Քաղաքացիները զրպարտել են քննիչներին ու ոստիկաններին. ՀՔԾ

Հատուկ քննչական ծառայությունում կատարված նախաքննությամբ ձեռք բերված բավարար ապացույցներով բացահայտվել է, որ  ոստիկանության և ՀՀ քննչական կոմիտեի պաշտոնատար անձինք հանիրավի մեղադրվել են պաշտոնեական դիրքը չարաշահելու և պաշտոնեական լիազորություններն անցնելու, առանձնապես ծանր հանցագործության վերաբերյալ ապացույցներ կեղծելու մեջ:

Քաղաքացի Հայկ Աբաղյանը, նախազգուշացված լինելով սուտ մատնություն կատարելու համար նախատեսված քրեական պատասխանատվության մասին, հաղորդում է տվել, որ քննչական կոմիտեում սպանության դեպքի վերաբերյալ քննված քրեական գործով քննիչ Ռաֆիկ Ավագյանը 2016թ.-ի մայիսի 16-ին և 17-ին իր ցուցմունքներում ներառել է իրականությանը չհամապատասխանող տեղեկություններ: Ըստ դրանց՝ իբր ինքը ականատես է եղել 2016թ.-ի մայիսի 15-ին Եղեգնաձոր քաղաքում տեղի ունեցած սպանությանըմ, տեսել է, թե ինչպես է  խուլիգանության դեպքի ժամանակ անհայտ անձը ընկերոջն ու իրեն սուր գործիքով հարվածել, նկարագրել հարվածող անձին:

Հատուկ քննչական ծառայությունում հիշյալ քրեական գործի նախաքննության ընթացքում ձեռք բերված բավարար ապացույցներով,  հարցաքննված անձանց և Հայկ Աբաղյանի ինքնախոստովանական ցուցմունքներով հերքվել են վերջինիս պնդումները: Հայկ Աբաղյանը խոստովանել է, որ սուտ մատնություն կատարելու քայլին դիմել է դատաքննության ընթացքում ավելորդ պատասխաններից խուսափելու համար: Քննիչը քրեական գործում ներառել է իր տված իրական ցուցմունքները: Կասեցվել է քննչական կոմիտեի քննիչ Ռ. Ավագյանի նկատմամբ քրեական հետապնդում ը, իսկ Հայկ Աբաղյանի կողմից ծանր հանցագործության վերաբերյալ սուտ մատնություն կատարելու դեպքի առթիվ հարուցվել է քրեական գործ: 

Մեկ այլ քրեական գործ էլ հարուցվել է բնակարանային գողության մեջ մեղադրվող, «Արմավիր» քրեակատարողական հիմնարկի կալանավոր Արսեն Սարգսյանի կողմից հանցագործության մասին սուտ մատնություն կատարելու փաստով: Նա Հատուկ քննչական ծառայությունում հաղորդում է տվել, որ ոստիկանության Արարատի բաժնի ծառայողներ Մանուկ Մանուկյանն ու Տարոն Բարսեղյանը Արարատի մարզի բնակարաններից գումարի և ոսկյա զարդերի գողություն կատարելու կասկածանքով իրեն բերման են ենթարկել ոստիկանություն, որտեղ ընթերակաների ներկայությամբ ենթարկել են անձնական խուզարկության: Արսեն Սարգսյանը հայտնել է, որ  արձանագրությունը կազմելուց հետո, երբ ընթերակաները դուրս են եկել սենյակից, ոստիկաններից մեկը երկու զարդ է դրել իր վերարկուի ծոցագրպանը, այնուհետև նորից ներս հրավիրել ընթերականերին ու արձանագրել, թե, իբր, նշված զարդերը ևս հայտնաբերվել են անձնական խուզարկությամբ` որպես իր կողմից գողացված իրեր:

Կատարված քննչական և այլ դատավարական գործողությունների արդյունքում ձեռք բերված ապացույցներով հիմնավորվել է, որ Արսեն Սարգսյանը նախաքննական մարմնին ակնհայտ սուտ տեղեկություններ է հաղորդել  ոստիկանության Արարատի բաժնի ծառայողների կողմից պաշտոնեական դիրքը չարաշահելու և պաշտոնեական լիազորություններն անցնելու վերաբերյալ: Որոշում է կայացվել հիշյալ ոստիկանների նկատմամբ քրեական հետապնդումը չիրականացնել՝՝ հանցադեպի բացակայության հիմքով: Արսեն Սարգսյանի կողմից հանցագործության վերաբերյալ սուտ մատնություն կատարելու դեպքի առթիվ հարուցվել է քրեական գործ:

Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: