Գյումրիի դպրոցներում առաջին դասարանցիների օնլայն հայտագրումները գրեթե ավարտված են

Հանրապետության հիմնական ու միջնակարգ դպրոցներում երկրորդ տարին է առաջին դասարանցիների ընդունելությունն օնլայն կարգով է: Յուրաքանչյուր դպրոց, համաձայն ստացած լիցենզիաների, առաջին դասարանցիների սահմանված թիվ ունի, որից ավելի թվով աշակերտներ ընդունել չի կարող: Առաջին դասարանցիների օնլայն հայտագրումները գրեթե ավարտված են: Համաձայն առայժմ ունեցած տվյալների՝ Գյումրիի գրեթե բոլոր դպրոցներում սահմանված թիվը լրացել է:

Փոքր սեղան ու աթոռներ և գրատախտակ, որն ի տարբերություն մյուս դասասենյակների, ավելի ցածր է կախված: Առաջին դասարանցիների համար նախատեսված դասասենյակներն արդեն պատրաստ են: Գյումրիի թիվ 31 հիմնական դպրոցը երկու առաջին դասարան է ձևավորելու, ըստ այդմ էլ, իրար հարևանությամբ երկու դասասենյակ են կահավորել: Լիցենզիայով սահմանված թվին համապատասխան, թիվ 31 դպրոցն ավելի շատ դասարաններ ձևավորել չի կարող: Դպրոցը թաղային է, քաղաքի այլ տարածքներից այստեղ հատուկենտ աշակերտներ են գալիս: Այս ամենը հաշվարկվել է լիցենզիայով առաջին դասարանցիների թիվ որոշելու համար: Օնլայն հայտագրումը սահմանափակում է աշակերտների ընդունելությունը բոլոր դպրոցներում:

«Առաջին դասարանցիների սահմանային քանակը մեր դպրոցում, ըստ լիցենզիայի, 45 աշակերտ է: Հիմա ունենք հայտագրված  38-ը: Եվս երկու աշակերտ պարտուսի արդյունքներով գիտենք, որ գալու են: Ստացվում է, որ 40 աշակերտ արդեն ունենք: Օնլայն հայտագրումը սահմանափակում է առաջին դասարանցիների ընդունելությունը բոլոր դպրոցներում: Ունենք չէ քաղաքում, այսպես ասած, էլիտար դպրոցներ, որտեղ ծնողները ձգտում են տանել իրենց երեխաներին: Այդ դպրոցներում ևս թիվը սահմանափակ է, և եթե այդ թիվը լրացավ, այլևս չեն կարող տանել այդ դպրոց: Օնլայն հայտագրումով համահարթեցում է արվել, որպեսզի չառաջանա խտրականություն՝ լավ դպրոց, վատ դպրոց»,- Shantnews-ին ասել է Գյումրիի թիվ 31 հիմնական դպրոցի տնօրեն Արթուր Ղազարյանը:

Թիվ 25 հիմնական դպրոցում առաջին դասարանցիների սահմանային քանակը 80 է, բոլոր տեղերը լրացված են: Երկու դասարան են ձևավորելու: Սահմանված տեղերը լրացված են, բայց դիմողներ դեռ կան: Թիվ 25 դպրոցի շենքային պայմանները թույլ տալիս են մինչև 5 առաջին դասարան բացել: Բայց սահմանվածից ավելի առաջին դասարանցիներ ընդունելու համար կրթության, գիտության, մշակույթի ու սպորտի նախարարության թույլտվությունն է պետք:

«Առաջին դասարանցիների հայտագրումը սկսել են հունիսի 13-ից: Մեզ հատկացվել է 80 տեղ և դրանք ընդամենը 1 ժամվա ընթացքում լրացել են: Հիմա ծնողների խնդրանքով դիմել ենք կրթության, գիտության, մշակույթի և սպորտի նախարարություն, որպեսզի սահմանային տեղերն ավելացնեն: Սպասում ենք, թե ինչ կորոշի նախարարությունը»,- Shantnews-ին ասել է Գյումրիի թիվ 25 հիմնական դպրոցի փոխտնօրեն Ռոզա Ղազարյանը:

Առաջին դասարանցիների սահմանային տեղերի քանակի ավելացում հնարավոր է տարրական օղակի մյուս դասարանների հաշվին: Դպրոցները լիցենզիա են ստանում տարրական ու հիմնական կրթություն իրականացնելու համար, և եթե տարրական մյուս դասարաններում աշակերտների թիվը սահմանայինից ցածր է, կարող են թույլտվությամբ փոխարենն առաջին դասարանցիներ ընդունել:

Դպրոցները, որոնք դիմել են առաջին դասարանցիների թիվն ավելացնելու խնդրանքով, հիմա սպասում են նախարարության որոշմանը: Մինչև օգոստոսի վերջ և սեպտեմբերի սկիզբ կարող են հայտագրումներ ընդունել: Այս տարի դպրոց են գնալու 2015 թվականին ծնված երեխաները: Ընդհանուր առմամբ Գյումրիի գրեթե բոլոր դպրոցներում սահմանային թվին համապատասխան առաջին դասարանցիների հայտեր ունեն: Ըստ տնօրենների, սա փաստում է այն մասին, որ 2015 թվականին ծնունդների թիվը մեծ է եղել:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։