Արթիկի տարածաշրջանի գյուղերի ղեկավարները ոռոգման ջրի արդյունավետ օգտագործման տարբերակներ են առաջարկում

Ոռոգման ջրի պակասի խնդիրը կարելի է լուծել փոքր ջրամբարների և ոռոգման փակ համակարգերի կառուցմամբ…

Սա առաջարկություն է, որն Արթիկի տարածաշրջանի գյուղերը ներկայացնում են արդեն որերորդ տարին: Արթիկի տարածաշրջանում ոռոգման սեզոնին միշտ ջրի պակաս կա: Բարձրադիր գյուղերում ջուրն օգտագործում են, ավելի ցածր դիրքում գտնվողներին չի բավականացնում: Պատճառներից մեկն էլ այն է, որ ոռոգման ջուրը գյուղերին է հասնում մեծ ջրակորուստներով: Ոռոգման ջրի մատակարարման, սելավատարների ու ներքին ցանցերի վերանորոգման աշխատանքները փոխկապակցված են: Գյուղապետարանները պատրաստ են իրենց ենթակայության ներքին ցանցերը նորոգել, եթե ժամանակին ու պահանջված քանակի ջուր ստանան:

Արթիկի տարածաշրջանի գյուղերը ոռոգման ու խմելու ջուր ստանում են Մանթաշի ջրամբարից: Սեզոնին ոռոգման ջուրը չի հերիքում: Վերևի գյուղերն իրենց ցանքերն են ջրում, հարևան ու ավելի ցածրադիր գյուղերին բաժին չի հասնում: Ոռոգման համակարգը քայքայված է, ջուրը կորուստներով է տեղ հասնում:

«Եթե Մանթաշի ջրամբարից մինչև Փանիկ 1 մլն խորանարդ մետր ջուր են բաց թողնում, ապա լավագույն դեպքում 500 լիտր ջուր է տեղ հասնում, այսինքն՝ 70-80% կորուստն է կազմում: Լուծումը մենք առաջին տարին չէ, որ առաջարկել ենք: Մեր առաջարկն է՝ կամ 4-5 գյուղի համար փոքրիկ ջրամբար կառուցել, կամ փակ համակարգ անցկացնել, որով ջուրը տեղ կհասնի առանց կորուստների»,- SHANTNEWS-ին ասել է Փանիկի գյուղապետ Վարդան Մակեյանը:

Ինչպե՞ս արդյունավետ կառավարել ջրային պաշարները…

Այս հարցում Արթիկի տարածաշրջանի գյուղերն առաջարկներ են ներկայացրել ու ոչ մեկ անգամ: Առաջարկները քննարկել են, բայց քննարկումներից այն կողմ գործը չի հասել: Փակ համակարգը հնարավորություն կտա եղած ոռոգման ջուրը ցանքերին հասցնել առանց կորուստների: Իսկ, որպես ոռոգման ջուր կուտակելու հնարավորություն, գյուղապետերն առաջարկել են իրենց տարածքներում փոքր ջրամբարներ կառուցել: Նոր Կյանք գյուղում էլ լուծումն Արթիկի ջրամբարի վերակառուցումը կարող է լինել: Ջրամբարը կառուցվել է 80-ականների վերջին: Պետք է ոռոգման ջուր ապահովեր Արթիկի տարածաշրջանի ցածրադիր գյուղերի՝ Նոր Կյանքի, Փանիկի, Մեղրաշենի, Անուշավանի ու Վարդաքարի ցանքերին, բայց 1994-ին փլուզվել է: Դրանից երեք տարի անց՝ 1997-ին, վերակառուցման ծրագիր է սկսվել ու մնացել անավարտ:

«Ջրամբարի վերակառուցումն անհրաժեշտություն է: Դա է թելադրում մեր երկրի հետագա զարգացումը, դա է թելադրում գյուղատնտեսության զարգացումը: Արթիկի ջրամբարում 1,69 մլն խորանարդ մետր ջուր պետք է կուտակվեր, որից 1,5 մլն-ը՝ ոռոգման, իսկ մնացածը՝ բնապահպանական նպատակներով: Այն նաև հնարավորություն կտա գարնան սելավներից առաջացած մուտքերն այստեղ կուտակել, նաև կարող է դոտացիոն դառնալ Վարդաքարի ջրամբարի համար»,- SHANTNEWS-ին ասել է Նոր Կյանքի գյուղապետ Արա Սուքիասյանը:

Ջրամբարի վերակառուցման ևս մեկ նախագիծ ու նախահաշիվ կազմվել է 2008-ին, աշխատանքները ֆինանսավորելու էր «Հազարամյակների մարտահրավերներ» կորպորացիան: Նախագծանախահաշվային փաստաթղթերն, ըստ Նոր Կյանքի գյուղապետի, փոխանցել են կառավարությանը: Արթիկի ջրամբարի վերակառուցումը տարածաշրջանի գյուղերի համար կենսական նշանակություն ունի:

Նոր Կյանքի գյուղապետը նշում է, որ Արթիկի ջրամբարի վերակառուցման խնդրով բազմիցս դիմել են կառավարություն: Ամեն անգամ վերակառուցման խոստումներ ու ժամկետներ են հնչել: Արթիկի ջրամբարի վերակառուցման աշխատանքների մեկնարկի հերթական խոստացված ժամկետը հաջորդ տարին է:

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։