Եվրոպայի խորհրդում ճգնաժամ է ու արժեքների անկում. Դավիթ Շահնազարյան

Եվրոպայի խորհրդում կան և՛ կոռուպցիա, և՛ արժեքային ճգնաժամ, և՛ բարոյականության ճգնաժամ։ Եվ ընդհանրապես եվրոպական կուլիսներում արդեն վիճելի է՝ արդյո՞ք կա այդ կառույցի անհրաժեշտությունը։ Այս մասին «Շանթ» հեռուստաընկերության «Հեռանկար» հաղորդման ընթացքում հայտարարեց ԱԱԾ նախկին ղեկավար, վերլուծաբան Դավիթ Շահնազարյանը։

«Համարվում է, որ Եվրոպայի խորհրդի միակ գործող կառույցը Մարդու իրավունքների եվրոպական դատարանն է, որի որոշումները հաճախ շատ երկրներում չեն կատարվում։ Եվ ժամանակին Եվրոպայի խորհուրդը քննարկել է այդ հարցը, երկար գլուխ են ջարդել՝ ինչ կարող են անել, և ըստ էության որևէ արդյունավետ լուծում չեն գտել», — նշեց Շահնազարյանը։

Եվրոպայի խորհրդի բանաձևերը որևէ պարտադիր ուժ չունեն, դրանք ուղղակի քաղաքական նշանակություն ունեն։ Այստեղ իրենց քվեարկություններով երկրները հստակեցնում են իրենց դիրքորոշումները այլ երկրների նկատմամբ։ Դավիթ Շահնազարյանի խոսքով՝ հենց այս իրողություններն են, որ անկախ ճգնաժամերի առկայությունից՝ պահում են Եվրոպայի խորհրդի խորհրդարանական վեհաժողովի անհրաժեշտությունը։

«Ոչ ոք չի կարող երաշխիք տալ, որ Արգամունտի ու Վալոնտեի նման պատգամավորներն այնտեղ եղանակ չեն ստեղծի։ Կոռուպցիան չի վերանա, բայց այնուամենայնիվ, իմ գնահատականով՝ մակարդակը մի քիչ իջել է։ Եվ միայն Ադրբեջանը չէ, որ նման գործարքներ է այնտեղ կատարում։ Պատգամավորներ կան (կարևոր չէ՝ որ երկրներից), որոնք առիթը բաց չեն թողնում օգտվելու «խավիարային դիվանագիտությունից»։ Հիշենք Բոսնիայի պատգամավորի զեկույցը Սարսանգի ջրամբարի մասին, որն իրականությունից ընդհանրապես կտրված էր», — նշեց Շահնազարյանը։

Այս ամենը հաշվի առնելով՝ ԵԽԽՎ հայկական պատվիրակությունները չպետք է պայքարեն, որ նման հարցերը չմտնեն օրակարգ, քանի որ Հայաստանի դիրքերն այնտեղ ամուր են։ Նման հարցերը, ըստ Դավիթ Շահնազարյանի, պետք է մտնեն օրակարգ և ստանան լուծում։

ԵԽԽՎ-ում, ըստ վերլուծաբանի, գործում է «ես քեզ, դու ինձ» սկզբունքը, երբ մի երկրի ներկայացուցիչը քվեարկում է մյուսի առաջարկածին կողմ, քանի որ պետք եղած ժամանակ կարող է նույնը խնդրել դիմացինից։ Այս տեսանկյունից Շահնազարյանը կարծում է, որ հայկական պատվիրակությունը պետք է ակտիվ լինի նաև այլ հարցերում։

«Պետք է մյուս հարցերում նույնպես շատ ակտիվ լինել։ Այն հարցերում, որոնք մեզ ուղղակիորեն չեն վերաբերում։ Որովհետև գալիս է պահ, երբ արդեն պետք է ձայներ հավաքել այս կամ այն նախագիծը անցկացնելու կամ տապալելու համար»։

Նման մարտավարություն, ըստ վերլուծաբանի, առաջինը սկսել է կիրառել Ադրբեջանը, սակայն Բաքվի համար գնալով ավելի դժվար է դառնում հաջողության հասնելը, քանի որ Ադրբեջանը խնդիրներ ունի եվրոպական կառույցների հետ։

Դավիթ Շահնազարյանի հետ հարցազրույցի ամբողջական տեսագրությունը կարելի է դիտել ստորև։