Համայնքների խոշորացման ծրագիրը օնլայն հարթակում ներկայացվել է բնակիչների քվեարկությանը

Շրջանառության է դրվել «Հայաստանի Հանրապետության վարչատարածքային բաժանման մասին» օրենքում փոփոխություններ կատարելու մասին» նախագծային փաթեթը, որով նախատեսվում է ձևավորել նոր համայնքային փնջեր: Համաձայն նախագծի, Շիրակի մարզում նախատեսվում է միավորել Ամասիա և Արփի, Աշոցք և Սարապատ համայնքները, իսկ Ախուրյան խոշորացված համայնքին միավորել Մարմաշեն խոշորացված համայնքը ու ևս 10 գյուղեր: Այսինքն, նախագիծն ընդունվելու դեպքում, Շիրակի մարզում կրկնակի խոշորացում է տեղի ունենալու:

Իրավական ակտերի նախագծերի հրապարակման միասնական կայքում տեղեկատվություն է ներկայացված այն մարզերի ու համայնքների մասին, որոնք, համաձայն վարչատարածքային բաժանման մասին օրենքում փոփոխություններ կատարելու նախագծի, նախատեսվում է միավորել խոշորացնել: Այդ ցանկում Շիրակի մարզի արդեն խոշորացված համայնքներն են՝ Ախուրյանը, Մարմաշենը, Աշոցքն ու Ամասիան: Աշոցքում և Ամասիայում այժմ երկուական խոշորացված համայնքներ կան: Նախագծով նախատեսվում է դրանք էլ միավորել՝ Աշոցքում ու Ամասիայում ունենալ մեկական համայնք: Նախագիծն օնլայն հարթակում քվեարկության է դրված: Մասնակցում են խոշորացման ենթակա գյուղերի բնակիչները:

Ոսկեհասկը մեկն է այն գյուղերից, որն ըստ նախագծի միավորվելու է Ախուրյան համայնքին: Ոսկեհասկի ու հարևան ևս 3 գյուղերի խոշորացման տարբերակները քննարկվել են 2017 թվականից: Գյուղապետերն իրենց առաջարկներն են ներկայացրել, որոնք այժմ շրջանառվող նախագծից տարբեր են:

«Մենք առաջարկել էինք, որ փունջ կազմեին Ախուրյան գետի աջ ափին գտնվող մեր 4 գյուղերը՝ Հայկավանը, Ոսկեհասկը, Առափին և Ախուրիկը: Որոշվել էր, որ կենտրոն դառնալու էր Ոսկեհասկ գյուղը: Այդ ժամանակ հավանություն տվեցին, նաև ասացին, որ այդ տարբերակով կլինի խոշորացումը: Հիմա առաջարկում են ամբողջ Ախուրյանի ենթաշրջանը դարձնել մեկ համայնք: Այսինքն՝ ոնց որ հետ ենք գնում մեր քանդածին՝ շրջանային կառուցվածքին ենք գնում, պարզապես անունն է այլ»,- SHANTNEWS-ին ասել է Հայկավանի գյուղապետ  Սամվել Մխոյանը:

Ախուրյան խոշորացված համայնքը 7 գյուղ է ընդգրկում, Մարմաշենը՝ 15: Նախատեսվում է նրանց միացնել նախկին Ախուրյանի տարածաշրջանի ևս 10 գյուղեր: Այսինքն 32 գյուղ միասին կազմելու են նոր՝ ավելի խոշորացված Ախուրյան համայնք:

Բոլոր այս գյուղերը նախկին Ախուրյանի տարածաշրջանն են կազմել: Ունեցել են մեկ ընդհանուր գործկոմ: Այդ տարիներից գյուղերի կապն Ախուրյանի հետ պահպանվել է: Այս գյուղերին սպասարկող պետական կառույցների նստավայրը կրկին Ախուրյանն է:

Խոշորացման հիմնավորումը մեկն է՝ ֆինանսական միջոցների արդյունավետ կառավարումը: Խոշորացում նշանակում է գյուղերում կառավարման ապարատի կրճատումներ, համատեղ ու ավելի մեծ հնարավորություններով բյուջե, որը հավասարապես տնօրինել, ըստ գյուղացիների, հնարավոր չէ:

«Նախագծով նախատեսված է, որ Ախուրյան համայնքը ընդգրկելու է 32 գյուղ: Ես մտածում եմ, որ ով էլ լինի Ախուրյան համայնքի ղեկավարը, պարզապես չի հասցնի բոլոր գյուղերի հարցերով զբաղվել: Մենք համաձայն էինք նախկին տարբերակին, երբ առաջարկվում էր 4 գյուղերը միավորել, բայց Ախուրյանին միանալու իմաստը չենք տեսնում»,-SHANTNEWS-ին ասել է Ոսկեհասկի գյուղապետի տեղակալ Սամվել Պարգևյանը:

Խոշորացման ենթակա գյուղերի փնջերի ընտրությունը դեռ վերջնական չէ: Նախագծի վերաբերյալ գյուղացիների կարծիքներն են հաշվի առնելու, հետո վարչատարածքային բաժանման մասին օրենքում փոփոխություններ կատարելու նախագիծը ներկայացվելու է օրենսդիր մարմնին: Խոշորացման ենթակա գյուղերում ՏԻՄ ընտրությունների ժամկետ էլ կա սահմանված՝ դեկտեմբերի 5-ը:

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։