Որտե՞ղ է կորած ցուցանմուշը. ցուցահանդեսի հանձնակատարը պատասխանում է Հայկ Դեմոյանին

ՀԲԹԻ հոգաբարձուների խորհրդի նախագահ, ցուցահանդեսի հանձնակատարն այսօր՝ մամուլի ակումբներից մեկում, տեսակապի միջոցով պատասխանել է թանգարան-ինստիտուտի նախկին տնօրեն Հայկ Դեմոյանի այն հայտրարությանը, թե Փարիզում ցուցադրության տարված ցուցանմուշներից մեկը, որը Գևորգյանի պատասխանատվության տակ է եղել, կորել է:

«Մինչ օրս մենք հետ չեն ստացել մի թանկարժեք ցուցանմուշ, որի պատասխանատուն ինքն է: Գրվել է 20 նամակ: Ո՛չ ինձ, ո՛չ աշխատակցուհուն չեն պատասխանել»,- ասել է Հայոց ցեղասպանության թանգարան-ինստիտուտի նախկին տնօրեն Հայկ Դեմոյանը:

Ասվածին այսօր Ռայմոնդ Գևորգյանն այսպես է արձագանքել.

«Ցուցահանդեսի կուրատորն ընդհանրապես իրեր ստանալու կամ վերադարձնելու հարցով չի զբաղվի, ասիգա քաղաքապետարանն է, որ կզբաղվի: Երբ նամակը եկավ, պատասխանեցի: Անպատասխան չեմ ձգած: Քաղաքապետարանի պաշտոնյաներու հետ ստուգեցի ինչ պատահած է, հետևյալ բացատրությունը ստացա՝ իրերեն մեկը, որ փորագրված տպագրություն է կապված, կարծեմ, Ավրորա Մարդիգանյանի հետ, հատուկ շրջանակի մեջ էր Փարիզի մեջ, և որպեսզի հին շրջանակ նորեն տեղավորվի, ասիգա մյուս իրերու հետ չեն վերադարձրած: Շրջանակը վերահաստատել են վերջը, պաշտոնյան դեսպանատանը հեռաձայնած է, և պարոն մը եկած է դեսպանատունի կողմեն այս շրջանակը վերցնելու համար: Եվ ասկե վերջ չեմ գիտեր՝ ինչ պատահած է»,- ասել է Ռայմոնդ Գևորգյանը:

Հիշեցնենք, որ 2015 թվականին Փարիզի քաղաքապետարանում Հայոց ցեղասպանության 100-րդ տարելիցին նվիրված ցուցահանդես է բացվել: Ցուցահանդեսն ունեցել է «Փարիզը հյուրընկալում է Երևանի Հայոց ցեղասպանության հուշահամալիրը» խորագիրը: Հայոց ցեղասպանության թանգարան-ինստիտուտի հավաքածուի այդ ցուցադրության մեջ ընդգրկված են եղել շուրջ 150 ցուցանմուշներ, որոնցից յուրաքանչյուրը մարդկային ողբերգության այս կամ այն դրվագի մասին բացառիկ տեղեկություն են հաղորդում: Այդ ցուցանմուշները, որոնց մեծ մասն առաջին անգամ է ցուցադրվում Հայաստանից դուրս, ներառել են ցեղասպանության զոհերի, վերապրողների անձնական իրեր, փաստաթղթեր, օրագրեր, լուսանկարներ, թերթեր, օտարերկրյա նպաստամատույց կազմակերպությունների հանգանակության թողարկումներ և այլ բնօրինակ նյութեր են:

ՀՑԹԻ կողմից ներկայացված ցուցանմուշների մեջ բացառիկ տեղ է զբաղեցրել նաև ցեղասպանությունը վերապրած Ավրորա Մարդիգանյանի հավաքածուն, որի բնօրինակներն առաջին անգամ  են ներկայացվել փարիզյան ցուցադրության ժամանակ:

Ռայմնոդ Գևորգյանն այդ ցուցահանդեսի հանձնակատարն էր: