Շիրակավանի փոքր ջրամբարի տարածքում բնապահպանները հսկողություն կիրականացնեն

Անի խոշորացված համայնքի Շիրակավան գյուղում գտնվող փոքր ջրամբարի տարածքում հսկողություն կիրականացվի գյուղապետարանի և «Արփի լիճ» ազգային պարկի աշխատակիցների համատեղ ուժերով: Այս մասին շրջակա միջավայրի նախարարությունը կողմերի հետ համաձայնության է եկել օրեր առաջ, երբ տարածքում որս իրականացնելու, ինչպես նաև աղտոտվածության մասին ահազանգ է ստացվել: Այն  հատուկ պահպանվող գոտի չէ, գյուղի վարչական տարածք է, որտեղ բնադրում են տարբեր տեսակի, այդ թվում՝ «Կարմիր գրքում» գրանցված թռչնատեսակներ: Որսն այստեղ թույլատրելի չէ:

Ախուրյանի ջրամբարից ոչ հեռու այս լճակները գոյացել են 1950-ականներին, երբ տեղանքում հորատում են կատարել ու բնական հանքային ջրի աղբյուր է հայտնաբերվել: Դրան գումարվել են նաև ձնհալի ջրերը: Ջուրը կուտակելու համար 90-ականների սկզբին պատվար է կառուցվել, լճակը դարձել է փոքրիկ ջրամբար, որի ջուրը երբևէ որևէ նպատակով չի օգտագործվել: Փոխարենը տարածքը դարձել է բնադրման վայր տարբեր թռչնատեսակների համար:

«Արփի լիճ» ազգային պարկի մասնագետները տարածքում բնապահպանական գործառույթ են ստանձնել: Տարածքը աղբից են մաքրում և պարբերաբար այցելություններով հսկելու են, որ որսորդներ այստեղ չհայտնվեն: Իսկ հսկողություն սահմանելու պահանջն օրեր առաջ ստացած ահազանգն է եղել:

«Տեղեկատվություն ենք ստացել, որ տարածքում աղտոտվածությունը շատ է և պարբերաբար լինում են կրակոցներ: Մենք, որպես բնապահպանական կազմակերպություն, եկել նայել ենք, որ տարածքում իրականում աղտոտվածություն է: Կրակոցներ մեր այցելությունների ժամանակ չեն եղել, այդ օրը նույնիսկ ձկնորսներ չեն եղել: Մենք մեր հնարավորությունների սահմաններում պարբերաբար կայցելենք: Դա կլինի նաև ոչ աշխատանքային ժամերին և ոչ աշխատանքային օրերին»,- Shantnews-ին ասել է «Արփի լիճ» ազգային պարկ ՊՈԱԿ տնօրեն Մուշեղ Մուրադյանը:

Շիրակավանի վարչական ղեկավարը նշում է՝ 2020-ի աշնանը տարածքում սիրողական որս անողների հնչեցրած կրակոցները վերջինն են եղել:

«Անցած տարի, ես տեղյակ եմ, որ եղել է նման դեպք, հարուցվել է քրեական գործ: Դա 2020-ի հոկտեմբեր ամսին էր: Այս տարածքը որսատեղի չէ, որսը թույլատրելի չէ: Ճիշտ է, ինքը հատուկ պահպանվող տարածք չէ, բայց որսը թույլատրելի չէ: Այստեղ առանձնապես որսալու բան էլ չկա»,- Shantnews-ին ասել է Շիրակավանի վարչական ղեկավար Սլավիկ Վարոսյանը:

Գյումրի-Արմավիր ճանապարհին է լճակը: Մեքենաներից է աղբը թափվում, նաև ձկնորսներն ու տարածքի հովեկներն են իրենց հետևից թողնում: Շիրակավանցիները կուտակված ջրի օգտագործման տարբերակ են առաջարկել կառավարությանը: Ոռոգման ցանց կառուցելու և լճակի ջուրը գյուղ հասցնելու սուբվենցիոն ծրագիր են ներկայացրել:

«Կառուցում ենք փակ ոռոգման համակարգ, հետագայում հանձնենք ջրօգտագործող ընկերությանն ու ապահովենք մեր գյուղի բնակիչներին ոռոգման ջրով: Շիրակավանցիները տեսնում են Ախուրյանի ջրամբարը, տեսնում են այս ջուրն այստեղ կուտակված, որը գնում-լցվում է Ախուրյանի ջրամբար, որը Թուրքիայի հետ կիսում ենք: Մենք կարող ենք այս ջուրը հասցնել մեր գյուղ և զարգացնենք մեր Շիրակավան բնակավայրը»,- Shantnews-ին ասել է Շիրակավանի զարգացման ծրագրերի համակարգող Կարեն Գրիգորյանը:

Սուբվենցիոն հայտը դեռ քննարկման փուլում է: Հաստատելու դեպքում Անի խոշորացված համայնքի և կառավարության համաֆինանսավորմամբ 55 մլն դրամով հնարավոր կլինի ոռոգելի դարձնել Շիրակավանի շուրջ 60 հեկտար տնամերձ հողակտորները:

Ոռոգման համակարգի կառուցումը, ըստ շիրակավանցիների, ևս մեկ բնապահպանական խնդիր կլուծի՝ ջուրը երկար չի մնա կուտակված, և տարածքում ճահճացում չի լինի: Անկախ ծրագրի իրականացումից, տարածքում հսկողություն լինելու է: Բացի շրջիկ հսկող խմբերից, մտադիր են նաև տարածքում տեսախցիկներ տեղադրել:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։