Գյումրիում կառուցվող 40 բնակարանների շահառուների ընտրությունը հստակեցման փուլում է

Գյումրիում պետական բնակարանաշինական վերջին ծրագիրը 2012թվականին է եղել, երբ Մուշ 2-2-ում կառուցվեցին 1056 բնակարաններ: Դրանից հետո բնակարանաշինական ոչ մեծ ծրագրերը միայն բարեգործական միջոցներով էին: Սոցիալական բնակարաններ կառուցվեցին, իսկ այժմ էլ 40 բնակարան է կառուցվում «Հայաստան» համահայկական հիմնադրամի 2019-ին անցկացրած դրամահավաքի արդյունքում գոյացած միջոցներով: Բնակարանաշինությանը հաջորդելու է շահառուների ընտրության փուլը:

Երկու բնակելի շենքի և մանկապարտեզի հիմքերի ու կրող կոնստրուկցիաների բետոնալցման աշխատանքներն են ընթանում: Հստակ են բնակարանաշինական ծրագրի ծավալներն ու ժամկետները:

«Կառուցվելու է 2 շենք բնակելի և 46 տեղանոց մանկապարտեզ: 40 բնակարան են ունենալու շենքերը: Հատկացվել է շուրջ 1 մլրդ դրամ: Ավարտը նախատեսված է 2022 թվականի վերջին»,- SHANTNEWS-ին ասել է Շիրակի մարզպետարանի ճարտարապետաշինարարական բաժնի պետի պարտականությունները կատարող Մկրտիչ Ասատրյանը:

Տիպային շենքում գործող մանկապարտեզ, որպես այդպիսին, Մուշ 2-2-ում չկա: Նոր մանկապարտեզի կառուցումը թաղամասում նախադպրոցական կրթություն կազմակերպելու հարցն է լուծելու: 40 բնակարանները, իսկ արհեստանոցները, որոնք ձեղնահարկերում են լինելու, անօթևան ընտանիքներին են հատկացվելու: Իսկ թե ինչպես ու ինչ չափորոշիչներից ելնելով են ընտրվելու այդ ընտանիքներն, առայժմ հստակեցման փուլում է:

«Անօթևանների ընտրությունը իրականացնելու է «Հայաստան» համահայկական հիմնադրամը: Իրենց սահմանած չափորոշիչների հիման վրա է լինելու: Այս պահին չափորոշիչները հայտնի չեն: Միայն հստակ է, որ հիմնական չափորոշիչներից է լինելու այն, որ շահառու ընտանիքը սեփականություն չպետք է ունենա»,-նշել է Մկրտիչ Ասատրյանը:

Շահառուների ընտրության հարցում մարզպետարանի ու քաղաքապետարանի աջակցությունը ցուցակների տրամադրումն է: Գյումրիում մի քանի կատեգորիայի անօթևաններ կան՝ երկրաշարժին տուն կորցրածները և չհաշվառվածները, կարգավիճակ չունեցող և տնակում ապրողները, կիսված ընտանիքները: Բոլորի բնակապահովման հույսը հիմա բարեգործական միջոցներով հատկացվող բնակարաններն են ու բնակարանաշինական ծրագիրը:

«Համահայկական հիմնադրամը դեռ պաշտոնապես մարզպետարանին չի դիմել: Մենք տեղեկատվություն չունենք այն մասին, թե ինչ կատեգորիայի մարդկանց կարող է ընդգրկեն: Բազմաթիվ ընտանիքներ իրենց նախաձեռնությամբ գրավոր դիմումներ են ներկայացնում «Հայաստան» համահայկական հիմնադրամին: Իրենք էլ տեղում իրենց աշխատողներով գնում, ուսումնասիրություններ են կատարում: Հնարավոր է իրենք չափորոշիչներով ընտրեն, իսկ հետո մարզպետարանի և քաղաքապետարանի հետ ճշտեն, թե արդյոք ընտրված ընտանիքներին կարելի է առաջնահերթ կարգով բնակարան տրամադրել»,-SHANTNEWS-ին ասել է Շիրակի մարզպետարանի բնակարանային ու ենթակառուցվածքների բաժնի գլխավոր մասնագետ Քնարիկ Մանուկյանը:

Եղած անօթևան ընտանիքներին գումարվել են նաև Արցախում Ադրբեջանի վերահսկողության տակ մնացած բնակավայրերից Շիրակի մարզ տեղափոխվածները: Նրանք ևս բնակարանի կարիքավոր են, բայց այս ընտանիքների հաշվառում ու հերթագրում առայժմ չկա: Ըստ էության, այս ընտանիքները նույնպես կարող են դառնալ բարեգործական բնակարանային ծրագրերի շահառուներ: Մարզպետարանի և քաղաքապետարանի պատասխանատուներն են նշում՝ շենքերի շինարարության ավարտից հետո շահառուների ընտրության հարցում հստակություն կլինի:

Հստակություն ու ժամկետներ չկան ևս մեկ սոցիալական ծրագրի համար: Խոսքը ռադիոգործարանի նախկին հանրակացարանային մասնաշենքերի մասին է, որոնք վերակառուցելու մտադրությունից «Հայաստան» համահայկական հիմնադրամը հրաժարվեց: Շենքերը հատկացվել են «Ֆրանկ Մյուլլեր» շվեյցարական ընկերությանը, որը արհեստագործական կենտրոն հիմնելու ծրագիր է ներկայացրել: Ժամկետները սակայն կրկին անորոշ են:

   «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։