Հակոբ Հակոբյանի «Սարերում» որմնանկարը պահպանության խնդիրներ ունի

Հակոբ Հակոբյանի «Սարերում» կոչվող որմնանկարը պահպանության լուրջ խնդիրներ ունի: Այն Գյումրիի «Քարհատ մեքենա» գործարանի նախկին ճաշարանից դրամատիկական թատրոնի շենք է տեղափոխվել 4 տարի առաջ: Այդ ժամանակ թատրոնի միջանցքը միակ հարմար տարածքն էր  քաղաքում, որտեղ կարող էր տեղակայվել որմնանկարը: Պահպանության հարցն էլ դրվել է թատրոնի ղեկավարության վրա:

Թատրոնի երկրորդ հարկի միջանցքում օրը ցերեկով լույսերը միշտ վառվում են: Բնական լուսավորություն շենքի այս հատվածում գրեթե չկա: Պատուհաններն ամբողջությամբ ծածկում է որմնանկարը, որը 4 տարի առաջ վերականգնումից հետո այստեղ է տեղափոխվել: Այն  ոչ թե պատին է տեղադրվել, այլ թատրոնի սրահում՝  սյուներից կախված: Որմնանկարն իր ճիշտ տեղում չէ՝ սա թատրոնի ղեկավարությունը մեկ անգամ չէ , որ ասում է։

4 տարում  մի քանի դիմում-նամակ են հասցեագրել կրթության,գիտության, մշակույթի և սպորտի նախարարությանը, որ թատրոնը չի կարող որմնանկարի պահպանության հարցերը լուծել:

«Ամբողջ պահպանությունը տրված է թատրոնին:Այսինքն,եթե նկարը վնասվում է, փոխհատուցում է թատրոնը: Ես չեմ հասկանում տրամաբանությունը: Թատրոնն անում ամեն ինչ, ինչի հնարավորությունն ունի:Պայմանագրի մեջ գրված է, որ պետք է ապահովենք համապատասխան ջերմաստիճան:Իհարկե ամբողջ շենքը ջեռուցվում է, բայց կոնկրետ այս հատվածում պատուհաններ են, որոնք վթարային են, և ցուրտը գալիս էթ ներս:Այս հատվածում չենք կարող անհրաժեշտ ջերմաստիճան ապահովել: Ես դիմել եմ մշակույթի փոխնախարարին , խնդրել եմ, ասել եմ,որ եթե որմնանկարը ճանաչվել է մշակութային արժեք, շատ ուրախ եմ, շատ լավ է,բայց այն պետք է պահպանել:Մենք չենք կարողանում պահպանել»,-shantnews-ին ասել է Գյումրիի Աճեմյանի անվան դրամատիկական թատրոնի տնօրեն Լյուդվիգ Հարությունյանը:

Որմնանկարը  շենք է բերվել պատուհաններով, այդ ժամանակ էլ, ըստ տնօրենի, առանց այդ էլ վթարային պատուհանները ավելի  են խարխլվել: Երկու տարի առաջ թատրոնը պատրաստվում էր պատուհանները փոխել, բայց սպասում են, որ որմնանկարի տեղափոխության հարցը լուծվի:

Որմնանկարը սկսել է քայքայվել: Սա փաստեց  նաև «Մինաս Ավետիսյան» հիմնադրամի նախագահը, ով տարիներ առաջ վերականգնել ու թատրոնի շենք է տեղափոխել որմնանկարը: Նշում է՝ Գյումրիում պարզապես չափսերով հարմար այլ տարածք չկար:

«Հենց սկզբից էլ մենք ասել ենք, որ սա հարմար տարածք չէ: Սա կարելի է դիտարկել միայն որպես տարածք, որտեղ կարելի է ժամանակավոր պահել որմնանկարը, բայց ընդմիշտ այն այստեղ թողնել, իմ կարծիքով՝ ճիշտ չէ: Հետևում պատուհաններն են, որոնք շոգի և ցրտի աղբյուր են:Նախարարությունը մեզ առաջարկել էր, որ ուսումնասիրենք «Շիրակ» օդանավակայանի տարածքը: Գնացինք խոսեցինք, հարցուփորձ արեցինք, բայց դրանից հետո խոսակցություն էլ չեղավ: Արդեն հիմա որմնանկարի վրա կա տեղամաս, որտեղ ներկի շերտը վնասվել է»,-shantnews-ին ասել է «Մինաս Ավետիսյան» հիմնադրամի նախագահ Արման Ավետիսյանը:

Թատրոնում որոշել են այլևս չսպասել մինչև որմնանկարի համար նոր տարածք կգտնվի։ Հիմա խնդիրն այն է, թե ինչ է լինելու, եթե նոր պատուհաններով որոշեն որմնանկարը տեղափոխել:

Հակոբ Հակոբյանի որմնանկարը պահպանվող հուշարձանների ցանկում է: «Մինաս Ավետիսյան» հիմնադրամը նորից է դիմելու, կրթության ,գիտության, մշակույթի և սպորտի արդեն երրորդ նախարարին, որ որմնանկարի տեղափոխության լուծումներ գտնեն: Սա հուշարձան ճանաչված ստեղծագործության պահպանման միակ տարբերակն է:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։