Տարիներ առաջ ապամոնտաժված խողովակաշարը հեղեղման վտանգ է ստեղծել Շիրակի մարզի 4 գյուղերում

Ջրահեռացման համակարգի բացակայությունը Շիրակի մարզի շատ գյուղերում հեղեղումների վտանգ է ստեղծում: Գյուղերի մեծ մասը ջրահեռացման համակարգ չունի, մյուս մասում էլ խողովակներն ապամոնտաժվել են: Օրինակը Ամասիա խոշորացված համայնքի Ողջի գյուղում է: 4 գյուղերի հեղեղներից ապահովագրած սելավատարը տարիներ առաջ օտարվել է, իսկ հետո խողովակաշարն ապամոնտաժվել է: Հիմա ջուրը գնալու տեղ չունի և հեղեղների, սողանքի վտանգ է ստեղծում Ողջի, Հայկավան, Ոսկեհասկ և Ախուրիկ գյուղերի համար:

Սելավաջրերը Ողջիից հասնում են մինչև Հայկավան, Ոսկեհասկ ու Ախուրիկ գյուղեր: Հեղեղումն այստեղ այս տարվա մարտի 24-ին է եղել: Սելավաջրերը հողամասում ու հարակից տարածքում դեռ մնում են:

«Չգիտեմ, թե ինչ ձևով այդ սելավատարը հայտնվեց ինչ-որ սահմանափակ պատասխանատվությամբ ընկերության հաշվեկշռում և թե ինչպես ապամոնտաժման որոշում կայացվեց: Բավական շատ խողովակներ ապամոնտաժվեցին: Իսկ ինչ խողովակներ որ մնացել են, ամբողջությամբ հողով խցանված են: Մեր համայնքի տարածքը հյուսիսից հարավ 4 կմ է: Ամբողջ երկայնքով կարող է ջուրը վնասներ հասցնել բնակչությանը, լցվել տներն ու տնամերձերը: Դիմել ենք մարզպետարան, որ հնարավորության  դեպքում մասնագիտական հանձնաժողով ուղարկվի, գնահատեն, թե ինչ ծավալի աշխատանքներ պետք է կատարվեն»,- Shantnews-ին ասել է Հայկավանի գյուղապետ Սամվել Մխոյանը:

Ապամոնտաժվել է ջրահեռացման խողովակաշարի միայն մի հատվածը, մյուսը մնացել է Ողջի գյուղի ճանապարհի տակ: Մնացած խողովակաշարն ամբողջությամբ խցանվել է: Ապամոնտաժողները ջրի ճանապարհը փակել են, որ հետո մնացած մասը ևս ապամոնտաժեն: Գյուղացիները խողովակաշարի մնացած մասը քանդել-տանել թույլ չեն տվել:

Անցած տարի 4 գյուղերի ղեկավարները մարզպետարան էին դիմել, պահանջել էին գտնել ապամոնտաժման իրավունք ունեցող ընկերությանը ու պարտավորեցնել սելավատարը կա՛մ նախկին տեսքի բերել, կա՛մ աշխատանքներ տանել ջրի ճամփան բացելու համար:

«Պետք է գային հետլիցք կատարեին, ճանապարհը բացեին, որ ջրերը սելավի ժամանակ հեռանային: Իրենք հակառակն արեցին՝ փակեցին ջրի ճանապարհը, որ մնացած խողովակներն էլ քանդեին ու տանեին: Մենք էլ չթույլատրեցինք ապամոնտաժումը շարունակել: Իրենք էլ ո՛չ եկան, ո՛չ ճանապարհը բացեցին, ո՛չ էլ ջրահեռացում կատարվեց: Կանչեցին, հրավիրեցին տվյալ անձին մարզպետարան: Պարտավորվեց, որ մեկ ամսվա ընթացքում այդ աշխատանքները կկատարի: Մինչ օրս կորած է»,- Shantnews-ին ասել է Ողջի գյուղի վարչական ղեկավար Նորայր Մկրտչյանը:

Սելավատարի վերակառուցման այլընտրանքային տարբերակ գյուղապետերն էլ են առաջարկում: Ըստ նրանց՝ տեխնիկայի կիրառմամբ հնարավոր է ջրի ճամփան բացել, որ սելավները լցվեն Ախուրյան գետը: Այս աշխատանքները գյուղապետարանների միջոցների սահմաններում չեն, բայց պատրաստ են համաֆինանսավորման:

Սելավների վտանգին նաև սողանքի վտանգն է գումարվում: Ողջի գյուղում 2 տուն է սողանքավտանգ հատվածում: Ապամոնտաժված խողովակաշարի տեղում կուտակվող ջուրը գրունտի նստվածքներ է առաջացրել, տներում ճաքեր են:

Հիմա նորից գյուղապետերը դիմել են մարզպետարան գույքագրում ու հաշվարկ կատարելու պահանջով: Սա հասկանալու համար է, թե սելավատարի վերականգնումը ինչ կարժենա և ինչքան տներ ու հողամասեր կհայտնվեն վտանգի տակ:

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom, SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։