզմի ցուցանիշներն էլ բավարար չեն զբոսաշրջային ոլորտի եկամտաբերության ու զարգացման համար: Ինչպես զբոսաշրջային ոլորտը ռեստարտ անել՝ ամեն ինչ սկսել նորից: Այս հարցերն են այսօր քննարկել Շիրակի մարզի զբոսաշրջային ոլորտը ներկայացնող գործարարներն ու զբոսավարները: «Տուրիզմ ռեստարտ 2021» կոնֆերանսների շարքի երկրորդ հանդիպումն անցկացվել է Գյումրիում:

Միայն համեմատության մեջ է հասկանալի, թե անցած 2020 թվականին ինչքան անկում է ապրել ոլորտը: Մեկ տարի է հյուրատները գրեթե դատարկ են: Սահմանների փակ լինելու պատճառով արտաքին տուրիզմ չկա: Ոլորտը գոյատևում է ներքին տուրիզմի հաշվին: Մասնագետները ցուցանիշները համեմատում են 2019 թվականի հետ ու ստացվում է, որ անցած տարի 80 տոկոսով տուրիստական հոսքը Շիրակի մարզում նվազել է:

« 80%-ով նվազել են ցուցանիշները: Նոր-նոր զբոսաշրջությունն անջատել ենք արհեստական շնչառության սարքից և տեղափոխել ենք ռեանիմացիա: Հիմա պետք է աշխատենք, որ ռեանիմացիայի փուլն էլ անցնենք: Մինչև մայիս, մինչև ամառ կկարողանանք ասել՝ վերակենդանացումը հաջող էր, թե ոչ:Օդային սահմանները երբ բացվեցին, արդեն սկսեցին ՌԴ-ից զբոսաշրջիկներ գալ: Այդ հոսքը չի կարող չուրախացնել,  նաև հույս է տալիս մտածել, որ վատ օրերն արդեն անցել են և քաղաքի զբոսաշրջությունը կամաց-կամաց ոտքի կկանգնի»,- Shantnews-ին ասել է զբոսավար Հովհաննես Ֆրանգուլյանը:

Ներքին տուրիզմի աճը Շիրակի մարզի համար դրական մեկ այլ ազդեցություն էլ ունի: Եթե նախորդ տարիներին իրենց տուրիստական ուղղություններում ընդգրկում էին միայն Գյումրին, այն էլ մեկօրյա զբոսանքներով, ապա հիմա Շիրակի մարզի տարբեր բնակավայրերի են ուշադրություն դարձնում:

«Ամեն սեզոնին մենք ունենք Գյումրիի տուրերը: Շաբաթական 4-5 անգամ այցելում ենք Գյումրիի տեսարժան վայրերը ու դրանով ծանոթանում պատմամշակութային արժեքներին: Այս տարի որոշել ենք բացի տեսարժան վայրերից, ներառենք որևէ հյուրատուն, որտեղ հնարավոր է տեսնել, օրինակ, լավաշ թխելու վարպետության դաս»,- ասել է տուրիստական ընկերության ղեկավար Մաթևոս Բարսեղյանը:

«Ցույց տալու շատ բան ունենք մարզում: Կախված է մեր համայնքների բնակիչների մտածելակերպից: Հին կառույցները, եկեղեցիները, գյուղական կենցաղը, ամեն ինչը կարելի է հետաքրքիր մատուցել:Գյուղական հյուրատներում կան ամրագրումներ: Բայց ներքին տուրիզմը այս պահին ոչ թե մեծ եկամուտ է ապահովում, այլ օգնում է բիզնեսին գոյատևել՝ մինչև ընդհանուր իրավիճակը հաղթահարենք»,- Shantnews-ին ասել է գյուղական հյուրատան հիմնադիր Մարտին Սարգսյանը:

Տուր ուղղություններում էական փոփոխություններ են կատարվել՝ ոչ միայն ներքին տուրիզմի պահանջները հաշվի առնելով: Զբոսաշրջային ընկերությունների առաջարկած փաթեթներում  Արցախի բնակավայրերի ու պատմամշակութային արժեքների ցանկն է  կրճատվել:

Շիրակի մարզի հյուրանոցներում ու հյուրատներում ամռան համար  ամրագրումներ քիչ, բայց արդեն կան: Ոլորտի ակտիվություն մասնագետները կանխատեսում են մայիսի վերջից, եթե նոր սահմանափակումներ չկիրառվեն:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։