Գյումրիի տնակային թաղամասերից մեկի բնակիչները բողոքում են խմելու ջրի որակից․ ծորակներից հոսող ջուրը կասկածելի բաղադրության է

Գյումրիի նախկին «Վան» առողջարանի տարածքով է անցնում Ղորղոբա գետակը, որտեղ թափվում են քաղաքի որոշ թաղամասերի կոյուղաջրերը։ Գետակի անմիջապես հարևանությամբ, ընդամենը մի քանի քայլ հեռու, կողք կողքի 4 բնակելի տնակ է: Երբ գետակի ջրերը խցանումներից գնալու տեղ չունեն, հավաքվելով թաղամասում, ամբողջությամբ ճահիճ են գոյացրել, որտեղ գարշահոտություն է և նույն հոտը նաև տնակներում է, սանհանգույցներում:

Հոտը բնակիչների համար գուցե սովորական է դարձել, բայց անսովորն այն է, որ ծորակների խմելու ջրից տհաճ հոտ ու համ է գալիս  արդեն մեկ շաբաթ: Այս մասին SHANTNEWS.am-ի հետ զրույցում ասել են տնակային ավանի բնակիչները։ Տիկին Ժենյան օրական մի քանի անգամ թեյնիկով ջուր է եռացնում, կասկածելի հոտը վերանալուց հետո նոր օգտագործում են:

«Մեկ շաբաթ է՝ ջուրը եռացնում եմ, լցնում եմ բանկաները, թերմոսի մեջ։ Ջրից ահավոր հոտ է գալիս, ինչղ որ ճահիճի ջուրը խմես, առաջվանը չէ»,- ասում է նա։

Տիկին Ժենյան տնակային թաղամասի միակ բնակիչը չէ, որի տան ծորակից մաքուր ջուր չի հոսում: Կասկածելի հոտով ու բաղադրությամբ ջրի պատճառով անչափահաս բնակիչների մոտ առողջական խնդիրներ են առաջ եկել՝ փորլուծություն, սրտթափոց և բարձր ջերմություն։ Այսպիսի ախտանշաններով փոքրիկները հոսպիտալացվել են:

«10 օր առաջ թոռնիկիս հիվանդանոց տարանք, բուժվանք եկանք, մեկ օր առաջ նորից վատացավ, ջերմությունը բարձրացավ, ես համոզված եմ՝ ջրից է, ջուրը որ լցնում ես բաժակի մեջ, սպիտակ փառ է հավաքվում, տակը սև նստվածք է լինում, իսկ հոտը՝ ահավոր տհաճ, խմել հնարավոր չէ»,- ասում է տնակային ավանի բնակչուհին։

Երկու ընտանիքներից նույն գանգատներով հիվանդանոց տեղափոխված փոքրիկների մոտ, բժիշկներն ասել են, որ սննդային թունավորում է։ Ծնողներն այս ախտորոշման հետ համաձայն չեն, քանի որ, ինչպես իրենք են պնդում, սննդային կարգում ոչինչ չի փոխվել և նրանց կասկածը միայն ջուրն է։ ՀՎԿԱԿ մարզային կենտրոնի և «Վեոլիա Ջուր» ընկերության լաբորատորիայի մասնագետները եկան տարածք։ Ինչպես և խոստացել էին տնակային թաղամասի բնակիչներին՝ տեղում ջրից նմուշառում կատարեցին։

Արդյո՞ք ջրում կասկածելի բաղադրության մանրէներ կան, և ինչքանո՞վ է ջուրը վտանգավոր խմելու համար։ Այս հարցերի պատասխանները բնակիչները կստանան երկու օրից: Մինչ ջրի բաղադրության ու որակի մասին պատասխաններ ստանալը, մասնագետները բնակիչներին չարգելեցին ջրի ծորակից եկող ջուրն օգտագործել, բայց ամեն դեպքում, ապահովության համար խորհուրդ տվեցին եռացնել։

Իսկ բնակիչներն այս  երկու օրերի համար նախընտրեցին ավելի ապահով տարբերակը։ Դույլերով ջուր են բերում հարևան, բայց արդեն քանդված տնակի տարածքից, որի ջրագիծը ուրիշ թաղամասից է գալիս։ Համոզված են, որ այն մաքուր է, թեև տնակն ապամոնտաժելուց հետո ջրագծերը մնացել են բաց։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։