Էներգամատակարարման մաշված ցանցն ամենօրյա վթարների ու հոսանքազրկումների պատճառ է դարձել Շիրակավանում

Էներգամատակարարման մաշված ցանցը Շիրակի մարզի շատ բնակավայրերում ամենօրյա վթարների ու հոսանքազրկումների պատճառ է դառնում: Օրինակը Անի խոշորացված համայնքի Շիրակավան գյուղում է: Ամբողջ գյուղի հենասյուները փտած են, էլեկտրահաղորդման գծերը՝ մաշված: Գրեթե ամեն օր քամու հետևանքով ամբողջ գյուղը հոսանքազրկվում է:

Օդում խճճված հոսանքալարերը պահում են թեքված, ծուռ շարք կազմող հենասյուները: Դրանք տեղադրվել են 1982-ին, երբ Ախուրյանի ջրամբարի շինարարությամբ պայմանավորված, Շիրակավան գյուղը տեղափոխվել է նոր տարածք: Հետո հենասյուները տեղափոխվել են, տեղադրվել գյուղացիների բակերում ու տնամերձներում:

«Հոսանքազրկվում է ամբողջ գյուղը, որովհետև հենասյուները տապալվում են քամուց, լարերն իրար մոտ են մոնտաժված: Ամեն օր քամու հետևանքով հրավառություն է մեր գյուղում: Խնդիրը շատ հին է, ինչպես հին են մեր հենասյուներն ու հաղորդալարերը: Մասնակի լուծումներով խնդիրը չի լուծվի: Էներգամատակարար ընկերությունը պետք է շահագրգռված լինի, փուլ առ փուլ լուծեն գյուղի խնդիրը»,- Shantnews-ին ասել է Շիրակավանի վարչական ղեկավար Սլավիկ Վարոսյանը:

Բոլոր գյուղացիների տներում հոսանքի պատճառով շարքից դուրս եկած կենցաղային տեխնիկա կա: Կարճ միացման հետևանքով հոսանքի տատանումներ են առաջանում:

Էլցանցերի գյուղի տեսուչն է նշում՝ ամբողջ Շիրակավանի էներգամատակարարման ցանցը ենթակա է նորացման: Որպես ապացույց էլ՝ հենասյուներն է ցույց տալիս: Փայտե հենասյուները վաղուց են շարքից դուրս եկել, փտած են ու խիստ վտանգավոր: Թեթև քամուց հենասյուները ճոճվում են: Գյուղացիներն են պատմում, որ վթարային հենասյուների վրայից անգամ արագիլներն են իրենց բները տեղափոխել:

Էլցանցերի գյուղի տեսուչը նշում է, որ մի քանի անգամ ինքն էլ է դիմել իր վերադասին: Էլցանցերի Անիի մասնաճյուղի պատասխանն է մեզ փոխանցում, որ Շիրակավանում էներգամատակարարման ցանցի նորացումը փուլային է լինելու: Առաջին փուլն առաջիկա օրերին կսկսվի: Գյուղի մի հատվածում չափագրումներ ու հաշվարկ են կատարել:

«Հաշվարկ ենք կատարել: 500 մետր տարածքում  հենասյուները և հաղորդալարերը պետք է փոխվեն, նորացվեն: Այսինքն՝ աշխատանքները Շիրակավանում պետք է սկսվեն: Իսկ թե ինչքան կտևեն այդ աշխատանքները, ամբողջ գյուղում կկատարվեն, թե միայն մի հատվածում, ես չեմ կարող ասել: Հիմա վիճակն այսպիսին է, որ ես եմ հոսանքազրկում գյուղը: Քամու հետևանքով հաղորդալարերը փաթաթվում են իրար, կտրվում են, ես էլ նորոգելու համար 3-4 ժամով հոսանքազրկում եմ գյուղը»,- Shantnews-ին ասել է ՀԷՑ Շիրակավանի տեղամասի տեսուչ Գոռ Հորվեխյանը:

Շիրակավանում, ըստ տեսուչի, մոտ 130 հենասյուն կա: Էլցանցում որոշել են, դրանցից առայժմ նորերով են փոխարինվելու 15-16-ը: Սա գյուղում մոտ 30 տան համար կապահովի անխափան  էներգամատակարարում: Նաև վարչական ղեկավարին  էլցանցերից վստահեցրել են, որ գյուղի ցանցի փուլային նորացումը որպես առաջնահերթություն են դիտարկում, այսինքն՝ Շիրակավանը էլցանցի ներդրումներին սպասող բնակավայրերի ցանկում առաջիններից է:

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։