Աշոցքի երեք գյուղեր կգազաֆիկացվեն սուբվենցիոն ծրագրերով

Շիրակի մարզի 32 համայնք 70 սուբվենցիոն ծրագիր է ներկայացրել: Դրանք վերաբերում են տարբեր ենթակառուցվածքների անցկացմանն ու վերանորոգմանը: Խոսքը ջրամատակարարման և ոռոգման համակարգերի, ճանապարհների ասֆալտապատման և խճապատման, ինչպես նաև գազաֆիկացման մասին է: Գազաֆիկացումը ծրագրերից ամենաթանկարժեքն է: Կառավարության համաֆինանսավորմամբ գազաֆիկացման սուբվենցիոն հայտ Շիրակի մարզի երկու համայնք է ներկայացրել՝ Մեծ Մանթաշն ու Աշոցքը: Այն գյուղերն են, որտեղ տարիներ առաջ գազաֆիկացման աշխատանքները կիսատ են մնացել և այժմ շարունակվելու են:

Աշոցք խոշորացված համայնքի բնակավայրերում ամեն գյուղացու տան դիմաց աթարի կույտերը պակասել են։ Գյուղացիներն աշնանը հավաքել էին գոմաղբը, պահեստավորել էին ու ամբողջ ձմեռ տները ջեռուցել: Գյուղերում այն անվճար վառելիք է, միայն թե չարչարանքով ստեղծվող:

Ղազանչիում անգամ աթարով լոկալ  ջեռուցման տարբերակ են գտել, համակարգը միացրել են գոմաղբով վառվող վառարաններին:

Տարիներ առաջ Ղազանչիում գազաֆիկացման ծրագիր եղել է: Գլխավոր խողովակաշարն անցկացվել է, ներքին ցանցը նույնպես, բայց կապույտ վառելիքը գյուղացիների տուն չի հասել:

«Ամբողջ գյուղում խողովակներն անցկացվել են: Մնացել էին միայն տնային միացումները, բայց ամեն ինչ դադարեցվեց: Մասամբ խողովակաշարը պահպանվել է: Գյուղացիների պահանջով եմ համայնքի ղեկավարին ներկայացրել գազաֆիկացման անհրաժեշտությունը, և սուբվենցիոն հայտ է կազմվել: Խոսեմ կանանց անունից՝ գազաֆիկացումը մեր հոգսերը կթեթևացնի: Մենք ամբողջ ամառ մեր տնտեսությունների հոգսը հոգում ենք վառարաններով: Եթե գազ ունենանք, մեր հոգսը կթեթևանա»,- ասում է Ղազանչի գյուղի վարչական ղեկավար Լուսինե Սիմավոնյանը:

Գյուղացիները նշում են՝ գործը կիսատ թողնելու հիմնական պատճառն այն է եղել, որ այդ տարիներին մատակարար ընկերություններն էին ցանցն անցկացնում, նրանք էլ հաշվարկել են ու եկել այն եզրակացության, որ 100 տուն ունեցող Ղազանչիում գազի սպառման ծավալները կատարած ծախսերը չեն արդարացնի: Գյուղում բնակչության թիվը չի ավելացել, փոխվել է այն, որ ոչ թե մատակարար ընկերությունը, այլ համայնքն ու կառավարությունն են գազաֆիկացման աշխատանքներն ավարտին հասցնելու: Աշոցք խոշորացված համայնքը գազաֆիկացման սուբվենցիոն հայտ է ներկայացրել 3 գյուղերի՝ Բավրայի, Սարագյուղի և Ղազանչիի համար: Կառավարության համաֆինանսավորման բաժինը 70 տոկոս է, իսկ համայնքինը՝ 30: Ընդհանուր 3 գյուղերում ծրագիրը 60 մլն դրամ կարժենա:

«Մոտավոր հաշվարկներով՝ 3 գյուղերի ամբողջական գազաֆիկացման համար 130-140 մլն դրամ կպահանջվի: Նախատեսել ենք 1-1,5 կմ Ղազանչիում գազատարներ անցկացնել: Ամբողջ ցանցը կազմում է 3 կմ: Հաջորդ տարի ընդլայնելու ենք: Պլանավորել ենք 2-3 տարվա ընթացքում 5 բնակավայր գազաֆիկացնել՝ Թավշուտը, Սիզավետը, Ղազանչին, Բավրան և Սարագյուղը»,- ասում է Աշոցք խոշորացված համայնքի ղեկավար Կարեն Մանուկյանը:

Սուբվենցիոն ծրագրով խողովակաշարը կանցկացվի, բայց տնային միացումները գյուղացիներն են կատարելու: Հարցրել են, գյուղում շատերն են պատրաստ իրենց ուժերով կապույտ վառելիքը տուն հասցնել:

Սուբվենցիոն հայտն արդեն հաստատվել է: Մի քանի օրից նախագծային աշխատանքների համար է մրցույթ հայտարարվելու: Իսկ գազը Աշոցքի գյուղեր նախատեսում են, որ հասնելու է սեպտեմբերին:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։