Շիրակավան գյուղն անօգտագործելի ջրային պաշարների հաշվին ոռոգման ցանց կառուցելու սուբվենցիոն ծրագիր է ներկայացրել

Ինչպես չօգտագործվող ջրային պաշարները ուղղորդել ցանքերին ու դրանք ոռոգելի դարձնել…Այսպիսի սուբվենցիոն հայտ է ներկայացրել Անի խոշորացված համայնքի Շիրակավան գյուղը: Բնակավայրից ոչ հեռու 80-ականներին կառուցված արհեստական ջրամբարում կուտակված ջուրը պոմպով գյուղ հասցնելու և ոռոգման ներքին ցանց կառուցելու աշխատանքները գնահատվել են 130 մլն դրամ, որի 70 %-ը վճարելու է կառավարությունը, իսկ 30 %-ը՝ համայնքը: Սուբվենցիոն հայտը հաստատվել է, նախագիծն ու նախահաշիվը կազմվել են: Ծրագրի արդյունքում ակնկալվում է, որ Շիրակավանի 200 տնտեսության 58 հեկտար տնամերձ հողամասերը ոռոգում կունենան:

Շիրակավանում ոռոգելի տարածքներ չկան, գյուղի ոռոգման համակարգը տարիներ առաջ է ապամոնտաժվել: Հույսը տեղումներն են, իսկ այս տարին երաշտային էր: Խմելու ջրով են տնամերձները ջրել, բայց հանարավոր չի եղել ժամանակին ու պահանջված քանակով ոռոգում կատարել: Հետևանքը չորացած բույսերն են:

Ոռոգման ջուր ունենալու երաշխիքը սուբվենցիոն ծրագիրն է, որը կառավարությունը հաստատել է: Շիրակավանում մտադիր են գյուղից ոչ հեռու գտնվող ջրամբարի ջուրը գյուղ հասցնել: Այսպես կոչված՝ դեկորատիվ ջրամբարը 80-ականներին  է կառուցվել: Տարածքում հողհատկացումներ էին կատարվել ամառանոցներ կառուցելու համար, իսկ արհեստական ջրամբարը գեղեցիկ տեսարան էր ապահովելու: Ամառանոցներ չկառուցվեցին, իսկ արհեստական լճակում այս տարիների ընթացքում էկոհամակարգը զարգացավ, ջուրն էլ մնաց է անօգտագործելի:

«Ջրամբարը դեկորատիվ, էկզոտիկ  միջավայր է ապահովել: 80-ականներին ջրային կոմիտեն կառուցել է պատվար և չվերահսկվող ջրերը սկսել են այստեղ կուտակվել: Տեղանքում արտեզյան ջրեր կան, դրանց են միանում նաև Գուսանագյուղի բնական աղբյուրներից եկող ջրերը, որոնք շարունակում են իրենց ճանապարհը դեպի Ախուրյան գետ: Մենք այս ջուրը ոռոգման նպատակով օգտագործելու ծրագիր ենք ներկայացրել: Ծավալները բավարար են 50 հեկտար տարածք ոռոգելի դարձնելու համար»,- Shantnews-ին ասել է Անիի համայնքապետարանի զարգացման ծրագրերի համակարգող Կարեն Գրիգորյանը:

Համաձայն սուբվենցիոն ծրագրի նախատեսվում է 58 հեկտար տնամերձների համար ոռոգման ջուր վերցնել ջրամբարից: Համաձայն շրջակա միջավայրի նախարարությունից ստացված ջրօգտագործման թույլտվության, Շիրակավանը ջրամբարից կարող է ջուր վերցնել տարվա մեջ 180 օր՝ 12 ժամյա ռեժիմով: Ջրառի ծավալները հաշվարկվել են այնպես, որ ջրամբարի էկոհամակարգը չտուժի, միևնույն ժամանակ ջրակորուստներ չլինեն:

25 կիլովատ հզորության պոմպ է տեղադրվելու, նաև ոռոգման ներքին ցանց է անցկացվելու: Նախագծային աշխատանքներն ավարտված են, փաստաթղթերը ներկայացված են պետական փորձաքննության, որից հետո հերթը շինմրցույթին է հասնելու: Փաստաթղթավորման ու շինաշխատանքների ծավալի հաշվարկից ելնելով Անիի համայնքապետարանի զարգացման ծրագրերի համակարգողը նշում է, որ սուբվենցիոն հայտը հաստատվել է այս տարի, բայց աշխատանքները կմեկնարկեն 2022-ին:

«Պոմպ է տեղադրվելու և ներքին ցանց է անցկացվելու: Նախագիծը կազմվել է, ուղարկվել է պետական փորձաքննության: Ամենակարևոր փատաթուղթը, որը ջրօգտագործման թույլտվությունն է, արդեն ունենք: Մեկ տարվա կտրվածքով ծրագիրն ավարտին հասցնել հնարավոր չէ: Գործող կարգը թույլ տալիս է, որպեսզի այս տարի շինմրցույթ հայտարարենք, իսկ պայմանագիր կկնքենք այն ժամանակ, երբ ֆինանսավորումը լինի: Մենք այդ ճանապարհով ենք գնալու»,- ասել է Կարեն Գրիգորյանը:

Սուբվենցիոն ծրագրի արժեքը շուրջ 130 մլն դրամ է: Պետություն-համայնք համաֆինանսավորման հաշվարկում Շիրակավանը արտոնություն ունի, որպես սահմանամերձ բնակավայր, ըստ այդմ՝ կառավարության համաֆինանսավորումը կազմելու է 70 , իսկ համայնքինը՝ ընդամենը 30 տոկոս:

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։