Գյումրի գետակի մաքրմանը խանգարում են ջրի վրա կառուցված ապօրինի շինությունները

Գյումրի գետակը վաղուց վերածվել է քաղաքի կոյուղատարի ու միաժամանակ աղբատարի: Տարբեր թաղամասերում գետակի հատվածները պարբերաբար լցվում են կենցաղային ու շինարարարական աղբով, խցանում հունը և հեղեղումների պատճառ դառնում: Իսկ մաքրման աշխատանքներին առանձին տեղամասերում խանգարում են հենց գետակի վրա կառուցված տները, ավտոտնակներն ու ժամանակավոր կացարանները: Այդպիսի շինությունների թիվը ամբողջ գետակի երկայնքով մի քանի տասնյակի է հասնում: Դրանք հիմնականում 88-ից հետո կառուցված ու ապօրինի  համարվող շինություններ են:

Տների տակով անցնող հատվածներում մաքրման աշխատանքներ կատարել անհնար է: Այդ հատվածներին անգամ տեխնիկա չի կարող մոտենալ: Մինչև տներն ու տներից դուրս եկող հատվածները կոմունալ ծառայությունը մաքրում է, իսկ տների տակ ջուրն ու աղբը մնում են, կուտակվում, նեխում: Կոմունալ ծառայության մասնագետները ուսումնասիրել են, թե մաքրման աշխատանքներին խանգարող քանի շինություն կա ու որ հատվածներում են:

«Ամբողջ գետի երկայնքով՝ 50% տեղամասերում հնարավորություն  կա տեխնիկա մոտեցնելու և մաքրելու, մնացած 50%-ում  հնարավոր չէ մաքրել: Կամ խիտ բնակեցված է, կամ ստորգետնյա հատվածներ են, որտեղ անհնար է տեխնիկական աշխատանքներ կատարել: Երեք տեղամասերում կամուրջներ ունենք: Առաջինը Վազգեն Սարգսյան փողոցում է, որտեղից մինչև Գերցեն փողոց 13 տուն կամ ժամանակավոր շինություն կա: Եվս մեկ կամուրջ էլ Խանջյան փողոցում է, որտեղ 15 տուն, ավտոտնակ կամ ժամանակավոր շինություն կա»,- Shantnews-ի հետ զրույցում  ասել է Գյումրիի քաղաքապետարանի կոմունալ ծառայության տնօրենի տեղակալ Արման Շաբոյանը:

Ուսումնասիրությունները կոմունալ ծառայությունն անցած տարի է կատարել: Գետակի վրա գտնվող շինություննհերը հաշվառել են, բայց դրանց կարգավիճակը ճշտելու ու հարկ եղած դեպքում ապամոնտաժելու որոշումը ծառայության իրավասության հարցը չէ: Առանձնացրել են նաև այն հատվածները, որտեղ հեղեղումները հաճախակի են ու հունի լայնացման աշխատանքներ են կատարել:

Գետի հունը լայնացումը մի հատվածում թաղամաս տանող ճանապարհի հաշվին է լինելու, որը կառուցված է նախկին ձորակի տարածքում: Այսինքն հունի լայնացումը կարող է ճանապարհի փլուզման պատճառ դառնալ: Հիմա քաղաքապետարանը ուսումնասիրում է, թե որ տարածքներում է հնարավոր քաղաքային բյուջեի միջոցներով մաքրման և հունի լայնացման, ամրացման աշխատանքներ կատարել, իսկ որտեղ ավելի մեծ միջոցներ կպահանջվեն: ՈՒսումնասիրությունները կատարվում են տարածքային կառավարման և ենթակառուցվածքների նախարարության հանձնարարությամբ :

«Տարածքային կառավարման նախարարությունից ստացված գրության համաձայն մեր ուսումնասիրությունները փոխանցում ենք նրանց: Ինչքան մասը հնարավոր է՝ համայնքի ուժերով մենք կատարում ենք: Առանձնացնելու ենք, թե որ հատվածներում հնարավոր չէ համայնքի ուժերով կատարել, դիմելու ենք իրենց օգնությանը »,-նշել է Արման Շաբոյանը:

Գետակի վրա կառուցված շինությունների գույքագրման տվյալները ևս կոմունալ ծառայությունը փոխանցել է տարածքային կառավարման և ենթակառուցվածքների նախարարությանը։ Պետական միջոցներով մաքրման ու ափերի ամրացման աշխատանքներ երբ ու ինչ ծավալով են կատարվելու, առայժմ պարզ չէ:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։