«Շիրակ» օդանավակայանի վազքուղին վերանորոգվում է և կառուցվում է նոր ժամանման սրահ

«Շիրակ» օդանավակայանում 7,5 մլն դոլարի ներդրում է կատարվել, որով նոր ժամանման սրահ է կառուցվում, ինչպես նաև վազքուղին է նորոգվում։ Այս աշխատանքներով պայմանավորված՝ Գյումրիի օդանավակայանը չվերթներ չի ընդունում հուլիսի 15-ից։

Վազքուղում ինքնաթիռները տեղը զիջել են ճանապարհաշինարարներին: 3220 մետր երկարության և 45 մետր լայնության վազքուղին կառուցվել է 1963 թվականին և այս տարիների ընթացքում մի քանի անգամ վերանորոգվել է։ Վերջինը 2007 թվականին է եղել: 14 տարի շահագործվելուց հետո, ըստ մասնագետների, վերանորոգումներն անհրաժեշտություն էին:

«14 տարվա շահագործումից հետո բազմաթիվ ճաքեր են առաջացել վազքուղու վրա, կորցրել է իր հատկությունները և կրիտիկական վիճակի էր: Դրա համար որոշվեց վերակառուցել: 2 շերտով ասֆալտապատում է կատարվում: Առաջին շերտը 3 սմ հաստությամբ է, որպեսզի ճիշտ թեքություն և հարթություն ապահովվի, և երկրորդ շերտը՝ 6 սմ հաստությամբ, որը վերջնական շերտն է: Մեր վազքուղին համատեղ օգտագործման է: Պաշտպանության նախարարությունը և քաղավիացիան համատեղ են օգտագործում: Վազքուղու ծածկույթը ծառայում է զինվորական և քաղաքացիական ինքնաթիռների համար»,- լրագրողների հետ զրույցում ասել է «Արմենիա միջազգային օդանավակայաններ» ՓԲԸ տեխնիկական տնօրեն Աշոտ Միրզոյանը:

3 տարվա երաշխիքային և առնվազն 15 տարվա շահագործման ժամկետ է երաշխավորում շինարարը: Ասֆալտի հետ հավելանյութեր են խառնվում, որոնք Հայաստանում միայն օդանավակայանների վազքուղիների համար են օգտագործում: Երկարակեցությունը նաև ջրահեռացման համակարգն է ապահովելու: «Շիրակ» օդանավակայանում կառուցվում է նաև նոր ժամանման սրահ:

«Հին ժամանման սրահը 400 քառակուսի մետր էր, ուղևորները արևին, շոգին, ցրտին կուտակվում էին դրսում, որովհետև սրահը չէր կարող բոլորին տեղավորել: Ժամանման նոր սրահում 1 ժամում կկարողանանք սպասարկել 1 ինքնաթիռ, 250 ուղևոր: Հիմա, փաստացի, Գյումրիի օդանավակայանում տարեկան 250 հազար ուղևորի ենք սպասարկում, նոր ժամանման սրահի շահագործման դեպքում տարեկան սպասարկվող ուղևորների թիվը կդառնա 700 հազար»,- լրագրողներին ասել է  «Արմենիա միջազգային օդանավակայաններ» ՓԲԸ  ենթակառուցվածքների բաժնի շինարարության ղեկավար Սևակ Թահմասյանը:

«Շիրակ» օդանավակայանի հին ժամանման սրահը 400 մետր քառակուսի տարածք է զբաղեցնում, նորը՝ կրկնակի ավելին է՝ 870 քառակուսի մետր: Սա հնարավորություն է տալու 1 ժամում ավելի շատ ինքնաթիռներ ու ուղևորներ սպասարկել, ինչի հնարավորությունը նախկինում օդանավակայանը չի ունեցել:

Ժամանման սրահի կառուցումը կարժենա 1,5 մլն դոլար, իսկ վազքուղու նորոգման համար հատկացվել է 6 մլն: Ընդհանուր «Շիրակ» օդանավակայանի վերանորոգման ու վերազինման ծրագիրը կարժենա յոթուկես մլն դոլար: Ժամանման սրահի կառուցման և վազքուղու վերանորոգման աշխատանքների վերջնաժամկետը սեպտեմբերի 1-ն է: Շինաշխատանքների ավարտից հետո «Շիրակ» օդանավակայանում թռիչքները կվերսկսվեն:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։