Գյումրեցի տարեց կանայք յուրացնում են թաղիքագործության արհեստը

Տարիքը միայն թիվ է, և երբեք էլ ուշ չէ նոր բան սովորելու համար: Սա գործով ապացուցում են «Հայկական կարիտաս» հասարակական կազմակերպության տարեցների ցերեկային հոգածության կենտրոնի շահառուները: 4 տարեց կանայք իրենց կյանքի 8-րդ տասնամյակում որոշել են նոր մասնագիտություն ձեռք բերել: Խոսքը թաղիքագործության մասին է: Թաղիքից ոտնամաններ են պատրաստում, ուսումնասիրում այս արհեստի նրբությունները: Սիրողական զբաղմունքը դարձել է ամենօրյա աշխատանք ու համատեղ արտադրանք թողարկելու հնարավորություն:

Ժամանակին Հայաստանում թաղիքագործությամբ զբաղվել են բացառապես տղամարդիկ: Թաղքադիր կամ լպուտ լինելու համար ուժ էր պետք բուրդը թաղքելու համար: Գզած բուրդը համաչափ փռում էին հատակին, գերանը գլորում վրայով` մինչև ամբողջովին թաղքվելը: Ձեռքի ուժ պահանջող գործը գյումրեցի տարեց կանայք են յուրացնում: Տիկին Թամարան, Անահիտն ու Սանդուխտը, որ իրենց կյանքում երբևէ արհեստով չեն զբաղվել, հիմա դարձել են հմուտ արհեստավորներ: Բուրդը թրջում են, օճառի օգնությամբ ու հատուկ կաղապարներով ձև տալիս, բրդե ոտնամաններ ստանում:

Վալերիան թաղիքագործության վարպետն է: Աշակերտների զավակների ու թոռների տարիքին է, բայց սա, ասում է, չի խանգարում լավ հարաբերություններ ունենալու և ուսումնական պրոցեսը ճիշտ կազմակերպելու համար: Զարմանքով է նշում, որ տարեց կանայք շատ արագ են յուրացրել արհեստը:

«Ինձ համար հայտնություն էր, որ այդ տարիքում ու այդքան խինդով են նրանք նոր բան սովորում: Արդյունքը հոյակապ է, շատ լավ աշխատանքներ ունենք: Իրենք լիովին սովորել են նոր արհեստը՝ թաղիքագործությունը: Հիմնականում հողաթափեր են պատրաստում: Իրենցից ոչ մեկը երբևէ արհեստով չի զբաղվել և հիմա մեծ ոգևորությամբ են սովորում»,- SHANTNEWS-ին ասել է թաղիքագործ Վալերիա Մելքոնյանը:

Թաղիքագործության խմբակը սկզբում ընդամենը տարեցների առօրյան հագեցնելու համար էր: Շատերն էին մասնակցում: Հետո խմբակի անդամներից 4-ը որոշել են սիրողական զբաղմունքը մասնագիտություն դարձնել: Մեկը հացամթերման գործարանում է աշխատել, մյուսը՝ սառնարանային տնտեսությունում, երրորդը՝ խանութում վաճառող, իսկ խմբի ամենաարագաշարժ աշակերտը՝ 71 ամյա տիկին Թամարան, ամբողջ կյանքում գուլպայի ֆաբրիկայում է աշխատել: Գործող արտադրամասում մեքենաներն են գործել, իսկ այստեղ բացառապես ձեռքի աշխատանք է կատարում:

«Միշտ սիրել եմ աշխատել: Ոչ մի վայրկյան անգործ մնալ չեմ կարող: 71 տարեկան եմ և 16 տարեկանից աշխատել եմ գուլպայի ֆաբրիկայում: Տարիքը կապ չունի, եթե սիրում ես աշխատանքդ, ուրեմն ամեն ինչ կստացվի: Եթե ընդունակ ես աշխատելու, ուրեմն պարապ չպետք է մնաս, պետք է բարիք ստեղծես մարդկանց համար»,- SHANTNEWS-ի հետ զրույցում նշել է Թամարա Կարապետյանը:

Տարեց կանայք իրենց կյանքի ընթացքում ձեռք բերած հմտությունները ներդնում են նոր սկսած գործում: Պատրաստի թաղիքե ոտնամանների վրա մեկն ասեղնագործում է, մյուսը՝ կարում: Համատեղ աշխատանքի արդյունքը պատրաստվում են ցուցահանդեսում ներկայացնել: Տատիկները մտադիր են, բացի ոտնամաններից, պայուսակներ ու այլ իրեր պատրաստել՝ ընդլայնել թաղիքե արտադրությունը: Սրանով իսկ տարեց կանայք ապացուցում են՝ տարիքն ընդամենը թիվ է, որն իրենց ցանկությունների ու հնարավորությունների հետ այս դեպքում ոչ մի կապ չունի:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։