Շիրակի մարզի Գառնառիճ գյուղի դպրոցի մարզադահլիճը կվերանորոգվի սոցիալական ծրագրերի միջոցով

Արփի խոշորացված համայնքի Գառնառիճ գյուղում դպրոցի մարզադահլիճի վերանորոգումը որոշել են սոցիալական պատասխանատվությամբ իրականացնել: ՄԱԿ-ի պարենի ծրագրով գյուղում ջերմատուն է կառուցվել և թռչնաֆաբրիկա է հիմնվել: Ջերմատունը հանձնվել է դպրոցին, իսկ թռչնաֆաբրիկան՝ անհատ ֆերմերային տնտեսությանը: Հեռավոր գյուղում այս ծրագրերը զարգացման ու աշխատատեղերի ստեղծման նպատակ են հետապնդում: Բոլորը միասին՝ գյուղովի, աշխատում են ու որոշել են, որ ստացված  եկամուտը ներդնելու են գյուղում, սպորտդահլիճն են վերանորոգելու:

Գառնառիճի դպրոցի շենքը 1970-ականներին է կառուցվել: Այն ժամանակ մի քանի հարյուր աշակերտ ունեցող դպրոցի համար նաև հանդիսությունների ու մարզադահլիճ է կառուցվել: Սպորտդահլիճը վաղուց արդեն չի օգտագործվում, դարձել է վայրի աղավնիների բնադրման վայր:

Գառնառիճի դպրոցն ու մանկապարտեզը միասին հիմա ընդամենը 39 աշակերտ ունեն: Աշակերտների թիվը փոքր է, ըստ այդմ էլ, դպրոցում վերանորոգումների համար պետական ֆինանսավորում չեն ստացել: Մարզադահլիճը վերանորոգելու համար անհրաժեշտ գումարը հայթայթելու այլ տարբերակ են գտել: Գյուղատնտեսությամբ են գումար վաստակելու: Դպրոցի ուսուցիչներն ու սպասարկող անձնակազմը ազատ ժամանակ դպրոցի հարևանությամբ գտնվող ջերմոցում են աշխատում։

«Ջերմոցը սոցիալական հարցեր պետք է լուծի դպրոցի համար: Նախնական պլաններով՝ ինչ եկամուտ, որ ստացանք, պետք է ուղղենք սպորտդահլիճի վերանորոգմանը: Ջերմոցում հերթապահություն ենք դրել, առավոտյան ու երեկոյան ջրում ենք: Միասնական պետք է աշխատենք: Ուրիշ հնարավորություն  չկա: Մեծ ֆինանսների հույսեր չունենք, ոչ էլ հույս ունենք, որ ինչ-որ մեկը մեզ պետք է օգնի: Մասնագետներն ասել են, որ ամեն քաղին 250 կգ բերք ենք ստանալու: Տարեկան մինչև 7 տոննա բերք է տալու ջերմոցը»,- Shantnews-ին ասել է Գառնառիճի միջնակարգ դպրոցի տնօրեն Նաիրա Աբրահամյանը:

Ինչքան շատ բերք, այդքան շատ եկամուտ: Իսկ ինչքան շատ եղավ եկամուտը, այդքան ավելի իրատեսական ու կարճաժամկետ կլինի սպորտդահլիճի վերանորոգումը: Դեռ հաշվարկներ չունեն, թե ինչքան գումար կպահանջվի: Որոշել են՝ պոմիդորի բերքը Գյումրիում ու հարևան գյուղերում են վաճառելու, հասույթը հնարավորություն կտա իրենց հարցերն ինքնուրույն լուծել:

Կրկին սոցիալական ուղղվածության մեկ այլ ծրագիր էլ նույն դպրոցի ինֆորմատիկայի ուսուցիչն է ձեռնարկել: ՄԱԿ-ի պարենի ծրագրի աջակցությամբ Գառնառիճում թռչնաֆաբրիկա է հիմնել: Ֆերմերային այս տնտեսությունն իր տեսակով եզակի է Գառնառիճում: Այս տարածաշրջանում հիմնականում անասնապահությունն է զարգացած: Թռչնաֆաբրիկան հեռավոր գյուղում մի քանի խնդիր է լուծելու:

«Մոտ 1000 հատ հավկիթ ենք դրել, ճուտիկներ են դուրս եկել ու 100 հատ էլ հավ  ՄԱԿ-ի ծրագրով է մեզ հատկացվել՝ սկզբի համար: Հետագայում նախատեսել ենք շատացնել, մինչև 600 ածան հավ ենք ունենալու: Նախատեսել ենք աշխատատեղեր ստեղծել, աշխատողները լինելու են երիտասարդ ընտանիքները, որպեսզի գյուղից արտագաղթ չլինի: Իսկ եկամտից ուզում ենք ներդրում կատարել, գյուղում խաղահրապարակ ունենալ, նաև դպրոցի մարզադահլիճը վերանորոգել: Պայմանավորվածություն ունենք նաև, որ Արփի համայնքի դպրոցահասակ երեխաներին  ձու պետք է տանք սնունդի հետ: Այս պահին 75 աշակերտ ունենք: Հուսով եմ՝ կմեծանա այս թիվը »,-Shantnews-ին ասել է Գառնառիճի դպրոցի ինֆորմատիկայի ուսուցիչ Էդգար Ամիրյանը:

Թռչնաֆաբրիկան աշխատում է արևային կայանից ստացվող էներգիայով: Հիմա ամռանը, երբ արևը շատ է , ստացվող էներգիան նույնպես, կուտակում են, էլցանցերին վաճառում հոսանքը: Էներգախնայողությունից ստացված եկամտից ու թռչունների ձվատվությունից տարածաշրջանի գյուղերին մասհանում կատարելու պարտավորություն է ստանձնել երիտասարդ ֆերմերը:

Արփի համայնքի կազմում 9 գյուղեր են: 9 դպրոցում միասին 75 աշակերտ է սովորում: Եթե աշակերտների թիվն ավելանա, ֆերմերի պարտավորությունն էլ կավելանա: Ֆերմերային տնտեսության ու գյուղի զարգացման հույսը Գառնառիճի երիտասարդ ընտանիքներն են, որոնց գյուղում մնալու առաջնային պայմանը աշխատատեղերի ստեղծումն է։

  «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։