Պաշտոնական Անկարան վերջնագիր է ուղարկել Հայոց պատրիարքություն

Ստամբուլի նահանգապետարանն, ի վերջո, պատասխանել է Պոլսո հայոց պատրիարքի ընտրության վերաբերյալ ամիսներ առաջ հայկական կողմի ուղարկած դիմումին՝ հայտնելով, որ չի ճանաչում Գարեգին արքեպիսկոպոս Բեքչյանին՝ որպես պատրիարքական տեղապահ: Այս մասին հայտնում է Ստամբուլի հայկական «Ակոս» պարբերականը:

Ստամբուլի փոխնահանգապետ Իսմայիլ Գյուլթեքինի կողմից ստորագրված նամակում նշվել է, որ Պոլսո Հայոց պատրիարք Մեսրոպ Մութաֆյանը դեռևս ողջ է և հետևաբար չկան անհրաժեշտ պայմաններ նոր պատրիարքի ընտրության համար:

Ստամբուլի նահանգապետարանից հայտնել են, թե առողջական խնդիրները բավարար չեն համարվում պատրիարքական պաշտոնը թափուր ճանաչելու համար, հետևաբար Արամ արքեպիսկոպոս Աթեշյանը շարունակում է պատրիարքական փոխանորդի պաշտոնը, իսկ Բեքչյանի՝ պատրիարքական տեղապահ ընտրվելու մասին բոլոր գործընթացները անվավեր են ճանաչվում:

Ստամբուլի հայկական «Ժամանակ» օրաթերթը հայտնում է, որ նահանգապետարանի նամակը իրենց փոխանցել է Արամ Աթեշյանը, մինչդեռ Պոլսո պատրիարքությունը այն թաքցրել է՝ սպասելով դեպքերի զարգացմանը, թե ինչ արդյունք կստանա փետրվարի 7-ին պոլսահայ համայնքի առաջնորդների հանդիպումը Թուրքիայի ներքին գործերի նախարար Սուլեյման Սոյուի հետ:

Ստամբուլի նահանգապետարանի՝ արդեն հրապարակված նամակում, որտեղ պատրիարքական տեղապահ Բեքչյանի համար օգտագործվել է «այսպես կոչված» ձևակերպումը, նշվել է, որ տեղապահի ընդունած բոլոր որոշումները անվավեր են:

Պատրիարքական ընտրությունների անցկացման վերաբերյալ Նախաձեռնող խումբը դիմել էր ներքին գործերի նախարարությանը, որը, սակայն, սահմանված ժամկետում պատասխան չէր տվել: Դրանից հետո խումբը դիմել էր դատարան՝ դատական գործ հարուցելով նախարարության դեմ:

Նախաձեռնող խմբի այս որոշումը ներքին տարաձայնությունների պատճառ էր դարձել, ինչի արդյունքում խմբի 4 անդամ հրաժարական էր ներկայացրել:

Ստամբուլի «Ժամանակ» օրաթերթի փոխանցմամբ, Պոլսո պատրիարքի նախկին փոխանորդ Արամ արք. Աթեշյանը օրերս Անկարայում հանդիպում է ունեցել երկրի ներքին գործերի նախարարի հետ, իսկ պոլսահայ համայնքի առաջնորդներից մեկը՝ տարիներ շարունակ թուրքական իշխանության հետ սերտ համագործակցող Պետրոս Շիրինօղլուն Սուրբ Փրկիչ Ազգային հիվանդանոցում հանդիպել է Արամ Աթեշյանի և Սահակ Մաշալյանի հետ:

Հիշեցնենք, որ 2017թ. փետրվարի 23-24-ին` Մայր Աթոռ Ս. Էջմիածնում Ամենայն Հայոց Կաթողիկոսի նախագահությամբ տեղի ունեցած հանդիպումների ժամանակ, որոնց մասնակցել են Պոլսո Հայոց Պատրիարքության երեք միաբան եպիսկոպոսներ` Արամ արքեպիսկոպոս Աթեշյանը, Գարեգին արքեպիսկոպոս Բեքչյանը և Սահակ եպիսկոպոս Մաշալյանը, որոշում է կայացվել, որ Արամ Աթեշյանը պետք է հրաժարվի Պոլսո պատրիարքի փոխանորդի աթոռից՝ հնարավորություն ստեղծելով տեղապահի ընտրության:

Ամիսներ անց, սակայն, Աթեշյանը հայտարարեց, որ ինքը չի հրաժարվել պատրիարքի փոխանորդի աթոռից և Թուրքիայի իշխանության կողմից շարունակում է ընկալվել որպես պատրիարքի օրինական փոխանորդ, մինչդեռ ընտրված տեղապահ Գարեգին Բեկչյանը իր հերթին հրաժարվում է ճանաչել Արամ Աթեշյանի իրավունքները: