Շիրակի մարզի անտառներում ուժեղացված հսկողություն է

Հանրապետությունում բարձր ջերմային ֆոնով պայմանավորված հրդեհավտանգ իրավիճակ է: Խոսքը մասնավորապես խոտածածկ և անտառածածկ տարածքների մասին է: Սրան գումարվում է նաև հանգստյան գոտիներում հովեկների գործոնը: Ըստ այդմ, օդերևութաբանական ու փրկարարական ծառայությունները հորդորում են պահպանել հակահրդեհային կանոնները: Շիրակի մարզում անտառտնտեսության տարածքը 4000 հեկտար է կազմում, որից 2000 հեկտարը անտառածածկ է:

Գյումրիի «Մայր Հայաստան» հուշահամալիրի հետնամասում  քաղաքի ամենամեծ անտառածածկ տարածքն է, որտեղ ոռոգում խորհրդային տարիներին էլ չի եղել: Դրա համար էլ անտառապահները պատմում են , որ անտառածածկույթ ստեղծելու համար ընտրվել են այն ծառատեսակները, որոնց համար շատ խոնավություն պետք չէ: Միևնույն ժամանակ ցրտադիմացկուն ծառեր են տնկվել:

Առանց ոռոգման անտառը բնական աճ կարողանում է ապահովել: Տարածքն ապահովագրված չէ, սակայն, հրդեհներից: Քաղաքի ծայրամասում է, մարդկանց աչքից հեռու: Ամբողջ անտառն էլ մեկ անտառապահ է հսկում: Ամեն տարի այս տարածքում հրդեհներ լինում են: Վերջինն անցած աշնանն էր:

«Անտառում  սիգարետ են ծխում, գիշերով կրակ են վառում և պայքարել այս ամենի դեմ դժվար է: Մեր աշխատանքային ժամերին չի համապատասխանում: Հիմնական խնդիրը գիշերային ժամերին է ու  հանգստյան օրերին: Շաբաթ-կիրակի մեր պահակները գնում, կանգնում են, հսկում են, որ անտառում կրակ չվառեն:Հրդեհների պատճառը հիմնականում մարդկային գործոնն է:Իսկ շուրջօրյա հսկողություն սահմանել չենք կարող»,- SHANTNEWS-ին ասել է Գյումրիի անտառպետության տնօրենի պահպանության գծով տեղակալ Մկրտիչ Ալեքսանյանը:

Շուրջօրյա հսկողություն Շիրակի մարզի անտառային տարածքներում չկա: Դրա համար անհրաժեշտ է անտառապահների թիվն ավելացնել, ինչն էլ ֆինանսավորում է պահանջում: Շիրակի մարզի 2000 հեկտար անտառածածկ տարածքի հսկողությունը վստահված է 28 անտառապահների: Հրդեհավտանգ իրավիճակը՝ մարդկային գործոնի միջամտությամբ, առաջանում է չոր խոտածածկույթի պատճառով:

«Անցած տարվա խոտը՝ հնուկը, ծառերի տակ է: Հիմա հրդեհային իրավիճակ է ու շատ  վտանգավոր: Մի լուցկի վառելու դեպքում ամբողջ տարածքը կրակի տակ է: Հունիսի վերջը, հուլիսն ու օգոստոսը ամենավտանգավոր շրջանն են Շիրակի մարզի անտառների համար: Ամեն վայրկյան  սպասելի է, որ հրդեհ կարող է լինել»,- SHANTNEWS-ին ասել է անտառապահ Արտաշես Ասատրյանը:

Անտառներում խոտը որպես անասնակեր չեն քաղում՝ մի քանի պատճառներով: Անտառտնտեսությունը թույլտվությամբ գյուղացիներին հնարավորություն տալիս է խոտը քաղել, բայց դա հնարավոր է անել միայն ձեռքով, տեխնիկա անտառում կիրառել չի թույլատրվում:

Մարզի անտառապատ տարածքները հրդեհից ապահովագրելու համար անտառապահները ուժեղացված հսկողության են անցել: Հատկապես հանգստյան օրերին հսկում են անտառների մուտքերն ու ելքերը, տարածքում գտնվող հանգստյան գոտիները: Շիրակի մարզում այս տարի հրդեհի առաջին դեպքը Արթիկի անտառներում է գրանցվել: Մասնագետն է նշում՝ պատճառը հովեկների անզգուշությունն է եղել:

«Արթիկում մոտ 2800 քառակուսի մետր տարածք է վնասվել: Օրը կիրակի է եղել: Մեր պահակները հերթապահել են, տեսել են, որ մարդիկ են տարածքում եղել: Անտառապահները հասել ու օպերատիվ կերպով մեկուսացրել ու մարել են հրդեհը»,- ասել է Մկրտիչ Ալեքսանյանը:

Անտառների մուտքերին թմբեր են կառուցել: Սա հակահրդեհային միջոցառումների շարքից է: Հողաթմբերը հրդեհի դեպքում թույլ չեն տալիս, որ կրակը մի տեղամասից մյուսն անցնի: Քաղաքի անտառային տարածքը մասնավոր շինություններով տարանջատված է հրդեհի ամենամեծ վտանգ ներկայացնող քաղաքային աղբավայրից, որից դուրս եկող ծուխը տարածվում է Գյումրիի մի շարք թաղամասերում:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։