Շիրակի մարզի Բասեն գյուղում ջրամատակարարման նոր ցանց է կառուցվում

Շիրակի մարզի համայնքներում հաստատված սուբվենցիոն հայտերում կրկին գերակշռում են ճանապարհների հիմնանորոգումները, խճապատումներն ու սալապատումները: Նորոգվող հատվածները փոքր են՝ գյուղերի բյուջեների համաֆինանսավորման հնարավորություններին համապատասխան: Մյուս ենթակառուցվածքների՝ գազաֆիկացման, ջրամատակարարման և ջրահեռացման համակարգերի հիմնանորոգման աշխատանքների արժեքը բարձր է։ Բասեն գյուղում խմելու նոր ջրագիծ է անցկացվում պետության 65 և համայնքի 35 տոկոս համաֆինանսավորմամբ: Գյուղապետարանն այն  կարողացել է ապահովել բարեգործական միջոցների հաշվին:

Բասեն գյուղի ամենաբարձրադիր հատվածի՝ շուրջ 2000 մետր բարձրության վրա գտնվող տեղամասը կոչվում է «երեք ջուր»: Այստեղ են գտնվում բնական երեք աղբյուրները, որոնք միանում են, թափվում օրվա կարգավորիչ ջրամբար, որտեղից էլ գյուղին խմելու ջուր է մատակարարվում, բայց տեղ է հասնում 50-ականներին կառուցված խողովակաշարով: Դրանք մաշված են, քայքայված, իսկ հետևանքը՝ ջրակորուստներն են:

«Ջրակորուստները շատ են, խողովակներն առանձին տեղամասերում ցածր են տեղակայված, կոտրված են: Նաև ազբեստը, որպես այդպիսին, մարդու առողջության համար վտանգ ներկայացնող նյութ է: Ենթակա էր փոխարինման: 48 մլն դրամ է գնահատվել ծրագիրը: Մրցույթի արդյունքում շինարարական ընկերությունը հաղթել է 40 մլն դրամով: Հիմա ընթանում են խրամուղիների փորման և խողովակների տեղադրման աշխատանքները»,- Shantnews-ին ասել է Բասեն գյուղի վարչական ղեկավար Ռոման Համայակյանը:

Ջրակորուստները նվազեցնելու միակ տարբերակը նոր խողովակաշարի կառուցումն է: Բնական աղբյուրներից մինչև օրվա կարգավորիչ ջրամբար՝ ընդհանուր 5,3 կմ, նոր խողովակաշար է անցկացվում: Սուբվենցիոն հայտը հաստատվել է, պետության համաֆինանսավորումը 65, իսկ համայնքինը՝ 35 % է: Ընդհանուր աշխատանքները 40 մլն դրամ են գնահատվել: Շինարարության ընթացքը դանդաղել է նախագծային փոփոխությունների պատճառով: Տեղանքը քարքարոտ է, առանձին տեղամասերում նոր խողովակների համար խրամուղիներ փորել հնարավոր չէ:

«Տարածքը քարքարոտ է: 30 սմ հողաշերտի տակ ամբողջությամբ բազալտի շերտ է: Մեր էքսկավատորները դժվարությամբ են փորում: Բազալտի և շեբենի մեծ կտորներ են հանդիպում, որոնք, եթե չենք կարող հեռացնել, ուրեմն  որոշակի թեքությամբ կարելի է շրջանցել այդ տարածքները»,- ասել է շինընկերության աշխղեկ Մխիթար Սարգսյանը:

Նախագծային փոփոխություններն ընթացքի մեջ են: Տեղանքում նախագծողներն ուսումնասիրություններ են կատարել, դժվարամատչելի տեղամասերը շրջանցելու են: Արդյունքում՝ նոր խողովակաշարի ուղղությունը կփոխվի, իսկ երկարությունը կմնա նույնը: 160 մմ տրամագծով նոր խողովակներ են տեղադրում, որոնք վայրկյանում 10 լիտր ջուր կհասցնեն գյուղ:

Սրանով Բասեն գյուղի ջրամատակարարման ցանցի նորացման խնդիրը վերջնականապես չի լուծվի: Սուբվենցիոն ծրագրով մինչև օրվա կարգավորիչ ջրամբար հասնող խողովակաշարն է փոխվում, բայց գյուղի ներքին ցանցը դեռ հինն է մնում, ինչի պատճառով էլ ջրամատակարար ընկերությունը Բասենի ցանցն իր սպասարկման ենթակայության չի վերցնում:

Ներքին ցանցի նորացումն արդեն հաջորդ տարվա անելիքների ցանկում է: Իսկ նոր խողովակաշարի կառուցումն ավարտելու և Բասեն գյուղին մաքուր և ավելի շատ ծավալով խմելու ջուր հասցնելու համար վերջնաժամկետ սահմանված է տարեվերջը:

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։