Գյումրիում անցկացվել է հայ և ռուս միկրովիրաբույժների համատեղ կոնֆերանս

Գյումրիում  միկրովիրաբուժության դասընթաց է անցկացվել, որին մասնակցել են վնասվածքաբան-օրթոպեդներ Հայաստանի, Արցախի և Ռուսաստանի տարբեր բուժհաստատություններից: Իսկ դասախոսները Ռուսաստանի առաջատար միկրովիրավուժության կլինիկաների մասնագետներն են: 80 բժիշկ Գյումրիում քննարկել են դաստակի միկրովիրաբուժության զարգացման հեռանկարները: Թեման արդիական է  հետպատերազմյան  շրջանում։ Միկրովիրաբուժության կարիք ունեցող անձանց դիմելիությունն է ավելացել:

«Որոշումը կայացվել է խոսել դաստակի վիրաբուժության մասին 44 օրյա պատերազմից հետո: Պատճառն այն է, որ այս վիրաբուժության մեջ մի քանի մասնագիտացումներ են խաչվում և սովորաբար առաջանում է որոշակի դիսոնանս, թե ով պետք է զբաղվի՝ վնասվածքաբանը, միկրովիրաբույժը, թե նեյրովիրաբույժը: Ամբողջ աշխարհում կան դաստակի վիրաբույժներ, մեզ մոտ դեռ չկան և սա այդ մշակույթը ձևավորելու առաջին քայլերից մեկն է»,- SHANTNEWS-ին ասել է Իզմիրլյան բժշկական կենտրոնի վնասվածքաբանության և օրթոպեդիայի բաժանմունքի վարիչ Սահակ Սարիբեկյանը:

Երիտասարդ օրթոպեդ- վնասվածքաբանները վերապատրաստվում են, փորձառուները՝ փորձի փոխանակում կատարում: Միկրովիրաբուժությունը բժշկության ամենաարագ զարգացող ճյուղերից մեկն է:

«Միկրովիրաբուժությունը Հայաստանում առանձին մասնագիտացում է համարվում, մինչդեռ Ռուսաստանում և շատ այլ երկրներում միկրովիրաբուժությունը բուժական մեթոդ է ,որն ընդլայնում է հնարավորությունները: Միկրովիրաբուժությունը կիրառվում է ուրոլոգիայում, պլաստիկ և դիմածնոտային վիրաբուժությունում: Ռուսաստանում, ի տարբերություն Հայաստանի, հետպատերազմյան շրջան չէ, բայց, այսպես կոչված, վնասվածքների համաճարակ է: Շատ են հիվանդները, որոնք դիմում են դաստակի վնասվածքներով»,- SHANTNEWS-ին ասել է Ռուսաստանը ներկայացնող օրթոպեդ-վնասվածքաբան Դմիտրի Նակոնեչնին:

Դաստակի վնասվածքները, մեծ մասամբ, հետևանք են շինարարությունում անվտանգության կանոնների խախտման: Բժիշկները քննարկեցին, թե որ վնասվածքների դեպքում կարելի է խուսափել վիրաբուժական միջամտությունից և բուժում իրականացնել: Հայաստանում քիչ չեն դեպքերը, երբ վնասվածքը բուժել են, բայց արդյունքը գոհացնող չէ:

Այժմ Հայաստանում մասնագիտացված երեք բուժհաստատություն կա, որտեղ իրականացվում է միկրովիրաբուժության կարիք ունեցող վիրավորների բուժման ծառայություն: Բժիշկների վերապատրաստման դասընթացները շարունակական են լինելու և սա հնարավորություն կտա, որ համապատասխան մասնագիտական կադրերով համալրված լինեն բոլոր բժշկական կենտրոնները:

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։