Վճռաբեկ դատարանի դատավորի թեկնածուն քննադատում է ԱԺ-ին՝ ընտրությունների ընթացքում քաղաքական տրամադրություններով շարժվելու համար

ԱԺ-ը քննարկում է Վճռաբեկ դատարանի դատավորի թեկնածուի ընտրության հարցը: Հիշեցնենք՝ սա երկրորդ փուլն է։ Առաջին փուլի ընթացքում խորհրդարանը հայտարարեց, որ քաղաքական հայտարարություններից ու իրադրությունից ելնելով՝ չի ընտրելու 3 թեկնածուներից որևէ մեկին:

Այսօր առաջինը ելույթ ունեցավ Արմեն Հայկյանցը, ով առավելագույն ձայներ ստացած թեկնածուներից մեկն էր: Մյուսն Արսեն Մկրտչյանն է:

Հայկյանցը իր ծրագիրը ներկայացնելու փոխարեն անդրադարձավ խորհրդարանի նախորդ հայտարարություններին, քննադատեց պատգամավորների դիրքորոշումը: Անդրադարձավ Հերիքնազ Տիգրանյանի այն հայտարարությանը, որ թեկնածուներից մեկին իրենք ճանաչում են ավելի շատ, քան մյուսին, հետևաբար՝ հետագայում ընտրությունը կանխորոշվելու է ճանաչելիության աստիճանով:

«Հարգելի՛ պատգամավորներ, ինչո՞ւ մենք չփորձեցինք ընթացակարգային այդ հնարավորության շրջանակներում ներկայացնելու  իրավասություն ունեցող անձին առաջադրել այնպիսի հարցեր, որոնք կբացահայտեին թեկնածուների մարդկային, անձնական, բարոյական, պրոֆեսիոնալ հատկանիշները: Նշանակում է՝ թեկնածուներին ճանաչելու օրենսդրորեն ընձեռված հնարավորությունը մենք բաց թողեցինք ընթացակարգին ոչ հարիր հարցի քննարկմամբ: Ստացվում է, որ օրվա՝ քաղաքական ուղղվածության տրամադրություններն ամփոփվեցին խորհրդարանական մեծամասնության ընդհանուր եզրակացությամբ, որ թեկնածուների ընտրություն որոշելը խորհրդարանական մեծամասնությունը չկատարեց, և ձևակերպվեց հետևյալ կերպ, որ չի ընտրելու և իր այս քայլով դիրքորոշում է արտահայտելու ոչ թե թեկնածուի, այլ ԲԴԽ նախագահի ու հայտարարությունների վերաբերյալ: Մտահոգություններն ընթացակարգի ուղեծրի մեջ չէին և առնչություն չունեին»,-հայտարարեց նա:

Թեկնածուն խոսեց նաև այն մասին, թե ընտրության առաջին փուլից ինչ են բերել երկրորդ փուլ:

«Բերում ենք այն տրամադրությունն ու տրամաբանությունը, որ առկա էր առաջին փուլում, երբ դրանք թույլ չտվեցին ընտրել առաջին փուլում, ապա կարծում եմ, որ նույն խնդրի առջև կանգնելու ենք երկրորդ փուլում, իրերի դրությունը նույնն է: Նման ընթացակարգային, ուղեծրային խախտման պարագայում այն լեգիտիմության փոխանցումը, որի մասին ակնածանքով խոսում է Եվրոպական դատավորների խորհրդատվական խորհուրդը, մեզ մոտ դառնում է դեֆորմացված, իսկ լեգիտիմությունը, որ փոխանցվում է թեկնածուին, դառնում է դեֆեկտային լեգիտիմություն»,-հայտարարեց նա: