Հրավիրվել է երիտասարդների հիմնախնդիրներին նվիրված կլոր սեղան-քննարկում

ԿԳՄՍ նախարարությունը, Հայաստանում Եվրամիության պատվիրակությունը և «ԵՄ-ն հանուն երիտասարդության» (EU4Youth) ծրագիրն ապրիլի 13-15-ը հրավիրել են «Երիտասարդները Հայաստանում. երիտասարդների զբաղվածության, ձեռներեցության և մասնակցության ամրապնդում» խորագրով երեք նստաշրջանից բաղկացած կլոր սեղան առցանց քննարկում: Հանդիպմանը մասնակցել են երիտասարդների հիմնախնդիրներով զբաղվող պետական մարմինների, ԵՄ պատվիրակության ու ԵՄ անդամ պետությունների, երիտասարդական կազմակերպությունների ներկայացուցիչներ, երիտասարդական քաղաքականության փորձագետներ ու հետազոտողներ, EU4Youth ծրագրի դրամաշնորհառուներ և միջազգային զարգացման գործընկերներ:

Քննարկմանը բացման խոսքով հանդես է եկել ԿԳՄՍ նախարարի տեղակալ Արթուր Մարտիրոսյանը: Փոխնախարարը կարևորել է կրթության, գիտության, մշակույթի և երիտասարդության ոլորտներում ԵՄ-ի հետ շարունակական երկխոսությունը, մասնավորապես՝ մարտի 1-ից ուժի մեջ մտած «Հայաստան-ԵՄ համապարփակ և ընդլայնված գործընկերության համաձայնագրի» լույսի ներքո: Նա շնորհակալություն է հայտնել ԵՄ-ին՝ «Երիտասարդական պետական քաղաքականության 2021-2025 թվականների ռազմավարության» նախագծի մշակման աշխատանքներում շարունակական աջակցության համար, ինչպես նաև կարևորել «ԵՄ-ն հանուն երիտասարդության» (EU4Youth) ծրագրի շրջանակում երիտասարդների զբաղվածության, ձեռներեցության և հանրային կյանքին մասնակցության բարձրացմանն ուղղված նախագծերի իրականացումը: Արթուր Մարտիրոսյանը տեղեկացրել է, որ ռազմավարության նախագծի մշակման աշխատանքներն ընթացքի մեջ են, և նախարարությունն ակնկալում է ԵՄ աջակցությունը նաև ռազմավարության իրականացման շրջանակում, ինչպես նաև փորձագիտական աջակցություն «Երիտասարդության մասին» ՀՀ օրենքի մասով, որը, ըստ փոխնախարարի, նախատեսվում է մշակել հաջորդ տարի:

Նախարարի տեղակալը երիտասարդության ոլորտում Հայաստան–Եվրամիություն հարաբերություններում կարևորել է երիտասարդության շարժունությանն ուղղված ծրագրերը, ինչպես նաև երիտասարդական քաղաքականության բարեփոխումներին ուղղված աջակցությունը: Մարզերում երիտասարդական կենտրոնների հիմնման գործում կարևորելով միջազգային լավագույն փորձի տեղայնացումը՝ նա առանձնացրել է արևելաեվրոպական երկրների փորձառությունը, որոնց համատեքստը համադրելի է Հայաստանի հետ:

ԿԳՄՍՆ երիտասարդական քաղաքականության, լրացուցիչ և շարունակական կրթության վարչության նորանշանակ պետ Գոհար Մամիկոնյանն իր հերթին ներկայացրել է «Երիտասարդական պետական քաղաքականության 2021-2025 թվականների ռազմավարության» նախագիծը: Մասնավորապես, անդրադարձ է եղել ռազմավարության նպատակներին և գործողություններին, երիտասարդների մասնակցությանը պետական և տեղական ինքնակառավարման մարմինների աշխատանքներում, ինչպես նաև ԵՄ և այլ զարգացման գործընկերների հետ երկկողմ և բազմակողմ համագործակցության արդյունքում երիտասարդների կարողությունների զարգացմանը, որը, ըստ Գոհար Մամիկոնյանի, շեշտադրվում է ռազմավարության նախագծում:

Վարչության պետը կարևորել է նաև ռազմավարության շրջանակում միջոլորտային համագործակցությունը, մասնավորապես՝ աշխատանքի, սպորտի, առողջապահության, սոցիալական և երիտասարդության ոլորտների համատեքստում: Գոհար Մամիկոնյանը կարևորել է նաև երիտասարդների մասնակցությամբ ձևավորված աշխատանքային խմբի կողմից մշակվող նախագծի աշխատանքներում տեղական և միջազգային կառույցների հետ խորհրդակցությունները:

Եռօրյա քննարկումների նպատակն է բարձրացնել երիտասարդների զբաղվածության, ձեռներեցության և մասնակցության ոլորտներում առկա միտումների ու մարտահրավերների մասին իրազեկվածության մակարդակը, բացահայտել վերոնշյալ ոլորտներում հայ երիտասարդների խթանման ուղղությամբ հետագա համագործակցության հնարավորությունները, փոխանակվել լավագույն փորձով, ինչպես նաև ներկայացնել ԵՄ կողմից ֆինանսավորվող ընթացիկ դրամաշնորհների շրջանակում կոնկրետ ծրագրային արդյունքներն ու քաղած դասերը: