Սեփականատերերի փոփոխությունը ձգձգում է Գյումրիի նախկին տեքստիլ կոմբինատի հանրակացարանի ապամոնտաժումը

Անձրևային եղանակները պոտենցիալ վտանգ են Գյումրիի խիստ վթարային  շենքերի համար: Տարիներ շարունակ ինքնափլուզվող շենքերում ամեն անձրևից ու ուժեղ քամուց հետո նոր փլուզումներ են գրանցվում: Օրինակը նախկին տեքստիլ կոմբինատի հանրակացարանային մասնաշենքն է,ուր հերթական փլուզումն է օրեր առաջ եղել: Այն շենքն է, որի ապամոնտաժումն օրակարգային է արդեն որերորդ տարին:

Շենքը մեկ տարի է արդեն բնակեցված չէ, մի հատվածը նոր սեփականատեր ունի, որին առայժմ չի հաջողվում մյուս հատվածի սեփականատերերի հետ համաձայնության գալ ու ապամոնտաժումը սկսել:Պարբերաբար փլուզումներ էին նաև երբ շենքը  բնակեցված էր:

Մոտ մեկ տարի է  շենքն այլևս բնակեցված չէ:Վերջին երկու բնակչին սոցիալական բնակարաններ հատկացվեցին: Այդ երկու բնակիչներն էին իբր մեկ տարի առաջ խանգարում շենքի ապամոնտաժմանը: Բնակապահովման ծրագրին զուգահեռ քաղաքապետարանը շենքի սեփականատիրոջը քանդման թույլտվություն էր տվել:

Բնակիչներն իրենց նոր բնակարաններում են ապրում, բայց ուրվականի նմանվող շենքը դեռ տեղում է: Քաղաքի գլխավոր ճարտարապետն է նշում՝ այդ ընթացքում շենքում սեփականատիրոջ փոփոխություն է եղել: Նախկինը  շենքի իր  հատվածը վաճառել է մեկ այլ անձի ու նրան էլ փոխանցել քանդման պարտավորությունը: Նոր սեփականատերը Լյովա Գաբոյանն էր, այժմ էլ նրա մահից հետո ապամոնտաժման գործը ձգձգվում է:

« Այդ սեփականատիրոջ ժառանգներն են հիմա զբաղվում : Նա մահացել է , ժառանգները շարունակում են այդ գործը: ժամկետները կախված են ծավալներից : Կարող է լինել 2 օրվանից մինչև 2 տարի՝ նայած , թե ինչ ծավալի աշխատանքներ է նախատեսված: Մեկնարկից 5-6 ամսվա ընթացքում կարող է քանդեն, ավարտեն»,-Shantnews-ին ասել է Գյումրիի գլխավոր ճարտարապետ Հենրիկ Գասպարյանը:

Գաբոյանի ժառանգները մեզ հետ զրույցում նշեցին, որ պատրաստ են կատարել իրենց պարտավորությունները, այն է՝ քանդել շենքի իրենց պատկանող հատվածը: Սպասում են քանդման թույլտվությանը: Բայց միայն թույլտվությունը բավարար չէ ապամոնտաժումը սկսելու համար: Շենքի մի մասն է իրենցը, որի ապամոնտաժումը հնարավոր չէ առանց մյուս հատվածի : Իսկ մյուս հատվածում սեփականատերերի թիվը երկու տասնյակից ավելին է:

«Շենքի երկրորդ մասում մոտ 20 առանձին սուբյեկտներ կան: Այդ սուբյեկտներից յուրաքանչյուրը մաս ունի և՛ հողից, և՛ բնակելի մասից: Հիմա սեփականատերը կատարում է աշխատանքներ ,որպեսզի նրանց հարցերը կարգավորվեն, այսինքն փոխհատուցումով նրանց սեփականությունը վերցվի և ամբողջ շենքը քանդվի »,-նշել է  Գյումրիի գլխավոր ճարտարապետը։

Այսինքն, այժմ շենքի մեծ մասի սեփականատերը բանակցում է  փոքր  տարածքների  սեփականատերերի հետ նրանց պատկանող հատվածները ևս գնելու համար: Ըստ նրանց, միայն այս դեպքում է հնարավոր շենքն անվտանգ ապամոնտաժել: Իսկ քաղաքի գլխավոր ճարտարապետն ասում է, թե նախկին հանրակացարանը հնարավոր է երկու մասով ապամոնտաժել և քանդման թույլտվություն են պատրաստում խիստ վտանգավոր հատվածի համար:

«Շենքը հնարավոր է երկու փուլով ապամոնտաժել: Շենքը 2 բլոկից է կազմված, առանձնացված երկու շենք է՝ իրար կպած:Մեկն առաջին էտապով կքանդվի, մյուսն էլ կմնա մինչև սեփականատերերի  հարցերը լուծվեն»,- նշել է Հենրիկ Գասպարյանը։

Թե երբ կքանդվի, ժամկետներ չկան, ավելի ճիշտ, քաղաքապետարանի քանդման թույլտվությունը պատրաստ չէ: Բացի դրանից , երաշխքիներ էլ չկան , որ շենքի միայն մի հատվածի ապամոնտաժումը անվտանգ է։ Համենայնդեպս, վերջին փլուզումը տեղի է ունեցել շենքի այն հատվածում, որը համարվում է  համեմատաբար լավ վիճակում գտնվող։

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։