Գյումրիի «Բարեկամության այգու» բարեկարգման ծրագրի հերթական հանրային լսումն է անցկացվել

Գյումրիի «Բարեկամության այգում» բարեկարգման աշխատանքները, ամենայն հավանականությամբ, կմեկնարկեն այս ամռան կեսին: Այս մասին այսօր հայտարարել են IDEA հիմնադրամի ներկայացուցիչները: Հիշեցնենք, այգին սմարթ զբոսայգու վերածելու ծրագիր է ներկայացվել, որը գնահատվել է 10 միլիոն դոլար: Նախագիծը քննարկվել է բոլոր շահագրգիռ կողմերի հետ: Իսկ այսօր անցկացվել է զբոսայգու վերակառուցման նախագծի շրջակա միջավայրի վրա ազդեցության գնահատման և փորձաքննության հանրային քննարկում։

Ցանկացած մեծ շինարարություն սկսելուց առաջ նախ այսպիսի փորձաքննություն է անցկացվում: Թե ինչքան տարածքում են շինաշխատանքներ տարվելու, ինչ կառույցներ ու բուսականություն կա տարածքում, որոնց կարող են շինաշխատանքները խանգարել: Այս ուսումնասիրությունները «Բարեկամության այգում» սկսվել էին դեռ 2 տարի առաջ, երբ այգում տնակային թաղամաս էր: Ծրագրի նախագծումից ու այլ մանրամասներ քննարկելուց առաջ նախ տարածքի տնակներում բնակվողների բնակարանային հարցերը լուծվեցին:

«Այգու տարածքում 24 տնակ կար, որոնցից 20-նն էր բնակեցված: Այդ ընտանիքները փոխհատուցվել են ու տարածքից տեղափոխվել են: Հարակից փողոցների տնակները կխանգարեն շինարարությանը, թե ոչ, այս պահին չեմ կարող ասել: Դա արդեն վերաբերում է հարակից փողոցների ենթակառուցվածքների շինարարությանը: Հետևաբար, դրա հետ առնչվում է շինկազմակերպությունը և երևի թե համայնքապետարանը»,- ասել է ծրագրի ղեկավար Լենա Մուրադյանը:

Հարակից փողոցներում հատուկենտ տնակներ են մնացել: Դրանց հարցը քննարկվելու է ենթակառուցվածքների, մասնավորապես, փողոցների բարեկարգման ժամանակ: Դեպի այգի տանող փողոցները ևս բարեկարգվելու են:

Այգու առանձին հատվածներում ծանր տեխնիկայի աշխատանք չի թույլատրվում: Տարածքում, ուսումնասիրություններով, հայտնաբերել են թփերի եզակի տեսակներ, որոնք պահպանելու են: Միևնույն ժամանակ բազմաթիվ նոր ծառեր ու թփեր են տնկվելու, որոնք Շիրակի մարզի բնակլիմայական պայմաններին հարմարեցված են:

Նախագիծն արդեն պատրաստ է, սպասում են շրջակա միջավայրի վրա ազդեցության փորձաքննության եզրակացությանը: Սրանից է կախված, թե մեկնարկի ինչպիսի ժամկետներ կսահմանվեն : Առայժմ ժամկետները մոտավոր են:

«Եթե ամեն ինչ ընթանա ըստ ընթացակարգի և օրենքով նախատեսված ժամկետներով, ենթադրում եմ, որ այս տարվա ամռան կեսին պիտի որ ընթանա շինարարությունը: Իսկ թե երբ կավարտվի, կախված է շինընկերության աշխատանքների արագությունից: Ծավալը բավական մեծ է, ենթակառուցվածքների մասով բավականին խնդրահարույց է, և շատ աշխատանք կա անելու»,- ասել է Լենա Մուրադյանը:

Այգու դիզայնի վերջնական տարբերակը  Գյումրիում կներկայացվի ապրիլի 25-ից հետո: Ընդհանուր 7 հեկտարից ավելի տարածք է բարեկարգվելու: Ծրագրին կառավարությունը ևս մասնակցում է՝ շուրջ մեկ միլիոն դոլար համաֆինանսավորմամբ:

   «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։