Գյումրիի տրանսպորտային ցանցի նորացման ծրագիրը դեռ գործնական փուլ չի մտել

Գյումրիում գործում է 8 միկրոավտոբուսային երթուղի: 8 երթուղին 90 միկրոավտոբուս է սպասարկում: Տրանսպորտային միջոցները երթուղիների միջև անհամաչափ են բաշխված: Կախված է երթուղու ուղղությունից ու ուղևորների քանակից: Ամբողջ Գյումրիի երթուղային ցանցը սպասարկում է մեկ ընկերություն, որն էլ ամենաշատ տրանսպորտային միջոցներ հատկացրել է այն երթուղուն, որտեղ ուղևորահոսքը մեծ է: Կանգառներում ուղևորների կուտակումներ չկան, ըստ այդմ էլ՝ միկրոավտոբուսներն աշխատում են ուշ-ուշ: Ժամային պարբերականությունն ընտրված է այնպես, որ ամեն մի  երթուղային դատարկ չպտտվի քաղաքի փողոցներով:

«8 երթուղում տարբեր քանակության մեքենաներ են: Կենտրոնական երթուղիներում, որոնք անցնում են Վազգեն Սարգսյան, Շիրակացի փողոցներով, ավելի շատ մեքենաներ են, քան մյուսներում: 8 երթուղին ընդհանուր սպասարկում է 90 միկրոավտոբուս: Երթուղիներն աշխատում են մի քիչ ծանրաբեռնված: Կառավարության որոշման համաձայն՝ ամեն տարի 15 տարին լրացած մեքենաները դուրս են գալիս շահագործումից, ու  սպասարկող ընկերությունը նոր մեքենաներ ձեռք չի բերում: Դրա համար էլ երթուղիները փոքր-ինչ ծանրաբեռնված են»,-Shantnews-ի հետ զրույցում ասել է Գյումրիի քաղաքապետարանի տրանսպորտի բաժնի պետ Արտյոմ Սարգսյանը:

Միկրոավտոբուսների ու ավտոբուսների, այսպես ասենք, «տարիքային ցենզ» գոյություն ունի: Նախկինում այս սահմանը 15 տարին էր, անցած տարվա դեկտեմբերից շահագործման թույլատրելի ժամկետը կրճատվել է ու դարձել 10 տարի: Այսինքն՝ տրանսպորտային միջոցը կարող է աշխատել, հանրային ուղևորափոխադրումներ կատարել, եթե արտադրման օրվանից սկսած մեքենայի տարիքը չի գերազանցում 10 տարին: Ըստ այդմ, քաղաքի երթուղայինները հերթով շահագործումից դուրս են գալու: Փոխարինելու են նոր միկրոավտոբուսները, որոնք սուբվենցիայով են ձեռք բերվելու: Հայտը հաստատվել է, բայց մեքենաների գնման գործընթացը դեռ չի սկսվել:

«Մրցույթ է հայտարարվել, հայտնի է շահող կազմակերպությունը: 65 «ԳԱԶել» մակնիշի մեքենա է ձեռք բերելու՝ 16-17 տեղանոց: Մեքենաները 120 օրվա ընթացքում կազմակերպությունը պարտավորվել է ներկրել Գյումրի, հանձնել մեզ: Իսկ քաղաքի երթուղային նոր ցանցը պատրաստ կլինի սեպտեմբեր-հոկտեմբեր ամիսներին: Շատ մեծ փոփոխություններ չեն լինելու: Էլի 8-9 միկրոավտոբուսային երթուղիներ կլինեն: Նախատեսում ենք մեկ երթուղի նոր ասֆալտապատված Գերցեն փողոցում ավելացնել»,- նշել է Արտյոմ Սարգսյանը։

Մեքենաների քանակն ու մակնիշը որոշվել է մրցույթի արդյունքում: 4 ամսից են դրանք Գյումրի հասնելու, նույն ժամկետներում էլ, ըստ քաղաքապետարանի տրանսպորտի բաժնի պետի, քաղաքի նոր երթուղային ցանցն է գծվելու: Փողոցների ասֆալտապատմանը զուգահեռ, քաղաքապետարանի տրանսպորտի բաժնում խոսում են նոր երթուղային ցանց ունենալու մասին։

Իսկ ինչպես են շահագործվելու նոր միկրոավտոբուսները՝ մրցութայի՞ն, թե՞ քաղաքապետարանի միջոցներով, դեռ հստակ չէ: 65 միկրոավտոբուսները համայնքային գույք են լինելու։ Քննարկվում է երկու տարբերակ: Քաղաքապետարանը կարող է դրանք վարձակալության տալ մասնավոր սպասարկող ընկերությանը կամ ինքը շահագործել: Վերջնական որոշում կայացնելու են, երբ տրանսպորտային միջոցները տեղ հասնեն և քաղաքի երթուղային ցանցն ունենան:

Թիվ 1 և 40 ավտոբուսային երթուղիները չեն շահագործվում, չինական ավտոբուսները շուտ շարքից դուրս են եկել, բայց քաղաքի երթուղային ընդհանուր ցանցում ավտոբուսային երթուղիները պահպանվում են: Քաղաքապետարանը պարբերաբար մրցույթներ է հայտարարում նաև դրանց շահագործման համար: Մրցույթների ժամկետները լրանում են, մասնակցության հայտ ներկայացնողներ չկան:

  «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։