Հիմնանորոգվում է Շիրակի մարզի Անուշավան-Արթիկ ճանապարհը

Շիրակի մարզում պետբյուջեի հատկացումներով մի շարք հանրապետական, միջպետական, մարզային ու համայնքային նշանակության ճանապարհներ են հիմնանորոգվում: Մարզի ճանապարհաշինական աշխատանքների բյուջեն կազմում է 24 մլրդ 350 մլն դրամ: Այս գումարային հաշվարկում Գյումրիի փողոցաշինական մեծ ծրագիրն է, ինչպես նաև Հյուսիս-Հարավի Տրանշ 3-ը: Մրցույթների արդյունքում տնտեսված գումարներով նախատեսված է ևս 3 ճանապարհահատված հիմնանորոգել: Դրանցից մեկը Անուշավան-Արթիկ ճանապարհն է, որի հիմնանորոգումը սկսված է: 7 գյուղեր Արթիկին կապող ճանապարհը անանցանելի էր:

Ընդհանուր ճանապարհի երկարությունը 6 կմ է: Այս տարվա ճանապարհաշինական ծրագրում ընդգրկվել է ուղիղ կեսը՝ հիմնանորոգվում է Անուշավան-Արթիկ հատվածը: Ընտրվել է այն տեղամասը, որն ամենավատ վիճակում է եղել ու ամեն տարի երթևեկելի վիճակի է բերվել ընթացիկ նորոգումներով՝ փոսալցումներով:

Ճանապարհի այդ հատվածը 10 տարի առաջ է հիմնանորոգվել: 2010-ին դարձյալ պետբյուջեի ֆինանսավորմամբ  ասֆալտապատվել է, բայց նորոգումից կարճ ժամանակ անց դարձել է անանցանելի: Անուշավանի գյուղապետը նշում է, որ  պատճառը ինժեներական ոչ ճիշտ հաշվարկներն էին:

«Ինժեներական ոչ ճիշտ հաշվարկներ էին կատարվել: Տեղանքը չէր ուսումնասիրվել, նստվածքներ առաջացան: Դա ինժեներական ոչ ճիշտ աշխատանքի արդյունք էր: Հիմնանորոգումից անմիջապես հետո ճաքեր առաջացան, քայքայվեց ճանապարհը: Դրանից հետո շինարարը մասնակի վերանորոգեց: Մի քանի անգամ համայնքապետերով ենք փոսալցում կատարել, որ անցանելի լինի: Այս ճանապարհից օգտվում է 7 համայնք: 7 համայնքի տրանսպորտային ճանապարհը դեպի Արթիկ այստեղով է անցնում»,- SHANTNEWS-ին ասել է Անուշավանի գյուղապետ Երվանդ Հակոբյանը:

10 տարի առաջ նոր ասֆալտն արվել է հնի վրա՝ առանց հիմքի ամրացման աշխատանքների: Տարածքում նաև գրունտային ջրեր կան, ինչի հետևանքով ճանապարհին նստվածքներ են առաջացել: Հիմա նոր հիմք է կառուցվում: Շինարարը հինը քանդել է, և ճանապարհի շարքից դուրս գալու պատճառներն ի հայտ են եկել:

Այսինքն, ճանապարհի հիմքի, այսպես ասած, չորացում է կատարվում: Գրունտային ջրերը տարիներով ճանապարհի հիմքը քայքայել են: Հիմա քայքայված հողաշերտը պարզապես հեռացնում են:

«Ներքևում բացվել են տեղեր, որտեղ ջրային մասեր գոյություն ունեն: Այդ ամենը հեռացնում ենք: Ամբողջությամբ հողը, որը ճահիճ է դարձել լրիվ հեռացնում ենք, տեղը նոր նյութ, նոր գրունտ ենք լցնում »,- SHANTNEWS-ին ասել է «Մերձմոսկովյան» ԲԲԸ աշխղեկ Սամսոն Հովհաննիսյանը:

Նոր հիմքը կառուցել են, անցել ջրահեռացման համակարգի նորոգմանը: Անուշավանում ջրահեռացում և ոռոգում նույն խողովակաշարն է ապահովում: Բետոնյա կիսախողովակները մետաղականով են փոխարինում:

Ջրահեռացումն ապահովելու է ճանապարհի երկարակեցությունը: Այժմ շինաշխատանքները խճապատման փուլում են: Արթիկ տանող միակ ճանապարհն ու շինաշխատանքների պատճառով գյուղամիջյան հատվածում երբեմն խցանումներ են առաջանում և շինարարները իրենց գործից բացի երթևեկությունն են կանոնակարգում ու արտակարգ իրավիճակում հայտնված մեքենաների վարորդներին օգնում:

Շինաշխատանքների վերջնաժամկետը տարեվերջն է սահմանված: Սրանով Փանիկ-Անուշավան-Արթիկ ճանապարհի միայն մի հատվածն է նորոգվում: Եվս 3 կմ ճանապարհ, որն ընդգրկում է Փանիկից-Արթիկ հատվածը, նախատեսված է ընդգրկել հաջորդ տարվա ճանապարհաշինական ծրագրերում:

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։