Շիրակի մարզի ջրամբարներում ավելի շատ ջուր կա կուտակված, քան անցած տարի

Շիրակի մարզի ջրամբարներում լցվածությունը, անցած տարվա նույն ժամանակահատվածի համեմատ, ավելին է: Սրան նպաստել են տեղումնառատ եղանակները: Ջրօգտագործող ընկերության մասնագետները կանխատեսումներ են անում, որ Արփիի, Վարդաքարի, Սառնաղբյուրի, Մանթաշի ու Կառնուտի ջրամբարներում բավարար քանակության ջուր կկուտակեն և ոռոգման սեզոնին խնդիրներ չեն լինի: Վիճակը փոքր-ինչ այլ է Ախուրյանի ջրամբարում, որտեղ, անցած տարվա համեմատ, 70 մլն-ով ավելի պակաս է ջուր կուտակվել:

Ախուրյանի ջրամբարի թողունակությունը 525 մլն խորանարդ մետր է: Այն ոռոգման ջրով է ապահովում Արմավիրի, Արագածոտնի, մասամբ Շիրակի մարզերը, նաև Թուրքիայի սահմանամերձ շրջանները: Ջուրը Հայաստանն ու Թուրքիան օգտագործում են հավասարապես, երկու կողմից էլ ջրի մուտքեր են ապահովում: Անցած տարվանից Թուրքիայի կողմից հոսքերը պակասել են: Այդ երկիրը ջրամբարներ է կառուցում, ու Ախուրյանի ջրամբար քիչ ջուր է հասնում:

«Ախուրյանի ջրամբարում, ինչքան տեղեկություններ ունենք, Թուրքիայի կողմից հոսքերն են պակասել: Դրան գումարած նաև այն, որ նախորդ տարի Արփիի ջրամբարից ջուրը բաց թողնվեց: Այդ ջուրը լցվեց Ախուրյանի ջրամբար: Հենց Արփի լճից բաց թողնված ջրի հաշվին էր, որ ավելացել էր։ Հիմա Ախուրյանի ջրամբարում, անցած տարվա համեմատ՝ 70 մլն խորանարդ մետրով պակաս է ջուրը: 70 մլն խորանարդ մետրը բավական մեծ թիվ է և մենակ Արփի լճի հետ կապելը ճիշտ չի լինի»,- Shantnews-ին ասել է Շիրակի մարզպետարանի գյուղատնտեսության բաժնի պետ Անդրանիկ Նալբանդյանը:

Հիմա Արփիում 33 մլն 400 հազար խորանարդ մետր ջուր է կուտակվել: Արփին դոտացիոն է Կառնուտի ջրամբարի համար: Իսկ Կառնուտն ապահովում է մարզի ցանքերի մեծ մասի ոռոգումը: Ապրիլին Կառնուտի ջրամբարի մուտքերը կավելանան: Ձնհալը հյուսիսային տարածաշրջաններում դեռ նոր է սկսվել: Ամեն տարի այս ջրամբարում մինչև 17 մլն խորանարդ մետր ջուր է կուտակվում: Նույնքան էլ այս տարի են կանխատեսում:

Անցած տարվանից ավելի շատ կուտակումներ են նաև Վրադաքարի, Սառնաղբյուրի Մանթաշի ջրամբարներում: Շիրակի մարզում 30 մլն խորանարդ մետր ոռոգման ջրի նախնական պահանջարկ է ձևավորվել: Հաշվարկել են, որ պահանջարկը կկարողանան բավարարել: Իրենց հաշվարկը կատարել են՝ հաշվի առնելով  կորուստները:

«ԽՍՀՄ-ից ժառանգություն մնացած ցանցով ենք աշխատում, որը տարիների ընթացքում քայքայվում է: Հիմնանորոգման աշխատանքների համար պետք են խոշոր ֆինանսներ: Մեր ընկերությունը չի կարող նման աշխատանքներ կատարել: Պատրաստվել ենք, որ երբ եղանակները թույլ տան, նախապատրաստական աշխատանքներ կատարենք՝ ձեռքով ու տեխնիկայով մաքրման աշխատանքներ, խիստ անհրաժեշտության դեպքում՝ հատվածային բետոնացումներ»,- Shantnews-ին ասել է «Շիրակ ՋՕ» ընկերության ջրօգտագործման բաժնի պետ Արթուր Սիմոնյանը:

Հատվածային բետոնացված ցանցով ոռոգման ջուրը տեղ է հասնում կորուստներով: Առանձին հատվածներում կորուստները մինչև 80 տոկոսի են հասնում: Այս տարի սուբվենցիոն ծրագրերով հատվածային նորոգումներ են կատարվելու գյուղամիջյան ցանցերի առանձին հատվածներում: Ընդհանուր ցանցի հիմնանորոգման աշխատանքներ, ըստ մասնագետի, երբևէ չեն կատարվել: Մաշված ու ջրակորուստներով ցանցը սպասարկում է մարզի 20 հազար 200 հեկտար ոռոգելի ցանքեր ու տնամերձներ:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։